ԼԻԲԱՆԱՆԸ ԱՊԱՀՈՎԱԿԱՆ ՑՆՑՈՒՄԻ ԵՆԹԱՐԿԵԼՈՒ ՓՈՐՁ ԱՐՍԱԼԻ ՄԷՋ

0
127

 Երէկ Արսալի մէջ լիբանանեան  բանակը ենթարկուեցաւ յարձակումի մը, որուն ընթացքին նահատակուեցան հարիւրապետ Փիեռ Մաշաալանի եւ ենթասպայ Իպրահիմ Զահրաման, ինչպէս նաեւ յանցագործ Խալետ Հմայէտ եւ վիրաւորուեցան վեց ուրիշներ:

Բանակի գաղտնի սպասարկութեան ջոկատ մը իմացած էր, որ էսթոնիացի քաղաքացիները առեւանգող եւ ահաբեկչական այլ յանցանքներով ամբաստանուած Խալետ Հմայէտ կը գտնուի Արսալի մէջ, եւ զայն ձերբակալելու նպատակով ներխուժած էր անոր բնակարանը եւ ձերբակալած զայն:

Մինչ գաղտնի սպասարկութեան ջոկատը ձերբակալեալին հետ կ՛ուղղուէր դէպի Արսալի բարձունքները, Հմայէտի ձերբակալման լուրը տարածուած էր այնպէս մը, որ սուրիական գաղտնի սպասարկութիւնը ձերբակալած է զայն:

Հետեւաբար, Արսալի բնակիչները եւ մեծ թիւով զինեալներ յարձակած էին բանակի ջոկատի շքախումբին վրայ եւ կրակ բացած անոր ուղղութեամբ:

Զինեալ բախումները ստացած էին բուռն բնոյթ եւ բախումներուն ընթացքին սպաննուած էին հարիւրապետ Փիեռ Մաշաալանի եւ ենթասպայ Իպրահիմ Զահրաման, ինչպէս նաեւ յանցագործ Խալետ Հմայէտ:

Զինեալները գրաւած էին բանակին յատուկ զինուորական ինքնաշարժներն ու պատանդ բռնած արձանագրուած վիրաւորները եւ զանոնք տարած էին Արսալի քաղաքապետարան, մինչեւ որ բանակի հրամանատարութիւնը յաւելեալ ուժեր ղրկած էր Արսալ եւ իր նահատակներն ու վիրաւորները փոխադրած Պաալպեքի Ամալ հիւանդանոցը:

Աւելի ուշ բանակի հրամանատարութիւնը հրապարակեց հաղորդագրութիւն մը, որուն մէջ նշուեցաւ, որ բանակին գաղտնի սպասարկութեան ջոկատներէն մէկը յանցագործ մը ձերբակալելու նպատակով ուղղուած էր Արսալ եւ ինկած էր թակարդի մը մէջ, որուն ընթացքին արձանագրուած էին զինեալ բախումներ:

Բախումներուն պատճառով նահատակուած էին հարիւրապետ մը եւ ենթասպայ մը եւ վիրաւորուած ուրիշներ, ինչպէս նաեւ զինուորական ինքնաշարժները կրած էին մեծ վնասներ:

Հետեւաբար, բանակը Արսալը շրջափակած էր մեծ զօրամասով մը եւ ներխուժումներ կատարած` ձերբակալելու համար բանակին դէմ կրակ բացող քաղաքացիները:

Հաղորդագրութեան մէջ բանակը Արսալի բնակչութենէն պահանջեց բանակին հետ առաւելագոյնս գործակցիլ` զգուշացնելով, որ բանակը երբեք թոյլ վերաբերմունք պիտի չցուցաբերէ զինեալներուն թաքստոց ապահովող քաղաքացիներուն նկատմամբ:

Պաշտպանութեան նախարար Ֆայեզ Ղոսըն ցաւ յայտնեց այս միջադէպին համար եւ խստիւ դատապարտեց բանակին դէմ յարձակումը` գուժելով բանակին նահատակներուն մահը եւ ապաքինում մաղթելով վիրաւորներուն:

Ղոսըն շեշտեց, որ լիբանանեան պետութենէն աւելի բարձր պետութիւն պէտք չէ ըլլայ ամբողջ Լիբանանի տարածքին: «Լիբանանեան պետութեան եւ անոր բանակին արժանապատուութիւնը կարելի չէ թիրախ դարձնել», ըսաւ ան:

 

LEAVE A REPLY

Please enter your comment!
Please enter your name here