ԲԱՆԱԿԸ ԿԸ ՀԵՏԱՊՆԴԷ ԱՐՍԱԼԻ ՈՃԻՐՆԵՐՈՒՆ ՅԱՆՑԱԳՈՐԾՆԵՐԸ

0
158

 Լիբանանեան  բանակը շարունակեց շրջափակուած պահել Արսալը եւ շարունակել իր ներխուժումներն ու ձերբակալութիւնները` հիմնուելով բանակի գաղտնի սպասարկութեան տրամադրած տեղեկութիւններուն վրայ:

Արսալի բնակիչները բանակին դիմաց փակեցին գիւղաքաղաքին ներքին փողոցները, սակայն բանակին անկարգելաւորները ներխուժում մը կատարեցին եւ կրցան ձերբակալել Ապտել Մենեմ Հուժէյրին եւ Խալետ Իզէտտինը, որոնք բանակին կողմէ պահանջուած հիմնական յանցագործներն էին:

Անոնց ձերբակալումը պատճառ դարձաւ, որ Արսալի բնակիչները հրկիզուող անիւներով եւ մինի վաներով փակեն ճամբաները:

Այս բոլորին կողքին, լիբանանեան բանակի հրամանատար զօր. Ժան Քահուաժի վերահաստատեց, որ բանակը Արսալի մէջ իր որդեգրած ապահովական միջոցառումները յետս պիտի չկոչէ` շեշտելով, որ պէտք է բանակին յանձնել անոր ջոկատներէն մէկուն դէմ լարուած թակարդին մեղսակիցները:

Զօր. Քահուաժի ընդգծեց, որ այս հարցը սակարկութեան առարկայ չէ:

Նշենք, որ զօր. Քահուաժի հեռաձայնային հաղորդակցութիւն մը ստացաւ Լիբանանի մէջ Միացեալ Նահանգներու դեսպան Մորա Քոնելլիէն, որ ցաւակցութիւն յայտնեց Արսալի մէջ նահատակուած բանակայիններուն համար:

Քոնելլի բարձր գնահատեց լիբանանեան պետութեան, ապահովութեան ուժերուն եւ բանակի հրամանատարութեան ջանքերը` ծայրայեղականներուն դէմ դնելու առումով:

Մրայժաթի այցելուներէն եղան պաշտպանութեան, ներքին գործոց եւ արդարութեան նախարարներ Ֆայեզ Ղոսըն, Մարուան Շարպել եւ Շաքիպ Քըրթպաուի, ինչպէս նաեւ մեծ թիւով քաղաքական անձնաւորութիւններ եւ բարձրաստիճան զինուորականներ, որոնց շարքին` ներքին ապահովութեան ուժերու ընդհանուր տնօրէն հազարապետ-զօրավար Աշրաֆ Ռիֆի:

Պաշտպանութեան նախարար Ֆայեզ Ղոսըն ցաւակցութիւն յայտնեց հազարապետ Փիեռ Պաշաալանիի ընտանիքին եւ մաղթեց, որ անոր թափած արիւնը յումպէտս հոսած չըլլայ:

Իր կարգին, նախարար Մարուան Շարպել յայտնեց, որ անհրաժեշտ է այս հարցով իմաստուն կերպով վարուիլ` աւելցնելով, որ բանակին դէմ յարձակումին մեղսակիցներուն նկատմամբ ձերբակալման գիրեր հրապարակուած են եւ դատական իշխանութիւնները իրենց պարտականութիւնը լիուլի պիտի կատարեն:

Շարպել յայտնեց, որ ներքին գործոց նախարարութենէն ինչ որ պահանջուի, նախարարութիւնը պատրաստ է կատարելու:

Նախկին վարչապետ Սաատ Հարիրի հեռաձայնային հաղորդակցութիւն մը ունեցաւ Պաշաալանի եւ Զահրաման ընտանիքներուն հետ եւ ցաւակցութիւն յայտնեց անոնց:

Հարիրի կատարեալ զօրակցութիւն յայտնեց ընտանիքներուն` յոյս յայտնելով, որ այս հարցով արդարութիւնը ինքզինք կը պարտադրէ:

Նահատակ Փիեռ Պաշաալանիի հայրը` Ժորժ Պաշաալանի յայտնեց, որ երկրին իշխանութեան պետերուն եւ ապահովական կառոյցներու պատասխանատուներուն կողմէ տրուած խոստումները, թէ իրենք խիստ կերպով պիտի վարուին յանցագործներուն հետ եւ զանոնք պիտի ենթարկեն դատավարութեան, մղած է, որ Մրայժաթ մագլցողական քայլերու չդիմէ: Ան աւելցուց նաեւ, որ ճամբաները փակելու արարքը իրենց սովորութիւններուն մաս չի կազմեր:

Միւս կողմէ, Արսալի մէջ բանակին դէմ կատարուած յարձակումը եւ բանակայիններուն դէմ գործուած ոճիրը խստիւ դատապարտուեցաւ բազմաթիւ քաղաքական անձնաւորութիւններու եւ հոգեւորականներու կողմէ:

 

LEAVE A REPLY

Please enter your comment!
Please enter your name here