ԹՐՔԱՀԱՅԵՐՈՒ ՆԿԱՏՄԱՄԲ ՎԱՅՐԱԳՈՒԹԻՒՆՆԵՐԸ ԴԱՏԱՊԱՐՏՈՂ ԱՐՇԱՒ ԵՐԵՒԱՆԻ ՄԷՋ

0
116

 Երեւանի մէջ տեղի պիտի ունենայ Թուրքիոյ մէջ ապրող հայերուն նկատմամբ գործադրուող խտրական քաղաքականութիւնը դատապարտող բողոքի արշաւ:
Այս մասին յայտարարութիւն հրապարակած է «Երիտասարդ դիւանագէտների Ակումբ» հասարակական կազմակերպութիւնը՝ նշելով.
««Երիտասարդ Դիւանագէտների Ակումբ» հասարակական կազմակերպութիւնը դատապարտում է Իսթանպուլի Սամաթիա թաղամասում հայազգի կանանց նկատմամբ շարունակաբար իրականացուող յարձակումներն ու բռնութիւնները եւ խստօրէն պահանջում Թուրքիայի իշխանութիւններից՝ ապահովել իրենց քաղաքացիների անվտանգութիւնը, հետամուտ լինել վերոնշեալ յանցագործութիւնները բացայայտելու եւ մեղաւորներին պատասխանատուութեան ենթարկելու գործում: Նման վայրագութիւնները յատկապէս սրում են իրավիճակը Ցեղասպանութեան 98-ամեակին ընդառաջ:
«Թուրքական իշխանութիւնների լռութիւնը եւ կրաւորական կեցուածքը պարարտ հող են ստեղծել այդ երկրում ատելութեան, անհանդուրժողականութեան ու ազգայնական տրամադրութիւնների աճի եւ հայութեան շրջանում վախի մթնոլորտի ձեւաւորման համար:
«Կոչ ենք անում ՄԱԿ-ին, ԵՄ-ին, ԵԽ-ին եւ միւս բոլոր միջազգային կազմակերպութիւններին ու իրաւապաշտպան կառոյցներին՝ համարժէքօրէն արձագանգել թուրքական իշխանութիւնների անգործութեանը եւ համապատասխան միջոցներ ձեռնարկել այդ երկրում ազգայնական հողի վրայ հետապնդումների ենթարկուող անձանց պաշտպանութեան հարցում:
«Կոչ ենք անում Հայաստանում գործող հասարակական կազմակերպութիւններին, երիտասարդական կառոյցներին, անհատներին միանալ Իսթանպուլի միջադէպերը եւ ընդհանրապէս Թուրքիայում՝ մեր հայրենակիցների նկատմամբ իրականացուող խտրական քաղաքականութիւնը դատապարտող բողոքի երթին, որի ընթացքում բաց նամակ կը յանձնուեն միջազգային կառոյցների ներկայացուցիչներին:
«Երթը տեղի կ՛ունենայ  Երկուշաբթի, 11 Փետրուարի կէսօրուան  ժամը 12-ին, Հանրապետութեան Հրապարակում: Երթուղին՝ Հանրապետութեան հրապարակ, ՄԱԿ-ի գրասենեակ, ԵՄ գրասենեակ»։

 

LEAVE A REPLY

Please enter your comment!
Please enter your name here