ԲԱԽՈՒՄՆԵՐ ԴԱՄԱՍԿՈՍԻ ԾԱՅՐԱՄԱՍԵՐՈՒՆ ՄԷՋ

0
114

Սուրիոյ պետական եւ ընդդիմութեան մօտիկ աղբիւրներ հաղորդեցին, թէ Հինգշաբթի, Փետրուար 7-ին,  շարունակուած են մէկ օր առաջ Դամասկոսի ծայրամասերու զանազան շրջաններուն մէջ սկսած բուռն բախումները, որոնք համեմատաբար մեղմացած են Հինգշաբթի երեկոյեան:
Պետական պաշտօնակատար մը հաղորդեց, թէ բանակը կրցած է իր հակակշիռին տակ առնել միջազգային օդակայանի մօտակայ երկու շրջաններ, որոնք ժամանակ մը ընդդիմութեան կողմէ գրաւուած էին, իսկ բախումներուն ընթացքին սպաննուած են 268 ահաբեկիչներ:
Ընդդիմութեան աղբիւրներուն համաձայն՝ Հինգշաբթի օրուան բախումներուն ընթացքին սպաննուած է 19 քաղաքային, 28 ընդդիմադիր զինեալ եւ 8 զինուոր, իսկ Չորեքշաբթի օր՝ 66 զինեալ, 39 զինուոր եւ 36 քաղաքային:
Միւս կողմէ, Գահիրէի մէջ հաւաքուած իսլամական երկիրներու ղեկավարները կոչ ըրին Սուրիոյ ընդդիմութեան եւ կառավարութեան, որ երկխօսութեան ճամբով լուծում մը գտնեն այս տագնապին, իսկ ՄԱԿ-ի մօտ Սուրիոյ դեսպան Պաշշար Ճաաֆարի յայտարարեց, թէ իրականութեան չեն համապատասխաներ այն տեղեկութիւնները, թէ Սուրիոյ վրայ կատարուած իսրայէլեան յարձակումին թիրախներէն մէկը դէպի Լիբանան զէնքեր փոխադրող ինքնաշարժներու շարասիւն մըն էր:
Իր կարգին, Ռուսիոյ արտաքին գործոց փոխնախարար Կենատի Կաթիլով Հռոմի մէջ յայտարարեց, թէ Սուրիոյ տագնապը «պիտի սկսի լուծուելու, եթէ ընդդիմութիւնը որոշէ կառավարութեան հետ երկխօսութիւն կատարել»: Ան աւելցուց. «Եթէ ընդդիմութեան ղեկավար Խաթիպը գիտակցի, որ տագնապէն դուրս գալու համար քաղաքական լուծումն ու կառավարութեան հետ երկխօսութիւնը այլընտրանք չունին, ապա լուծումը տեղաշարժ պիտի արձանագրէ»: Կաթիլով նաեւ յոյս յայտնեց, որ Ճան Քերին արտաքին գործոց նախարար նշանակելու որոշումին շնորհիւ, սուրիական տագնապին նկատմամբ ամերիկեան կեցուածքին մէջ փոփոխութիւն կ՛արձանագրուի:
Մինչ այդ, Թուրքիոյ պաշտպանութեան նախարար Իսմեթ Եըլմազ յայտարարեց, թէ Թուրքիոյ պահանջով ՆԱԹՕ-ի կողմէ Թուրքիա-Սուրիա սահմանին վրայ «Փեթրիոթ» հակահրթիռային համակարգերու տեղակայումը աւարտած է՝ յիշեցնելով, որ անոնք զուտ պաշտպանական նպատակներ ունին: «Սուրիայէն որեւէ սպառնալիքի պարագային, համակարգիչը պիտի ընտրէ, թէ ո՛ր մարտկոցի աշխատանքը այդ պարագային աւելի արդիւնաւէտ պիտի ըլլայ, եւ 9 վայրկեանուան ընթացքին՝ հրթիռը պիտի արձակուի: «Փեթրիոթ»ները կրնան օգտագործուիլ թէ՛ օդանաւերու եւ թէ հրթիռներու դէմ», ըսաւ նախարարը:

LEAVE A REPLY

Please enter your comment!
Please enter your name here