ԻՍՐԱՅԷԼԵԱՆ 12 ԿՈՐԾԱՆԻՉՆԵՐ ՄԱՍՆԱԿՑԱԾ ԵՆ ՍՈՒՐԻՈՅ ՎՐԱՅ ԱՐՇԱՒԻՆ

0
133

«Իզրայէլ Թուտէյ» թերթը հաղորդեց, որ իսրայէլեան 12 կործանիչներ  մասնակցած են Սուրիոյ վրայ կատարուած յարձակումին, որուն ընթացքին ռմբակոծուած են երկու թիրախներ: Առաջին թիրախը եղած է «Հըզպալլա»ի հակահրթիռային համակարգեր փոխադրող շարասիւն մը( Այս  տեղեկութիւնը կը մնայ խիստ կասկածելի եւ միակողմանի), իսկ երկրորդը՝ ռազմական գիտական հետազօտութեանց կեդրոն մը:
Դիւանագիտական աղբիւրներ եւս լիբանանեան «Ժումհուրիյա» թերթին յայտնած են, որ իսրայէլեան օդուժը երկու թիրախ հարուածած է, անոնցմէ մէկը՝ շարժուն, որ կրնար հրթիռներու արձակման հարթակ մը կամ ռազմական շարասիւն մը ըլլալ, իսկ երկրորդը՝ ռազմական գիտական հետազօտութեանց կեդրոն մը, որ ամբողջութեամբ քանդուած է:
Մինչ այդ, Արաբական Լիկան դատապարտեց Սուրիոյ վրայ իսրայէլեան յարձակումը, որ պատճառած է առնուազն երկու զոհ եւ շարք մը վիրաւորներ: Լիկան նշեց, որ իսրայէլեան արարքը «ՄԱԿ-ի Ուխտը բռնաբարում եւ միջազգային համաձայնութիւններու ու փաստաթուղթերու խախտում մըն» է՝ աւելցնելով, թէ արաբական հողերու վրայ իսրայէլեան անցեալի յարձակումներէն ետք միջազգային ընտանիքին լռութիւնը՝ Իսրայէլը քաջալերած է նոր յարձակումներ գործելու:
Իրան եւս բուռն կերպով քննադատեց իսրայէլեան յարձակումը՝ նշելով, որ «յարձակումը համահունչ է արեւմտեան եւ իսրայէլեան այն քաղաքականութեան, որ կը միտի կայունութեան եւ ապահովութեան վերատիրանալու Սուրիոյ ժողովուրդին ու կառավարութեան յաջողութիւններէն ուշադրութիւն շեղելու»:
Միւս կողմէ, ՄԱԿ-ի եւ Արաբական Լիկայի Սուրիոյ հարցով յատուկ պատուիրակ Լախտար Իպրահիմի յայտնեց, որ սուրիական տագնապի քննարկման համար ՄԱԿ-ի Ապահովութեան Խորհուրդէն բացի այլ վայր չկայ՝ շեշտելով, որ անհրաժեշտ է «վերջ տալ Ժընեւի հաղորդագրութեան մէջ նախագահ Պաշար Ասատի դերակատարութեան վերաբերեալ անորոշութեան»:

LEAVE A REPLY

Please enter your comment!
Please enter your name here