ԱՄԵՆԱՄԵԾ ՀԱՅՐԵՆԱՍԻՐՈՒԹԻՒՆԸ ՀԱՅԱՍՏԱՆԻ ՄԻՋԱԶԳԱՅԻՆ ՀԵՂԻՆԱԿՈՒԹԻՒՆԸ ԱՄՐԱՊՆԴԵԼՆ Է . ԱՐԵԳ ՄԻՔԱՅԷԼԵԱՆ

0
109

«Ի տարբերութիւն ներքին վիճակի, Բիւրականի աստղադիտարանի  արտաքին վիճակը աւելի լաւ է։ Հայաստանի միջազգային վարկանիշը ամենամեծ հարստութիւնն է, որ կրնանք ունենալ ի տարբերութիւն տնտեսութեան, ուր խաղի կանոններ չենք կրնար թելադրել։ Ամենամեծ հայրենասիրութիւնը Հայաստանի միջազգային հեղինակութիւնը ամրապնդելն է»,- այսօր լրագրողներու հետ հանդիպման ժամանակ խօսելով Հայաստանի` Տիեզերքի Խաղաղ Օգտագործման Յանձնաժողովի (COPUOS) անդամ դառնալու մասին, յայտնեց  Հայկական վիրտուալ աստղադիտարանի տնօրէն, աստղագէտ  Արեգ Միքայէլեանը։

Աստղագէտի խօսքերով,  19 Դեկտեմբերին տեղի ունեցած է ՄԱԿ-ի Գլխաւոր Խորհուրդի  լիագումար նիստը, որուն ընթացքին  ընդունուած է  բանաձեւ, համաձայն որուն, Հայաստանը ընտրուած է  Տիեզերքի Խաղաղ Օգտագործման Յանձնաժողովի (United Nations Committee on the Peaceful Uses of Outer Space, COPUOS) անդամ:

«Այստեղ կրնանք տեսնել եւ’ տնտեսական եւ’ քաղաքական շահը: Սա դիւանագիտութեան  արդիւնքն է»,-նշեց  աստղագէտը։

Դառնալով COPUOS-ի  անդամ, Հայաստան պիտի միանայ տիեզերքի խաղաղ օգտագործման ոլորտին վերաբերող հինգ հիմնական միջազգային պայմանագրերուն՝ «Տիեզերքի պայմանագիրը», ըստ որուն պետութիւնները կը պարտաւորուին տիեզերքը օգտագործել խաղաղ նպատակներով, նոյնպէս՝ Լուսնի եւ  տիեզերական այլ մարմիններու հետ կապուած հարցերով,  «Փրկութեան համաձայնագիրը», ըստ որուն պետութիւնները կը պարտաւորուին համագործակցիլ տիեզերագնացներու փրկութեան եւ վերադարձի և տիեզերական տարածութիւն արձակուած սարքերու վերադարձի հարցերով, «Պատասխանատուութեան Ուխտը», ըստ որուն կը  կարգաւորուի տիեզերական սարքերու կողմէ հասցուած վնասներով պայմանաւորուած պատասխանատուութիւնը,  « Արձանագրութեան Ուխտը», ուր կ’արձանագրուին տիեզերք արձակուած սարքերը եւ «Լուսնի Համաձայնագիրը», որոնք կը կարգաւորեն  Լուսնի և տիեզերական այլ մարմիններու  վրայ պետութիւններու գործունէութիւնը: Բացի այդ, յետ այսու, Հայաստանի ներկայացուցիչը կը մասնակցի COPUOS-ի եւ անոր  արհեստագիտական եւ իրաւաբանական ենթայանձ նաժողովներու  տարեկան նիստերուն: 

Հայաստան անդամագրուած  է նաեւ Եւրոպական աստղագիտական ընկերութեան.  «Պարտադիր չէ, որ աստղագէտը ունենայ խոշոր դիտակ, կրնայ  օգտուիլ այլ երկիրներու դիտակներէն՝ շնորհիւ վիրտուալ աստղադիտարանի և կատարել իր գիտական աշխատանքները»,- ըսաւ բանախօսը` նշելով, որ Հայաստան  ամենահեռաւոր երկիրն է, մեծամասնութիւնը՝ եւրոպական երկիրներ են, չկան Վրաստանը եւ  Ատրպէյճանը։

 Ի դէպ, Ատրպէյճան փորձած է խոչընդոտել Հայաստանի` Տիեզերքի Խաղաղ Օգտագործման Յանձնաժողովի  անդամակցութեան, պատճառաբանելով, որ ան պատերազմող երկիր է։

Անի Կարապետեան

LEAVE A REPLY

Please enter your comment!
Please enter your name here