ԻՍՐԱՅԷԼ ԿԸ ԽՈՍՏՈՎԱՆԻ ՍՈՒՐԻՈՅ ՎՐԱՅ ՅԱՐՁԱԿՈՒՄԸ

0
121

Ամերիկեան «Թայմ» պարբերաթերթը` մէջբերելով արեւմտեան գաղտնի սպասարկութիւններու աղբիւրներ, յայտնեց, որ իսրայէլեան օդուժը Երեքշաբթի գիշեր Սուրիոյ մէջ առնուազն չորս թիրախներու դէմ յարձակում գործած է եւ ոչ թէ երկու, ինչպէս լրատուամիջոցներ հաղորդած էին: Աղբիւրները նշած են, որ իսրայէլեան օդուժը Դամասկոսի հիւսիս-արեւմուտքը գտնուող Ժամրայա շրջանին մէջ գիտական հետազօտութեան կեդրոնը հարուածած է` մեկնելով այն մտավախութենէն, որ ծայրայեղ իսլամականներ կրնան գրաւել քիմիական եւ կենսաբանական զէնքերու պատրաստութեան սարքեր պարունակող այդ կեդրոնը:

Իսրայէլի պաշտպանութեան նախարար Իհուտ Պարաք երէկ յայտարարեց, որ յարձակում գործողը Իսրայէլն էր` շեշտելով, որ «Իսրայէլ Սուրիայէն Հըզպալլայի զէնքերու փոխադրութիւն պիտի չարտօնէ»: Ան նաեւ ըսաւ, որ Ասատի տապալումը այլեւս մօտալուտ է:

Իրանի խորհրդարանի նախագահ Ալի Լարիճանի դատապարտեց «Սուրիոյ դէմ իսրայէլեան վերջին յարձակումը»` նշելով, որ ատիկա փաստ մըն է, թէ «Իսրայէլ կը կանգնի Սուրիոյ դէպքերուն ետին»: Ան նաեւ ընդգծեց, որ Սուրիոյ մէջ քաղաքական բարեփոխումներու կարիքը կայ, իսկ Իրան իսլամական բոլոր երկիրներուն մէջ ժողովրդավարութեան հաստատման կ՛աջակցէր ու կ՛աջակցի: Լարիճանի Սուրիոյ մէջ զինեալ խմբաւորումները զինողներուն եւ ֆինանսաւորողներուն կոչ ուղղեց «Իսրայէլի զօրանոցէն անջատուելու»:

Թուրքիոյ վարչապետ Ռեճեպ Թայիփ Էրտողան դատապարտեց Սուրիոյ դէմ իսրայէլեան վերջին յարձակումը եւ Իրանին կոչ ուղղեց Սուրիոյ նկատմամբ իր կեցուածքները վերատեսութեան ենթարկելու:

Բրիտանական «Սանտէյ Թայմզ» օրաթերթը երէկ հաղորդեց, որ Իսրայէլ «արմատական ըմբոստներէն» եւ «իսլամական հետզհետէ աճող վտանգէն» պաշտպանուելու նպատակով Սուրիոյ մէջ 10 քիլոմեթր խորութեամբ ապահովական գօտիի մը ստեղծման կարելիութիւնը կը քննարկէ: Օրաթերթը կը նշէ, որ անիկա Լիբանանի մէջ նախապէս գոյութիւն ունեցող իսրայէլեան ապահովական գօտիին օրինակով պիտի ըլլայ: Ծրագիրը պատրաստողներուն մօտիկ աղբիւր մը նշած է, որ «եթէ երկրին կացութիւնը շարունակէ անկայուն մնալ, կրնանք ստիպուիլ տարիներով այդտեղ մնալ»:

Իսրայէլեան «Մաարիւ» օրաթերթը իր կարգին իսրայէլեան զինուորական աղբիւրներ մէջբերելով յայտնեց, որ այդ ապահովական գօտին 16 քիլոմեթր լայնքով պիտի ըլլայ «եւ կրնանք տարիներ այդտեղ մնալ, եթէ Սուրիա շարունակէ անկայուն մնալ»: Աղբիւրները «Մաարիւ»-ին կը յայտնեն, որ ապահովական գօտին Լիբանանի մէջ նախապէս գոյութիւն ունեցող իսրայէլեան ապահովական գօտիին նման պիտի ըլլայ:

 

 

LEAVE A REPLY

Please enter your comment!
Please enter your name here