ԹՈՒՐՔ ԿԻՆԵՐ ՑՈՅՑ ԿԸ ԿԱՏԱՐԵՆ Ի ՆՊԱՍՏ ՀԱՅ ԿԱՆԱՆՑ

0
167

 Վերջին երկու ամիսներուն, Սամաթիոյ մէջ տարեց հայ կիներու վրայ կատարուած յարձակումները կը շարունակեն մնալ հասարակութեան ուշադրութեան առանցքը, եւ զանազան կազմակերպութիւններ իրենց ձայնը կը բարձրացնեն ու կը դատապարտեն այդ յարձակումները։
Բողոքի ցոյց մը կազմակերպուեցաւ Պոլսոյ Կնոջական շարժումի «Ֆեմինիսթական» խմբաւորման նախաձեռնութեամբ։ Հանրահաւաքը տեղի ունեցաւ Սամաթիոյ մէջ, սպաննուած Մարիձա Քիւչիւքի տան մօտ։ Մօտաւորապէս 200 ցուցարարներ սեւ հագուստներ հագած՝ կը կրէին «Հայ կիները միայնակ չեն», «Ես Եւա եմ», «Ես Մարիձա եմ», «Իմ դրացիիս մի՛ դպչիր», «Ատելութեան յանցանքի օրէնք մը ընդունիլ» եւ նոյնանման վերտառութիւններ։
Հայերէնով ու թրքերէնով ընթերցուեցան մամլոյ հաղորդագրութիւններ ու նշուեցաւ, թէ տարեց հայ կիներու վրայ գործուած յարձակումները պատահական յարձակումներ չեն, այլ՝ հետեւողական դէպքեր։
Յայտարարութեան մէջ քննադատութիւններ կային իրաւապահներու հասցէին. նշուեցաւ, որ յարձակումները գողութեան նպատակ չէին հետապնդեր, այլ կատարուած էին ազգային ենթահողի վրայ։ Դիտել տրուեցաւ նաեւ, որ իրաւապահները տակաւին յստակ որեւէ պարզաբանում չեն տուած յարձակումներուն վերաբերեալ։
Ցուցարարները հնչեցուցին՝ «Կեցցէ՛ կիներու համերաշխութիւնը» կարգախօսը եւ ծաղիկներ զետեղեցին Մարիձա Քիւչիւքի տան առջեւ։ Այնուհետեւ, անոնք անցան յարձակման ենթարկուած միւս հայ կիներու տուներուն մօտէն, մինչ թաղի բնակիչները ծափերով ողջունեցին զանոնք։
Անգամ մը եւս յիշեցնենք, որ Նոյեմբեր 28-ին, Մալաթիոյ բնակիչներէն 87-ամեայ Թուրֆանա Աշըք յարձակումի մը ենթարկուած էր եւ երկու շաբաթ խտացեալ դարմանումի տակ մնալէ ետք՝ կորսնցուցած էր մէկ աչքը։ Նաեւ՝
 84-ամեայ Մարիձա Քիւչիւք Դեկտեմբեր 28-ին սպաննուած էր,՝ եօթը տեղէ դաշունահարուելով իր տան մէջ.
– Յունուար 6-ին, Ս. Ծննդեան տաղաւար տօնին օրը, անծանօթներ փորձած էին առեւանգել տարեց հայ կին մը.
– Յունուար 22-ին, 83-ամեայ Սուլթան Այքար իր տան մօտ յարձակման ենթարկուած էր ու կորսնցուցած իր մէկ աչքը։

 

LEAVE A REPLY

Please enter your comment!
Please enter your name here