ՍՈՒՐԻԱՀԱՅԵՐՈՒ ՀԱՄԱՐ ՆՈՐ ԲՆԱԿԱՐԱՆՆԵՐ ԿԱՌՈՒՑԵԼՈՒ ԾՐԱԳԻՐ

0
156

«Ամենայն հայոց արձագանգ» փրկարարական ծառայութիւնը մշակած է նախագիծ մը, որուն միջոցով նպատակ ունի լուծել սուրիահայերու բնակարանային խնդիրները:
Ծառայութեան հիմնադիր նախագահ Տիգրան Ալաջաջեանը «Ազատութիւն» ձայնասփիւռի կայանին հետ ունեցած զրոյցին ընթացքին նշած է, որ, ըստ նախագիծին, Երեւանի արուարձաններէն մէկուն մէջ պիտի կառուցուի քաղաքատիպ աւան սուրիահայութեան համար:
«Երեւանից ոչ հեռու մենք ունենք սեփականութեան իրաւունքով մեզ պատկանող հողատարածք Նոր Հաճընի հարեւանութեամբ, Մրգաշատի կողքը, 2 հեկտար, որը պատրաստ ենք նուիրել ծրագրի իրականացմանը», յայտնած է Ալաջաջեանը:
Նախաձեռնութեան միացած է նաեւ «Ազատագրում» հայրենասիրական ընկերային-բարեսիրական կազմակերպութիւնը՝ տրամադրելով Աջափնեակ համայնքին մէջ իրենց պատկանող երկու մուտքով 9ը յարկի համար նախատեսուած կիսակառոյց շինութիւնը:
Յառաջիկայ շաբաթներուն պիտի յստականայ, թէ 2 հեկտարի վրայ ինչպիսի՞ շէնքեր պիտի կառուցուին ու ի՞նչ պայմաններով բնակարանները պիտի յանձնուին բնակիչներուն: Սուրիահայերուն օգնելու համար ստեղծուած «Օգնիր եղբօրդ» ծրագիրի համակարգող Խաչիկ Ճոզիկեանը յայտնած է, որ ինչ ալ որոշուի, այնուամենայնիւ, մէկ բան պարզ է, որ բնակարաններ կրնան ձեռք բերել նոյնիսկ այն սուրիահայերը, որոնք Հայաստան եկած են առանց խնայողութիւններու:
Համակարգողը նշած է, որ եթէ մէկ ամսուան ընթացքին կարելի ըլլայ ծրագիրը մեկնարկել, ապա 6 ամսուան ընթացքին արդէն բնակարանները յանձնուելու պատրաստ պիտի ըլլան:
Ծրագիրը տակաւին մշակման հանգրուանի մէջ է եւ ամէնէն ուշը մէկ շաբաթէն նախագիծը պիտի ներկայացնեն նաեւ կառավարութեան՝ յաւելեալ աջակցութեան համար:
«Այսօր մենք ունենք սիրիահայ ընտանիքներ, որոնք պատրաստ են որոշակի գումարային մասնակցութիւն ունենալ բնակարանները կառուցելու գործում, բայց դա քիչ է: Մենք նաեւ յոյս չունենք, որ այս ծրագիրը կ՛իրականացնենք զուտ բարեգործութիւնների արդիւնքում: Պէտք է դիմենք եւ վարկերի, եւ ժամանակաւոր օգնութիւնների համար, որոնք պէտք է վերադարձուեն տան սեփականատէրերի կողմից», յայտնած է Ճոզիկեանը:
Պատասխանելով այն հարցումին, թէ նախնական հաշիւներով որքա՞ն պիտի արժէ բնակարանի մէկ քառակուսի մեթրը՝ Ճոզիկեանը պատասխանած է. «Շատ չնչին գումար կը լինի, հողը նուիրատուութիւն է, իրենք պէտք է միայն վճարեն շէնքի շինարարութեան ծախսերը: Նախնական 10-20 տոկոս կը վճարեն, մնացածը՝ տարիների ընթացքում, իսկ մէկ քառակուսի մետրի համար նախնական հաշուարկով կը վճարեն մօտ 300 դոլար»:

LEAVE A REPLY

Please enter your comment!
Please enter your name here