Amnesty International Հետաքննութիւն Կը Պահանջէ Սամաթիոյ Յարձակումներուն Շուրջ

0
117

 Մարդկային իրաւանց պաշտպան Amnesty  International կազմակերպութիւնը տարածուած հաղորդագրութեամբ մը պահանջեց Թուրքիոյ իշխանութիւններէն, որ անյապաղ լուրջ, մանրակրկիտ եւ անկողմնակալ հարցաքննութեան ենթարկեն Սամաթիոյ մէջ հայ տարեց կիներու վրայ տեղի ունեցած յարձակումները՝ նշելով, թէ յարձակումներէն մէկը մահացու եղած է, միաժամանակ շեշտելով, թէ իշխանութիւնները պէտք է կանխեն նման դէպքերու կրկնութիւնը:
Կազմակերպութիւնը յիշեցուց, որ ատելութեան հիման վրայ յանցագործութիւնները խտրական լուրջ արարքներ են եւ Թուրքիոյ իշխանութիւնները պարտաւոր են տեսնել, թէ այս դէպքերուն ետին ցեղական կամ կրօնական ինչպիսի՛ նախապաշարումներ կան՝ յիշեցնելով, թէ այս հարցով որեւէ թերացում անտեսում մը պիտի ըլլայ Մարդկային իրաւանց եւրոպական ուխտին:
Կազմակերպութիւնը կ՛աւելցնէ, որ թէեւ ոստիկանութիւնը կը յայտնէ, թէ քննութիւններ կը կատարէ, այնուհանդերձ մտահոգիչ կը նկատէ այն իրողութիւնը, որ ոստիկանական շրջանակները դիտել կու տան, թէ «այս յարձակումներուն ետին ցեղապաշտ ազդակներ չկան»։
Միջազգային Ներումը նաեւ ցաւ կը յայտնէ, որ Թուրքիոյ օրէնսդիր մարմինները ցարդ այս յարձակումներուն կապակցութեամբ չեն նախաձեռնած համակարգուած եւ մանրակրկիտ հետաքննութեանց:

ՄԱՄԼՈՅ ԱՍՈՒԼԻՍ՝ ՍԱՄԱԹԻՈՅ ՄԷՋ

Վերջին քանի մը օրերուն, թերթերու զանազան թղթակիցներ փափաք յայտնած էին տեսակցութիւններ ունենալու Սամաթիոյ Թաղային խորհուրդի անդամներուն հետ՝ նիւթ ունենալով պատահած վերջին յարձակումները։ Թաղային խորհուրդը նման տեսակցութիւններու փոխարէն, Երեքշաբթի, Յունուար 29-ի երեկոյեան, Ս. Գէորգ եկեղեցւոյ խորհրդարանին մէջ սարքեց մամլոյ ասուլիս մը, որուն ներկայ գտնուեցան ութ թղթակիցներ։ Ֆաթիհի քաղաքապետ Մուսթաֆա Տեմիր եւս վերջին վայրկեանին մասնակցեցաւ սոյն մամլոյ ասուլիսին։
Թաղային խորհուրդի ատենապետ Եսայի Տեմիր անգամ մը եւս դիտել տուաւ, որ վերջին յարձակումները ցաւ ու յուզում պատճառած են եւ բոլորն ալ անհանգիստ են, որ դէպքերը պատահած են իրերայաջորդ կերպով, իսկ յանցագործները դեռ երեւան չեն հանուած։ «Զոհերուն հայ ըլլալը եւս ժխտական տպաւորութիւն ձգած է մեր հանրութեան վրայ։ Բայց պէտք չէ մոռնալ, որ օրինական հետապնդումի գործընթացը կը շարունակուի եւ այս պատճառաւ ամէն մարդ պէտք է ուշադիր ըլլայ իր խօսքերուն», ըսաւ ան։
Ատենապետ Եսայի Տեմիր աւեցուց. «Մենք Սամաթիոյ մէջ անդորր ու հանգիստ կեանք մը կ՛ապրինք. այստեղը մեր տունն է. ի՛նչ ալ ըլլայ, պիտի շարունակենք միասին ապրիլ։ Բայց մխիթարական է, որ այս յարձակումները բոլոր շրջանակներուն կողմէ պախարակուեցան։ Ինչ նպատակով ալ կատարուած ըլլան անոնք, մենք կը պախարակենք այս յարձակումները։ Պիտի հանգստանանք, եթէ յանցագործները ժամ առաջ երեւան հանուին ու արդարութեան յանձնուին»։
Իր կարգին, քաղաքապետ Մուսթաֆա Տեմիր կրկնեց իր այն տեսակէտը, թէ այս յարձակումները կատարուած են միայն գողութեան նպատակով։

 

LEAVE A REPLY

Please enter your comment!
Please enter your name here