ՊՈԼՍՈՅ ՄԷՋ ՍՊԱՆՆՈՒԱԾ ԱՄԵՐԻԿԱՑԻԻՆ ԴԻԱԿԸ ՀԱՅԿԱԿԱՆ ԵԿԵՂԵՑԻ ՄԸ ԿԸ ՓՈԽԱԴՐԵՆ

0
182

Ամերիկացի լուսանկարչուհի Սառա Սիեռայի առեղծուածային մահուան լուրը կը շարունակէ մնալ թրքական ու միջազգային լրատուամիջոցներու ուշադրութեան կեդրոնը։

 «Սի.Էն.Էն.»ի «Էյ.Պի.Սի.»ի, «Ֆաքս»ի եւ «Սի.Պի.Էս.»ի նման կայաններ, քանի մը օրէ ի վեր ուղղակի սփռումներով հաղորդումներ կը կատարեն Պոլսոյ Սարայպուռնուի պարիսպներուն մօտ, ուր գտնուած էր Սիեռայի անշունչ մարմինը։ Տեղական թերթերն ու կայանները օրերէ ի վեր հասարակութեան ուշադրութեան կիզակէտին վրայ կը պահեն այս նիւթը ու կը հրատարակեն զանազան մեկնաբանութիւններ։
Մինչ Պոլիս ժամանած Սառայի ամուսինն ու եղբայրը քաղաք կը մնան փաստաթղթային հարցերը կարգաւորելու եւ դատական համապատասխան հետաքննութեանց համար, միւս կողմէ՝ տարաբախտ լուսանկարչուհիի մայրն ու հայրը Ամերիկայէն յայտնեցին, թէ իրենց դուստրը կը հիանար Թուրքիոյ ճարտարապետական հարուստ ժառանգութեան վրայ, ուստի պատմական յուշարձաններ տեսնելու եւ զանոնք լուսանկարելու համար Թուրքիա այցելած էր։
Տեղական կարգ մը թերթեր կը գրեն, թէ Սառա սիրողական լուսանկարչութեամբ կը զբաղէր եւ լուսանկարները կը տեղադրէր «Ինսթակրամ» ցանցին վրայ, որուն միջոցաւ ստացուած հրաւէրով է, որ Սառա Նիւ Եորքէն Պոլիս եկած էր, սակայն այս արկածախնդրութիւնը տխուր վերջաբան մը ունեցած էր 33ամեայ լուսանկարչուհիին համար։ Նախնական տուեալներու համաձայն՝ Սառա սպաննուած է Յունուար 21-ին, սակայն դիակը գտնուած է Փետրուար 1-ին։
Երկուշաբթի, Փետրուար 4-ի կէսօրուան ժամերուն, Սառայի ամուսինն ու եղբայրը դատական հետաքննութեանց կեդրոնէն Սառայի դիակը փոխադրած են Պէյօղլուի Ս. Երրորդութիւն հայկական եկեղեցւոյ դիարանը։ Նոյն ժամերուն ամերիկացի թղթակիցներ եւ լրագրողներ փութացած են հայոց եկեղեցի ու այնտեղէն հաղորդումներ կատարած։ Երեքշաբթի առաւօտուն, մեծաթիւ օտար լրագրողներ տակաւին եկեղեցւոյ շրջափակը կը գտնուէին ու կը սպասէին, որ յուղարկաւորութեան կազմակերպիչը յայտարարութիւններ ընէր։ Ամերիկացի լրագրողներուն նախ ըսուած է, թէ արարողութիւն մը պիտի կատարուի նոյն եկեղեցւոյ մէջ, սակայն աւելի ուշ տեղեկացուած են, թէ որեւէ արարողութիւն պիտի չկատարուի եւ երբ իրաւապահ մարմինները արտօնութիւն տան՝ Սառայի մարմինը օդանաւով պիտի փոխադրուի Նիւ Եորք։
Պոլսոյ հանրապետական դատախազութեան համաձայն՝ արդէն 21 կասկածեալներ ձերբակալուած են այս սպանութեան հարցով:

 

LEAVE A REPLY

Please enter your comment!
Please enter your name here