«ՇԱՏ ԼԱՒ ԳԻՏԵՆՔ ԹԷ ԻՆՉՊԻՍԻ ԱՇԽԱՏԱՆՔ ԿԱՏԱՐՈՒԵՑԱՒ, ՈՐՊԷՍԶԻ ՀԱՅԵՐԸ ՍՐԲՈՒԻՆ ԱՅՍ ԵՐԿՐԷՆ». Կ’ԸՍԷ ՔԻՒՐՏ ԵՐԵՍՓՈԽԱՆԸ

0
140

Քրտամէտ Խաղաղութիւն եւ ժողովրդավարութիւն կուսակցութեան համանախագահ Կիւլթան Քըշանաք կուսակցութեան երեսփոխանական խմբակի նիստին ընթացքին պաշտպան կանգնած է Սամաթիոյ մէջ յարձակումի ենթարկուած հայերուն, միաժամանակ՝ կառավարութիւնն ու շրջանային ղեկավարները հրաւիրած է ժամ առաջ յանցագործները երեւան հանելու իրենց պարտականութիւնը կատարելու։ Քըշանաք ըսած է, որ եթէ նկատի առնուի այն իրողութիւնը, որ յարձակումները կատարուած են հետեւողական կերպով եւ նոյն ձեւով, ապա  յայտնի կը դառնայ, թէ անոնք ատելութեան արդիւնք են։ «Անոնց մահացու կերպով ծեծի ենթարկուիլը փաստ է, թէ խնդիրին մէջ ատելութիւն կայ։ Սպաննուած Մարիձայի տան մէջ, սեղանին վրայ գտնուող դրամներն իսկ չեն առնուած», ըսած է ան։
Քըշանաք աւելցուց. «Շատ լաւ գիտենք, թէ ինչպիսի՛ աշխատանք տարուեցաւ որպէսզի հայերը սրբուին այս երկիրէն, թէ ինչպիսի սպանդներու ենթարկուցան անոնք եւ թէ ասիկա մօտիկ անցեալի արիւնող վէրքն է։ Հիմա այս երկիրին համար ամօթ է, որ այլեւս փոքրիկ թիւ մը մնացած հայերու կեանքի ապահովութիւնն իսկ չերաշխաւորուի։ Տակաւին չտեսանք, որ պատկան մարմինները կամ կուսակալութիւնը լուրջ քննութիւն մը կատարէ եւ լուսաբանութիւն մը ընէ։ Ասիկա ամօ՛թ է երկիրին համար։ Արդէն անմոռանալի ցնցումներ ապրած  փոքրաթիւ հայ հայրենակիցներու տարեց կիները չենք կրնար պաշտպանել, ասիկա ամօ՛թ մըն է։ Ամէն մարդ պէտք է թեւ-թիկունք ըլլայ անոնց։ Մենք, իբրեւ Խաղաղութիւն եւ ժողովրդավարութիւն կուսակցութիւն՝  խստօրէն կը պախարակենք այս յարձակումները եւ կ՛ըսենք, որ երբեք առանձին պիտի չձգենք մեր հայ հայրենակիցները։ Հետապնդողը պիտի ըլլանք այս յարձակումներուն»։

«Ս. ՓՐԿԻՉ»Ը ԻՐ  ԴՌՆԵՐԸ ԿԸ ԲԱՆԱՅ ՍԱՄԱԹԻԱՑԻ ՏԱՐԵՑ ԿԻՆԵՐՈՒ ԱՌՋԵՒ

Սամաթիոյ մէջ հայ տարեց կիներու վրայ կատարուած յարձակումները տակաւին չեն լուսաբանուած եւ այդ պատահարներուն մասին հակասական կարծիքներ կան։ Իշխանութիւնը, պաշտօնական գետնի վրայ, համոզուած է, որ այս յարձակումները ազգային դրդապատճառներ չունին, այլ պարզապէս գողութեան համար կատարուած են։ Քաղաքական լայն շրջանակներու կարծիքը, սակայն, այդ չէ։ Անոնք համոզուած են, որ յարձակումները ունին հակահայ բնոյթ։
Ինչ ալ ըլլան դրդապատճառները, արդիւնքն այն է, որ Սամաթիոյ մէջ տարեց կիներ ունեցող ընտանիքները վրդոված են եւ անձկութեան մատնուած։ Թերեւս կան տարեց կիներ, որոնք առանձին կ՛ապրին ու կը վախնան։ Այս պարագան նկատի առնելով՝ Ս. Փրկիչ Ազգային հիւանդանոցի հոգաբարձութիւնը ընդունեց գովելի որոշում մը: Դիտել տալէ ետք, թէ Հոգաբարձութիւնն ալ անձկութեամբ կը հետեւի դէպքերու զարգացումին՝ ան հաղորդեց, թէ հիւանդանոցը պատրաստ է իր միջոցները տրամադրելու բոլոր անոնց, որոնք պաշտպանութեան կարիքը կը զգան։ Հիւանդանոցը զանոնք իր երդիքին տակ պիտի հիւրընկալէ մինչեւ որ խնդիրը լրիւ լուսաբանուի։

 

LEAVE A REPLY

Please enter your comment!
Please enter your name here