« Տի Իքոնոմիսթ». «1915-ի Ուրուականները» Խորագիրով Կ՛անդրադառնայ Պոլսահայերու Վրայ Յարձակումներուն

0
124

 Բրիտանական « Տի Իքոնոմիսթ» շաբաթաթերթի համացանցային կայքին վրայ Երեքշաբթի, Յունուար 29-ին տեղադրուած յօդուած մը՝ «1915-ի Ուրուականները» խորագիրով, կ՛անդրադառնայ վերջին քանի մը շաբաթներուն ընթացքին Պոլսոյ հայերուն վրայ տեղի ունեցած շարք մը յարձակումներուն՝ նշելով, թէ անցեալ տարուան Դեկտեմբերի 28-ին տեղի ունեցած 85-ամեայ Մարիսա Քիւչիւքի սպանութեամբ սկսած էր վերջին յարձակումներուն շարքը, եւ մատնանշելով, որ սպաննուած կնոջ մերկ մարմինին վրայ մարդասպանին դանակով ձգուած էր խաչի հետք:
Իբրեւ վերջին դէպք կը նշուի անցեալ շաբաթ տեղի ունեցած դիմակաւոր մարդու մը յարձակումը այլ տարեց հայուհիի մը վրայ:
Յօդուածը կը նշէ, թէ մէկ ամսուան ընթացքին, Պոլսոյ Սամաթիա թաղամասին մէջ տարեց հայ կանանց վրայ հինգ յարձակում արձանագրուած է՝ աւելցնելով, թէ Սամաթիոյ մէջ մօտաւորապէս 8000 հայ կը բնակի ու հոն է նաեւ Պոլսոյ Հայոց պատրիարքարանը:
Թերթը կը նշէ, թէ մինչ Պոլսոյ կուսակալը կը պնդէ, որ այս յարձակումներուն նպատակը գողութիւն է ու անոնց ետին ցեղային դրդապատճառներ չկան, եւ հակառակ այն իրողութեան, որ զոհերէն քանի մը հատը իսկապէս կողոպտուած է, Թուրքիոյ Մարդկային իրաւունքներու միութիւնը համոզուած է, որ յարձակումները ցեղամոլութեան հետեւանք են:
« Տի Իքոնոմիսթ»ը կը նշէ, որ այս յարձակումները 1915-ի Հայկական Ցեղասպանութեան կապուած յուշեր արթնցուցած են, ապա կը մէջբերէ «Արմինիըն Ուիքլի»ի խմբագիր Խաչիկ Մուրատեանի խօսքը, թէ՝ «անոնք ցոյց կու տան, որ Թուրքիոյ մէջ հայ ըլլալը անտանելի բեռ մըն է»:
Թերթը նաեւ ակնարկութիւն մը կ՛ընէ Հրանդ Տինքի սպանութեան՝ աւելցնելով, թէ Տինքի դէմ արձակուած «թրքութիւնը վարկաբեկելու» վճիռը հաստատած դատաւոր մը վերջերս դարձեալ պաշտօնի բարձրացում ստացաւ, մինչ պետութիւնը կը պնդէ, որ կը պայքարի նման ոճիրներ իրականացնող «ընդյատակեայ պետութեան» դէմ:

 

LEAVE A REPLY

Please enter your comment!
Please enter your name here