ՊԸՐՐԻ Կ’ԱՌԱՋԱՐԿԷ ԿԱՌԱՎԱՐՈՒԹԵԱՆ ՆԵՐԿԱՅԱՑՈՒՑԱԾ ԸՆՏՐԱԿԱՆ ՕՐԻՆԱԳԻԾԸ

0
133

Խորհրդարանի նախագահ  Նեպիհ Պըրրի  առաջարկեց ընդառաջել կառավարութեան  ներկայացուցած  ընտրական օրինագիծին:  Կառավարութիւնը կ’առաջադրէ  Լիբանանը  13  ընտրամասերու բաժնելով   համեմատական դրութեամբ օրինագիծ մը:

Ընտրական օրէնքը քննարկող խորհրդարանական ենթայանձնախումբը երէկ կէսօրէ առաջ գումարեց իր ընթացիկ նիստը` նախագահութեամբ երեսփոխան Ռոպեր Ղանեմի:

«Նիստին ընթացքին տիրեց դրական մթնոլորտ», յայտնեց Ղանեմ, որ աւելցուց, թէ ենթայանձնախումբին մաս կազմող իւրաքանչիւր երեսփոխան դրական կերպով կը մօտենայ իր ստանձնած աշխատանքին եւ կատարած քննարկումներուն:

Ենթայանձնախումբը կը փնտռէ հասարակ յայտարարներ եւ ենթահող մը կամ փոքր պատուհան մը` լիբանանցիներուն միջեւ երկփեղկում յառաջացնող այս պատին վրայ:

Նշենք նաեւ, որ նախքան նիստին գումարումը, Փոփոխութիւն եւ Բարեկարգում համախմբումի երեսփոխան Ալէն Աուն խորհրդարանին մէջ տրուած մամլոյ ասուլիսի մը ընթացքին շեշտեց, որ Մուսթաքպալ հոսանքին կողմէ ներկայացուած ընտրական օրինագիծը երեսփոխան Ուալիտ Ճոմպլաթը հմայող օրինագիծ մըն է, որպէսզի ան Մուսթաքպալ հոսանքի ընտրական դաշնակիցին վերածուի:

Աուն աւելցուց, որ Մուսթաքպալ հոսանքի օրինագիծը Պէյրութի մէջ լիբանանահայութեան ներկայացուցչութեան առումով դարձեալ մշակուած է 2000-ի ընտրական օրէնքին ոճով եւ մտայնութեամբ:

«Հետեւաբար, այդ օրինագիծը թիրախ կը դարձնէ լիբանանահայութիւնը», ըսաւ Աուն:

Աունի կատարած յայտարարութիւնը խորհրդարանին մէջ յառաջացուց բանավէճ մը, յատկապէս լիբանանահայութեան վերաբերող բաժինին առումով:

Աունին իբրեւ պատասխան, Մուսթաքպալ հոսանքի երեսփոխան Ահմէտ Ֆաթֆաթ շեշտեց, որ Աունի կատարած յայտարարութիւնները` լիբանանահայութիւնը թիրախ դարձնելու մասին, անճիշդ են` հաստատելով, որ Մուսթաքպալ հոսանքը անդրադարձած է քրիստոնեայ համայնքին ճշգրիտ ներկայացուցչութեան հարցին եւ այդ պատճառով ալ Պէյրութը բաժնած է չորս ընտրաշրջաններու` անոնցմէ երկուքին մէջ քրիստոնէական մեծամասնութիւն ներառելով:

  Լիբանանեան կառավարութիւնը այսօր պիտի  գումարէ  նիստ  մը:

 

LEAVE A REPLY

Please enter your comment!
Please enter your name here