ԵՐԲ ՈՒՐԱՑՈՂԸ ՀԱՅՑ ԿԸ ԲԱՐՁՐԱՑՆԷ ԻՐԱՒԱՏԷՐԻՆ ԴԷՄ…

0
145

Ծագումով թուրք՝  Սիրմա  Օրան անգամ  մը  եւս  ապացուցեց  Հայոց Ցեղասպանութիւնը ժխտելու իր  հասցէին  հնչող  մեղադրանքը, երբ   դատական հայց   բարձրացուց   Հայոց Ցեղասպանութեան ճանաչման  ջատագով «Ֆրանս-Արմենի» պարբերաթերթի նախկին խմբագիր, 2002-էն 2009-ի միջեւ   Եւրոպայի Հայ Դատի Գրասենեակի   տնօրէն, «Արդարութեան եւ ժողովրդավարութեան  Եւրո-Հայկական Դաշնութեան» նախկին վարիչ տնօրէն    Լորան  Լէյլէկեանի դէմ:  Առաջինը՝ երեք տարի առաջ, երբ Լիոնի շրջակայքի Վիլէորպան  քաղաքի  քաղաքապետ  Ժան Փօլ Պրեթի դէմ էր, երբ քաղաքապետը  զինք իր ընտրացանկին մէջ  ընդգրկելու համար  նախապայման դրած էր, որ  Օրան ճանչնար Հայոց դէմ  գործուած Ցեղասպանութիւնը:

  Սիրամ  Օրան անշուշտ կորսնցուց այդ դատը, որմէ ետք՝   դատը վերանայելու   իրաւունքը :

Լորան  Լէյլէկեան կրկին անգամ  կը  մեղադրուի,  իր մէկ  խմբագրականին  մէջ, Օրանը դարձեալ   Հայոց Ցեղասպանութիւնը ուրացող  որակելու   յանցանքով:

 Դատավարութեան նիստը տեղի ունեցաւ 24  Յունուար  2013-ին, որուն ներկայ  գտնուեցան   Հիլտա  Չոպոյեան, պատմաբան Իվ Թերնոն եւ  Ֆրանսայի Ազգային  Ժողովի  պատգամաւոր՝  Ֆրանսուա Ռոշըլուանը: Իրենց ելոյթներուն  ընթացքին վերոյիշեալ անձնաւորութիւնները  պաշտպանեցին  Լորան Լէյլէկեանի արտայայտած տեսակէտները:

 Դատավարութիւնը  կատարեալ  խայտառակութիւն մը  եղաւ  Սիրմա Օրանի համար:  Դատավարութեան ընթացքին խօսք առնելով, Լէյլէկեան յայտնեց, թէ  Հայոց դէմ գործուած ցեղասպանութիւնը  ուրացողները կը  փորձեն հակամարտութիւնը  քաղաքական  բեմէն  իրաւական  հարթակի վրայ  փոխադրել:  Իր   հաստատումը աւելի  հիմնաւորելու նպատակով,   Լէյլեքեան դիմեց  Ֆրանսայի  Ազգային  Ժողովի անդամ, պատգամաւոր  Ֆրանսուա  Ռոշըլուանին,    Ցեղասպանութեան ուրացութեան դէմ  պայքարող,   հանրածանօթ անձնաւորութիւն՝ Իվ Թերնոնին եւ «Արդարութեան եւ  Ժողովրդավարութեան   Եւրո-Հայկական Դաշնութեան »  նախկին նախագահ Հիլտա Չոպոյեանին, ինչպէս նաեւ   ծանօթ  քաղաքական դէմքերու   վկայութիւններուն:

  Դատավարութեան ընթացքին Օրան   խուսափեցաւ յստակ պատասխանելու  Հայոց Ցեղասպանութեան  իրողութեան: Ան միաժամանակ չկրցաւ   համոզիչ   պատասխան  տալ Գորշ  Գայլերու    կազմակերպութեամբ , Ֆրանսայի մէջ  2006-ին, Հայոց Ցեղասպանութեան յիշատակին  Լիոնի Յուշարձանին  կառուցման դէմ  բողոքի հաւաքին իր մասնակցութեան պատճառներուն:

 Ատեանը  28 Փետրուարին պիտի արձակէ իր վճիռը:

LEAVE A REPLY

Please enter your comment!
Please enter your name here