ԼԱՒՐՈՎ ԱՐԳԵԼՔ ԿԸ ՆԿԱՏԷ ԱՍԱՏԻ ՀԵՌԱՑՈՒՄԻՆ ՊԱՀԱՆՋՆԵՐԸ

0
140

Ռուսիոյ արտաքին գործոց նախարար Սերկէյ Լաւրով Շաբաթ օր Միւնիխի մէջ տեղի ունեցած ապահովական հարցերու 49-րդ խորհրդաժողովին ծիրին մէջ հանդիպում մը ունեցաւ սուրիական ընդդիմադիր Ազգային համաձայնական մարմինի նախագահ Ահմետ Մաազ Խաթիպի հետ, ինչպէս նաեւ Միացեալ Նահանգներու փոխնախագահ Ճօ Պայտընի ու Սուրիոյ հարցով ՄԱԿ-ի եւ Արաբական Լիկայի յատուկ պատուիրակ Լախտար Իպրահիմիի հետ:

Սպիտակ տունը հաղորդեց, որ Պայտըն-Լաւրով հանդիպումին ընթացքին համաձայնութիւն գոյացած է հակառակ բազմաթիւ տարակարծութեանց միասին աշխատանքը շարունակելու: Պայտըն կարեւոր նկատած է, որ «երկու երկիրները աշխատին միջազգային, ներառեալ` Սուրիոյ խաղաղութեան եւ կայունութեան ի նպաստ»` նշելով, որ  Մոսկուա եւ Ուաշինկթըն «բազմաթիւ հարցերու շուրջ պիտի շարունակեն տարակարծիք մնալ, սակայն անհրաժեշտ է, որ անոնք ներկայիս աշխարհի դիմագրաւած մարտահրաւէրներուն գործնական լուծումներ գտնելու համար երկխօսութիւնը շարունակեն»:

Լաւրով իր կարգին յոյս յայտնած է, որ Սուրիոյ շուրջ աշխատանքային խմբակը դարձեալ ժողով գումարէ` նշելով, որ կարելի է յառաջխաղացք արձանագրել:

Լաւրով Խաթիպի հետ ունեցած աննախադէպ հանդիպումէն ետք յայտարարեց, որ կը փափաքի սուրիական ընդդիմութեան հետ կանոնաւոր հանդիպումներ ունենալ, «եւ այդ է, որ պիտի կատարենք»:

Սուրիական ընդդիմադիր Ազգային համաձայնական մարմինը երէկ յայտարարեց, որ Ռուսիա ներկայիս սուրիական տագնապին վերջ տալու համար պէտք է Ասատի վարչակարգին վրայ ճնշում բանեցնէ: Մարմինի բանբեր Ուալիտ Պաննա ԱՖՓ լրատու գործակալութեան յայտնեց, որ «գնդակը ներկայիս ռուսական դաշտին մէջ է, եթէ Ռուսիա շրջանի ապագային մէջ իր իսկական շահերուն նախանձախնդիր է»:

«Մենք կը կարծենք, որ Ռուսիա պէտք է սուրիացի ժողովուրդի արդար պահանջներուն կողքին ըլլայ եւ ոչ թէ անոր, որ սուրիացի ժողովուրդը կը սպաննէ», ըսաւ ան` աւելցնելով, որ Ասատի հեռացումին պահանջները արգելք նկատող «ռուսական կեցուածքին մէջ բեկում մը չկայ»:

Թուրքիոյ արտաքին գործոց նախարար Ահմեթ Տաւութօղլու իր կարգին յայտնեց, որ «ոմանք կ՛ըսեն, թէ վարչակարգին եւ ընդդիմութեան միջեւ երկխօսութիւն պէտք է կատարուի, սակայն ատիկա սխալ ուղի է, ատիկա լուծում չի կրնար ըլլալ»` աւելցնելով, որ Ասատ «նախ եւ առաջ Սուրիոյ մէջ գործուած ջարդերուն համար իր պատասխանատուութիւնը պէտք է կրէ»:

Նշենք, որ Ազգային համաձայնական մարմինի նախագահ Մոազ Խաթիպ անցեալ շաբաթ պատրաստակամութիւն յայտնած էր սուրիական վարչակարգին հետ ուղղակի երկխօսութիւն կատարելու:

Միւս կողմէ, Իրանի արտաքին գործոց նախարար Ալի Աքպար Սալեհի հանդիպում ունեցաւ Խաթիպի հետ: Ան Միւնիխի մէջ իր արտասանած խօսքին ընթացքին յայտնեց, որ Թեհրան կը փորձէ նպաստել կառավարութեան եւ ընդդիմադիր խմբաւորումներուն միջեւ բանակցութիւններու սկսման: «Իրան կը բանակցի ընդդիմադիր բոլոր խումբերուն եւ կառավարութեան հետ: Մենք պատրաստ ենք զրուցելու ընդդիմութեան բոլոր ներկայացուցիչներուն հետ: Ես վերջերս յաջող բանակցութիւններ ունեցած եմ պարոն Խաթիպի հետ», ըսաւ ան, սակայն չնշեց, թէ ո՛ւր եւ ե՛րբ տեղի ունեցած են բանակցութիւնները:

LEAVE A REPLY

Please enter your comment!
Please enter your name here