ԸՆՏՐԱԿԱՆ ՆՈՐ ՕՐԻՆԱԳԻԾԸ ՓԱՐԻԶԻ ԵՒ ՊԷՅՐՈՒԹԻ ՔՈՒԼԻՍՆԵՐՈՒՆ ՄԻՋԵՒ

0
141

Խորհրդարանի նախագահ Նեպիհ Պըրրի երէկ նախագահեց խորհրդարանի միացեալ յանձնախումբերուն նիստին, որուն ընթացքին ընտրական օրէնքը քննարկող խորհրդարանական ենթայանձնախումբի նախագահ, երեսփոխան Ռոպեր Ղանեմ ներկայացուց այդ ենթայանձնախումբին աշխատանքներուն տեղեկագիրը:

Նիստէն բացակայեցան Մուսթաքպալ հոսանքի երեսփոխանները, իսկ այլ պլոքներու երեսփոխաններուն կողքին, կառավարութիւնը ներկայացուցին միայն երկու նախարարներ` ներքին գործոց նախարար Մարուան Շարպել եւ արդարութեան նախարար Շաքիպ Քըրթպաուի:

Նիստին ընթացքին Պըրրի հաստատեց, որ ընտրական որեւէ օրէնքի պարագային անհրաժեշտ է պահպանել ազգային միասնականութիւնը, արդարութիւնն ու համագործակցութիւնը:

Նիստէն ետք երեսփոխան Ղանեմ յայտնեց, որ միացեալ յանձնախումբերուն որոշումով`  ընտրական օրէնքը քննարկող խորհրդարանական ենթայանձնախումբին աշխատանքները 15 օրով երկարաձգուեցան:

Ղանեմ յայտնեց նաեւ, որ Պըրրի արդէն իսկ որոշած է միացեալ յանձնախումբերը բաց եւ իրերայաջորդ նիստերու (կէսօրէ առաջ եւ կէսօրէ ետք) հրաւիրել` յառաջիկայ 18 փետրուարէն սկսեալ:

Նիստէն ետք Փոփոխութիւն եւ Բարեկարգում համախմբումի երեսփոխան Ալեն Աուն յայտնեց, որ խորհրդարանական ենթայանձնախումբին աշխատանքը երկարաձգելու նպատակն է առիթ տալ, որպէսզի բոլորը գոհացնող ընտրական օրէնք մը մշակուի:

Աուն նշեց, որ Լիբանանեան Ուժերուն եւ իրենց միջեւ գործակցութեան նպատակն է յանգիլ ընտրական այնպիսի օրէնքի մը, որ քրիստոնեայ համայնքին ճշգրիտ ներկայացուցչութիւնը կ՛ապահովէ:

Իր կարգին, Լիբանանեան ուժեր կուսակցութեան փոխնախագահ, երեսփոխան Ժորժ Ատուան յայտնեց, որ իրենք կը փափաքին մշակել ընտրական օրէնք մը, որ ճշգրիտ ներկայացուցչութեան կողքին, քաղաքական բոլոր ուժերուն քաղաքական հաւասարակշռութիւն կ՛ապահովէ:

Նշենք, որ Ատուան ներկայացուցած էր այս առաջարկը, պայմանաւ որ ենթայանձնախումբը քննարկէ միայն խառն ընտրական օրինագիծը, որ կը պարփակէ համամասնական եւ մեծամասնական դրութիւնները:

խորհրդարանի նախագահը նաեւ հեռաձայնային հաղորդակցութիւն մը ստացաւ նախկին վարչապետ Սաատ Հարիրիէն:

Հանրապետութեան նախագահ զօր. Միշել Սլէյման երէկ գլխաւորելով լիբանանեան պատուիրակութիւնը, ուղղուեցաւ Քուէյթ` մասնակցելու համար սուրիացի գաղթականներ հիւրընկալող երկիրներուն նուիրատուութիւններ յատկացնելու նպատակով ՄԱԿ-ի կազմակերպած համաշխարհային խորհրդաժողովին, որուն իրենց մասնակցութիւնը բերին 59 երկիրներ:

Լիբանանեան պատուիրակութեան մաս կազմեցին փոխվարչապետ Սամիր Մուքպել, արտաքին գործոց նախարար Ատնան Մանսուր եւ ընկերային հարցերու նախարար Ուաէլ Ապու Ֆաուր:

Վարչապետ  Նեժիպ Միքաթի մեկնեցաւ Թուրքիա՝  լիբանանցի առեւանգեալներու  ազատ արձակման  կարելիութիւնները  քննարկելու նպատակով:

Փարիզի մէջ,  նախագահ Ֆրանսուա Հոլանտ ընդունեց  Փաղանգաւոր  Կուսակցութեան  պետ Ամին Ճեմայէլը:

LEAVE A REPLY

Please enter your comment!
Please enter your name here