ՀԱՊԿ ԱՆԴԱՄ ՊԵՏՈՒԹԻՒՆՆԵՐՈՒՆ ՄԻՋԵՒ ԱՊԱՀՈՎԱԿԱՆ ՀԱՄԱԳՈՐԾԱԿՑՈՒԹԻՒՆԸ Կ’ԱՄՐԱՊՆԴՈՒԻ

0
96

 Հաւաքական Անվտանգութեան Պայմանագիրի Կազմակերպութեան անդամ պետութիւններուն մէջ իրավիճակը նախորդ տարուան ընթացքին, ընդհանուր առմամբ, կայուն եղած է: Այս հաստատումը կատարեց  ՀԱՊԿ-ի գլխաւոր քարտուղար Նիքոլայ Պորտիւժան, Ասթանա-Երեւան-Քիեւ-Մինսք տեսակամուրջին ընթացքին. ան նշեց , որ այդ կայունութիւնը առիթ տուած է յատուկ ուշադրութիւն դարձնելու ընկերային եւ տնտեսական հարցերուն։
Պորտիւժան դիտել տուաւ, որ ՀԱՊԿ-ի ներուժը պատրաստ է լիարժէք կերպով գործելու սահմաններու պաշտպանութեան եւ երկրի անվտանգութեան ապահովման հարցերուն մէջ: «Բոլոր անդամ պետութիւններուն հետ մշակած ենք ընդհանուր մօտեցումներ, արդիւնաւէտ աշխատանքներ տարուած են ռազմական եւ ռազմա-արհեստագիտական համագործակցութեան առնչութեամբ, ստորագրուած են քանի մը համաձայնագիրներ», նշեց ան: ՀԱՊԿ-ի գլխաւոր քարտուղարը տեղեկացուց նաեւ, որ այս տարի քայլեր պիտի առնուին՝ թմրամիջոցներու եւ մարդոց վաճառքի դէմ պայքարի ծիրին մէջ, ու պիտի գործադրուին կարգ մը ծրագիրներ։
Անդրադառնալով ՀԱՊԿ-ի հիմնարկի ստեղծման գաղափարին՝ Պորտիւժան յայտնեց, որ ՀԱՊԿ-ի առաջին ակադեմիան պիտի ստեղծուի Հայաստանի տարածքին. անիկա պիտի զբաղի վերլուծական աշխատանքներով, մարդուժի պատրաստութեամբ, ինչպէս նաեւ կառոյցի մասին տեղեկութիւններ տարածելով:
Հայ-թրքական սահմանի բացման առնչութեամբ ՀԱՊԿ-ի հաւանական աջակցութեան վերաբերող հարցումի մը պատասխանելով՝ Պորտիւժան նշեց, որ այդ հարցը կը վերաբերի երկկողմանի յարաբերութիւններուն, եւ ՀԱՊԿ-ը նման նուրբ հարցերու չի միջամտեր։

 

LEAVE A REPLY

Please enter your comment!
Please enter your name here