ԼԻԲԱՆԱՆԵԱՆ ԲԱՆԱԿԸ ՀՈՂԻՆ ՅԱՆՁՆԵՑ ԱՐՄԱՏԱԿԱՆՆԵՐՈՒՆ ՍՊԱՆՆԱԾ ԵՐԿՈՒ ԲԱՆԱԿԱՅԻՆՆԵՐԸ

0
124

Մրայժաթ երէկ խոր սուգի մէջ իր վերջին հրաժեշտը տուաւ իր զաւակներէն հարիւրապետ  Փիեռ Պաշաալանիի, որ յետ մահու ստացած իր աստիճանի բարձրացումով հողին յանձնուեցաւ իբրեւ հազարապետ:

Արսալի մէջ իր պաշտպանած քաղաքացիներուն իսկ կողմէ սպաննուած հազարապետ Պաշաալանի, որուն դիակը երէկ առաւօտեան հասաւ Պալլունէ, իր զինակիցներուն կողմէ ուսամբարձ փոխադրուեցաւ դէպի Քահհալէ եւ ապա Մրայժաթ, ուր ընդունուեցաւ սուգի մթնոլորտով համակուած, բայց եւ այնպէս հպարտութիւն առթող ծափողջոյններով:

Լիբանանեան դրօշով ծածկուած Պաշաալանիի դագաղը, որ բոլոր գիւղաքաղաքներուն մէջ ընդունուած էր բրինձով եւ ծաղիկներով, մահերգի նուագակցութեամբ դրուեցաւ Մար Ժըրժոս եկեղեցւոյ մէջ, ուր նահատակ հազարապետին ընտանիքն ու բարեկամները, ինչպէս նաեւ լիբանանեան բանակի ընդհանուր հրամանատար զօր. Ժան Քահուաժի ներկայ գտնուեցան անոր յուղարկաւորութեան:

Յուղարկաւորութեան ընթացքին մարոնի համայնքի Զահլէի առաջնորդ Մանսուր Հոպէյքա եպիսկոպոս յայտնեց, որ ոչ մէկ քաղաքացի իրաւունք ունի բանակին դիմադրելու կամ բանակին դէմ յարձակելու, ինչ ալ ըլլան պատճառները:

Ան բարձր գնահատեց Պաշաալանիի ծառայութիւնը` շեշտելով, որ երկիրները կը գոյատեւեն իրենց զաւակներուն նահատակութեամբ:

Պաշտպանութեան նախարարի եւ բանակի հրամանատարի ներկայացուցիչ Ատնան Ապու Եասին իր արտասանած խօսքին մէջ շեշտեց, որ լիբանանեան բանակին դէմ գործուած այս յարձակումը ազգային դաւաճանութիւն է, որուն դիմաց լուռ պիտի չմնան պետութիւնն ու բանակը:

Իր կարգին, Փիեռ Պաշաալանիի հայրը արտասանեց խօսք մը, որուն մէջ շնորհակալութիւն յայտնեց Մրայժաթի բնակչութեան եւ հանրապետութեան նախագահին, որ շեշտեց, թէ իր սիրտը հանդարտած է, երբ հանրապետութեան նախագահ զօր. Միշել Սլէյման հաստատած է, որ Փիեռ Պաշաալանիի նահատակութեան սուգը նաեւ իրեն համար ենթակայական է:

Հանրապետութեան նախագահ զօր. Միշել Սլէյման երէկ կէսօրէ ետք այցելեց Մրայժաթ, ուր ցաւակցութիւն յայտնեց նահատակ հազարապետին ընտանիքին:

Նախագահ Սլէյման հաստատեց, որ լիբանանեան պետութիւնը Արսալի ոճիրին բոլոր պատասխանատուները պիտի պատժէ: Ան շեշտեց, որ անհրաժեշտ է նեցուկ կանգնիլ լիբանանեան բանակին եւ մերժել ծայրայեղութիւնն ու զինեալ երեւոյթները:

Զօր. Քահուաժի իր կարգին ցաւակցութիւն յայտնեց Փիեռ Պաշաալանիի ընտանիքին եւ հարազատներուն` շեշտելով, որ իրենց զաւկին եւ ենթասպայ Իպրահիմ Զահրամանի արիւնը յումպէտս պիտի չհոսի, որովհետեւ բանակը պիտի հետապնդէ անոնց դէմ գործուած քստմնելի ոճիրին մանրամասնութիւնները եւ պիտի ձերբակալէ ու պատժէ բոլոր յանցագործները:

Նշենք, որ զօր. Քահուաժի այցելեց նաեւ Արսալի միջադէպին վիրաւորուած զինուորներուն եւ անոնց մաղթեց շուտափոյթ ապաքինում:

Լիբանանեան բանակը շարունակեց շրջափակուած պահել Արսալը եւ շրջուն ջոկատներով հսկողութիւնը շարունակեց այդ գիւղաքաղաքին փողոցներուն մէջ:

Բանակը Արսալի մէջ ձերբակալեց 30 հոգի, որոնցմէ երկուքը` սուրիացիներ եւ, ըստ նախնական տուեալներուն, ձերբակալեալներուն շարքին կայ կարեւոր անձնաւորութիւն մը:

Արսալի քաղաքապետ Ալի Հուժէյրի Ռիֆայիի հետ հանդիպումին ընթացքին արտասանեց խօսք մը, որուն մէջ շեշտեց, որ Արսալ ուղղուած լիբանանեան ջոկատին անդամները իրենց վրայ լիբանանեան բանակի տարազ չէին կրեր, այլապէս նման դէպք չէր արձանագրուեր:

Ի պատասխան Հուժէյրիի կատարած այս «հաստատումներուն», լիբանանեան բազմաթիւ լրատուամիջոցներ հրապարակեցին բանակին կողմէ տրամադրուած լուսանկարներ, ուր յստակ կ՛երեւէր, թէ Արսալ գացած ջոկատը «Համֆի» տիպի զինուորական ինքնաշարժներով եւ տարազաւոր զինուորներով ստանձնած էր իր պարտականութիւնը:

Ըստ «Ժատիտ» պատկերասփիւռի կայանին, երբ բանակին դէմ դաւադրութիւնը գործուած է եւ ջոկատին բոլոր զինուորները ողջ վիճակի մէջ իբրեւ պատանդներ փոխադրուած են Արսալի քաղաքապետարան, սալաֆական միւֆթի Մուսթաֆա Հուժէյրի կրօնական հրահանգ մը արձակած է զանոնք սպաննելու եւ հետեւելով անոր հրահանգին զինեալները երկու զինուորականները սպաննած են կացինով:

Լիբանանեան բանակի հրամանատար զօր. Ժան Քահուաժի Արսալի ոճրային միջադէպին լոյսին տակ բանակին ուղղեց «Օրուան հրահանգ»-ը, որուն մէջ հաստատեց, որ լիբանանեան բանակը թիրախ դարձնողները պէտք է իմանան, որ եթէ կը կարծեն, թէ բանակին կողմէ ցուցաբերուած իմաստուն վերաբերումը տկար կեցուածք է, ապա անոնք կը սխալին:

Զօր. Քահուաժի ընդգծեց, որ բանակը լուռ պիտի չմնայ եւ ոչ ալ քաղաքական սակարկութեան պիտի դիմէ իր նահատակներուն եւ վիրաւորներուն իրաւունքին գծով: «Մենք պիտի չընդունինք որեւէ պատճառաբանութիւն, որ կը միտի թեթեւցնել ոճիրին անարգ ըլլալուն իրականութիւնը», ըսաւ զօր. Քահուաժի` հաստատելով, որ բանակին դէմ գործուած այդ ոճիրը կանխամտածուած է եւ հեռու է քրիստոնէական ու իսլամական կրօններու բոլոր սկզբունքներէն:

Զօր. Քահուաժի շեշտեց, որ բանակը պիտի շարունակէ հետապնդել յանցագործները եւ անոնց համապատասխան պատիժը տալ, որքան ալ մարդիկ փորձեն պաշտպանել ոճրագործները:

Հանրապետութեան նախագահ Միշէլ Սըլէյման  շեշտեց, որ լիբանանեան բանակին դէմ գործուած յարձակումը լիբանանեան պետութեան դէմ գործուած յարձակումի համազօր է:

Ան բանակի հրամանատարութենէն պահանջեց խիստ վարուիլ բոլոր անոնց հետ, որոնք յանդգնած են բանակին եւ անոր սպաներուն դէմ յարձակիլ, ինչպէս նաեւ պահանջեց հետապնդել յանցագործները եւ զանոնք ներկայացնել դատական իշխանութիւններուն:

 

LEAVE A REPLY

Please enter your comment!
Please enter your name here