ՆԻՒ ԵՈՐՔ ԹԱՅՄԶ Կ’ԱՆԴՐԱԴԱՌՆԱՅ ԱԶԵՐԻՆԵՐՈՒ ԿՈՂՄԷ ՀԱՅԵՐՈՒ ԿՈՏՈՐԱԾՆԵՐՈՒՆ ՄԱՍԻՆ

0
161

«Նիւ Եորք Թայմզ» թերթը եւս անդրադարձած է ատրպէյճանցի գրող Աքրամ Այլիսլիի «Քարէ երազներ» վէպին շուրջ բարձրացած մեծ աղմուկին: Ինչպէս հաղորդած էինք, գիրքին դէմ բողոքի ցոյցեր տեղի կ՛ունենան, որովհետեւ անոր մէջ կը խօսուի հայերու դէմ ատրպէյճանցիներուն կողմէ իրագործուած ջարդերուն մասին:
Թերթը կը գրէ, թէ վէպը երկու ատրպէյճանցիներու մասին է, որոնք հայ-ատրպէյճանական պատերազմի ընթացքին կը փորձեն պաշտպանել իրենց հայազգի դրացիները: «Երկիրը տակաւին հակամարտութեան մէջ է Հայաստանի հետ: Մօտ երկու տասնամեակ առաջ տեղի ունեցած պատերազմին աւարտէն ետք եւս, Ատրպէյճան կը ձգտի վերականգնելու իր տիրապետութիւնը գերազանցապէս հայերով բնակեցուած Լեռնային Ղարաբաղի վրայ, եւ ապահովելու այնտեղէն հեռացած ատրպէյճանցիներուն վերադարձը», կը գրէ թերթը:
Գիրքին դէմ բողոք կատարուած է նաեւ Ատրպէյճանի խորհրդարանին մէջ, ուր երեսփոխան Մելահետ Իպրահիմքիզի յայտարարած է, որ գիրքը «վիրաւորական է ոչ միայն ատրպէյճանցիներուն, այլ նաեւ ամբողջ թուրք ազգին համար»:
«Հայերը ինծի թշնամի չեն: Ես 21-րդ դարու գրող եմ: Լեռնային Ղարաբաղի հակամարտութեան խնդիրի լուծումը անընդհատ կը յետաձգուի, իսկ երկու ժողովուրդներուն միջեւ թշնամանքը կ՛աճի: Ես կը փափաքիմ աջակցիլ հարցի խաղաղ կարգաւորման: Ես վիրաւորական ոչինչ գրած եմ, չեմ դաւաճանած երկիրիս: Պարզապէս ներկայացուցած եմ, թէ ատրպէյճանցին ինչպէ՛ս կ՛օգնէ հայուն: Ի՞նչ գէշ բան կայ ասոր մէջ», ըսած է հեղինակը, «Նիւ Եորք Թայմզ»ի հետ հարցազրոյցի մը ընթացքին:
Միւս կողմէ, ատրպէյճանցի երիտասարդ գրողները բողոքի ցոյց մը կազմակերպած են, ի պաշտպանութիւն Ատրպէյճանի մէջ հայկական ջարդերուն մասին գիրքի հեղինակին: Անոնք բողոքած են խորհրդարանէն ներս Այլիսլիի հասցէին հնչած կտրուկ յայտարարութիւններուն դէմ: Ցուցարարներէն մէկը ըսած է. «Սահմանադրութիւնը կ՛երաշխաւորէ ոեւէ մարդու ազատ արտայայտուելու իրաւունքը: Ոչ ոք իրաւունք ունի սպառնալու իր հայրենակիցին»:
Այլիսլի «Թուրան» լրատուական գործակալութեան հետ զրոյցի մը ընթացքին, իրեն դէմ արտայայտուած պատգամաւորներուն, որոնք պնդած էին, թէ նման հատորներ վնաս կը հասցնեն Պաքուի վարած քաղաքականութեան, հեգնանքով ըսած է. «Այդ ի՞նչ քաղաքականութիւն է, որ կրնայ կասկածի տակ դրուիլ՝ մէկ գրողի գեղարուեստական ստեղծագործութեան պատճառով»:

LEAVE A REPLY

Please enter your comment!
Please enter your name here