ՀԱՅԿԱԿԱՆ ԿՈՏՈՐԱԾՆԵՐԸ ԴԱՏԱՊԱՐՏՈՂ ԱԶԵՐԻ ԳՐՈՂԻՆ ԴԷՄ ԱՐՇԱՒ

0
140

 Ատրպէյճանի մէջ հակահայ նոր արշաւ մը սկսած է, այս անգամ՝ իբրեւ թիրախ ունենալով հեղինակ, Մտաւորականներու միութեան անդամ Աքրամ Այլիսլին:
Ատրպէյճանական «Haqqin.az» լրատուական կայքը կը տեղեկացնէ, թէ Պաքուի մէջ գտնուող Այլիսլիի տան մօտ, իշխանամէտ կազմակերպութիւններէ խումբ մը երիտասարդներ բողոքի ցոյց մը կատարած են՝ պահանջելով անկէ, որ հեռանայ Ատրպէյճանէն:
Հիմնականին մէջ Ատրպէյճանի իշխող «Ենի Ազրպէյճան» կուսակցութեան երիտասարդական թեւը ներկայացնող  երիտասարդները կը բողոքեն անոր «Քարէ երազներ» գործին դէմ, որովհետեւ անոր մէջ կը պատմուի 1919ին, Նախիջեւանի մօտ գտնուող հայաբնակ Ագուլիս շրջանի բնակչութեան ջարդին մասին՝ ատրպէյճանցիներու կողմէ: Հեղինակը զուգահեռներ ըրած է այդ իրադարձութիւններուն եւ 1980-1990ականներուն Սումկայիթի եւ Պաքուի մէջ տեղի ունեցած հայերու ջարդերուն հետ: Գրողը վէպին մէջ դրականօրէն կ՛արտայայտուի հայերու մասին:
Ցուցարարները պոռացած են՝ «Հայ Աքրամ, կորսուէ երկիրէն», «Ինչո՞ւ ծախուած ես հայերուն», ու ապա այրած են անոր լուսանկարները, որոնց վրայ գրուեր էր վէպին անունը:
Իշխող վարչակարգի գաղափարախօսութեան համաձայն՝ Աքրամի արտայայտածները հաւասար են ազգային շահերու դաւաճանութեան, եւ այդ իսկ պատճառով, ցոյցին վայրը գտնուող ոստիկանութիւնը չէ միջամտած:
Աքրամ Այլիսլի աւելի ուշ յայտարարած է, որ եթէ իշխանութիւններուն դրդումով իր դէմ ճնշումները աւելնան, ապա կրնայ հեռանալ Ատրպէյճանէն:

 

LEAVE A REPLY

Please enter your comment!
Please enter your name here