ԵԱՀԿ-Ի ՄԻՆՍՔԻ ՆԱԽԱԳԱՀԸ ՀԱՆԴԻՊՈՒՄՆԵՐ Կ’ՈՒՆԵՆԱՅ

0
149

ԵԱՀԿ-ի գործող նախագահ, Ուքրանիոյ արտաքին գործոց նախարար Լէոնիտ Քոժարա Չորեքշաբթի, Փետրուար 6-ին հանդիպում մը ունեցած է ԵԱՀԿ Մինսքի խմբակի համանախագահներ Իկոր Փոփովի (Ռուսիա), Ժագ Ֆորի (Ֆրանսա) եւ Իան Քելիի (Ամերիկա) հետ, ինչպէս նաեւ ԵԱՀԿ-ի գործող նախագահի անձնական ներկայացուցիչ, դեսպան Անճէյ Քասփըրչիքի հետ:
Այս մասին հրապարակուած ԵԱՀԿի հաղորդագրութեան մէջ կ՛ըսուի, թէ զրոյցին ընթացքին քննարկուած են Հայաստանի եւ Ատրպէյճանի արտաքին գործոց նախարարներու հետ Մինսկի խմբակի համանախագահներու՝ Փարիզի մէջ անցեալ շաբաթ տեղի ունեցած հանդիպման արդիւնքները: Փարիզեան հանդիպման ընթացքին քննութեան ենթարկուած էր գործընթացը խաղաղ առաջ տանելու ուղղութեամբ միջնորդներուն ներկայացուցած առաջարկները, ինչպէս նաեւ վստահութիւնն ամրապնդելու միջոցները:
ԵԱՀԿ-ի գործող նախագահը ամբողջական զօրակցութիւն յայտնած է ԵԱՀԿ Մինսքի խմբակի համանախագահներու ջանքերուն, որոնք ուղղուած են հրադադարը ամրապնդելու ու ղարաբաղեան հակամարտութեան խաղաղ կարգաւորման բանակցութիւններուն մէջ հակամարտող կողմերուն օգնելու:
«Ես կողմերուն կոչ կ՛ընեմ անհրաժեշտ նուիրուածութիւն եւ քաղաքական կամք ցուցաբերելու, որպէսզի վերջապէս խաղաղութիւն հաստատուի այդ տարածաշրջանին մէջ», ըսած է ԵԱՀԿ-ի նախագահ Քոժարան:

 

LEAVE A REPLY

Please enter your comment!
Please enter your name here