ԻՍՐԱՅԷԼ ԻԲՐԵՒ ԿՈՂՄ ՄՈՒՏՔ ԿԸ ԳՈՐԾԷ ՍՈՒՐԻՈՅ ՀԱԿԱՄԱՐՏՈՒԹԵԱՆ ՄԷՋ

0
132

Այն ինչ Սուրիոյ   ընդդիմութիւնը չէր  յաջողեր կատարել,  Իսրայէլեան  օդուժը հասաւ օգնութեան,  ռմբակոծելով  սուրիական  հողամասերու վրայ գործող   հետազօտական  հաստատութիւն մը:  Իսրայէլեան եւ արեւմտեան  քարոզչական աղբիւրներ հաղորդեցին, թէ  Իսրայէլ  հարուածած էր  Հըզպալլային  զէնք  մատակարարող փոխադրակառքերու վրայ, սակայն իրողութիւնը այլ բան է:  Այսպիսով,  Իսրայէլ՝ իբրեւ բացայայտ կողմ, պաշտօնապէս մուտք գործեց  Սուրիոյ հակամարտութեան  մէջ: Ռուսիա,  Չինաստան եւ   Իրան  դատապարտեցին  իսրայէլեան ոտնձգութիւնը:

 Միւս կողմէ, իրենց ինքնութիւնը բացայայտել չուզող ամերիկեան, եւրոպական եւ լիբանանեան դիւանագիտական եւ ապահովական աղբիւրներ Չորեքշաբթի, Յունուար 30ին հաղորդեցին, թէ Երեքշաբթիէն Չորեքշաբթի լուսցող գիշերուան ընթացքին, իսրայէլեան ռազմական օդանաւեր, Սուրիա-Լիբանան սահմանին մօտերը սուրիական հողամասին վրայ թիրախ մը ռմբակոծած են:
Ըստ նոյն աղբիւրներուն՝ յարձակումին թիրախը եղած է փոխադրակառքերու շարասիւն մը, որ քիմիական կամ ռուսական «Էս.Էյ. 17» տիպի հակաօդային հրթիռներ կը տեղափոխէր, շատ հաւանաբար՝ զանոնք «Հըզպալլա»ին յանձնելու համար:
Իսրայէլեան «Մաարիւ» թերթը հաղորդեց, որ Իսրայէլի վարչապետ Պենիամին Նեթանիահու իր խորհրդականը Մոսկուա ղրկած է՝ սուրիական քիմիական զէնքերը ահաբեկչական կազմակերպութեանց փոխանցումը կանխարգիլելու շուրջ քննարկումներ կատարելու համար:
Նեթանիահու Երեքշաբթի օրուան կառավարութեան նիստին ըսաւ, թէ Իրան Սուրիոյ կողքին պիտի կռուի, եթէ Սուրիա արտաքին որեւէ յարձակումի ենթարկուի, միաժամանակ՝ սուրիական քիմիական զէնքերը «Հըզպալլա»ին փոխանցուելու կարելիութենէն զգուշացնելով:
Իսրայէլի փոխվարչապետ Սիլվան Շալոմ իր կարգին յայտարարած է, որ քիմիական զէնքերուն վրայ Սուրիոյ կառավարութեան վերահսկողութեան տկարացման շուրջ որեւէ նշան կրնայ իսրայէլեան զինուորական հարուածներու առաջնորդել:
Միւս կողմէ, Սուրիոյ պետական լրատուամիջոցները Չորեքշաբթի օր հաղորդեցին, թէ մէկ օր առաջ Հալէպի մէջ յայտնաբերուած են մօտաւորապէս 65 քաղաքացիներու դիակներ, որոնց կրած վէրքերը ցոյց կու տան, թէ անոնք մահապատիժի ենթարկուած են: Դամասկոս ոճիրներուն պատասխանատու համարեց ծայրայեղ իսլամական «Ճեպհէթ Նուսրա» կազմակերպութիւնը, մինչ ընդդիմութիւնը կը պնդէ, թէ կառավարութիւնն է պատասխանատուն: Յատկանշական է, որ միջադէպը տեղի ունեցած է ըմբոստներուն հակակշիռին տակ գտնուող շրջանի մը մէջ եւ ըստ պետական տուեալներու՝ զոհերը սպաննուած են, որովհետեւ մերժած են ընդդիմութեան կողքին կռուիլ:

 

LEAVE A REPLY

Please enter your comment!
Please enter your name here