ՍԱԼԵՀԻ ԵՒ ԼԱՒՐՈՎ ՍՈՒՐԻՈՅ ԻՐԱՎԻՃԱԿԸ ՔՆՆԱՐԿԵՑԻՆ ՄՈՍԿՈՒԱՅԻ ՄԷՋ

0
152

Ռուս-իրանական  առեւտրական համագործակցութեան խորհրդաժողովի ծիրին մէջ, Ռուսիոյ արտաքին գործոց նախարար  Սերկէյ Լաւրով  իր իրանցի պաշտօնակիցին  Ալի Աքպար Սալեհի հետ քննարկեց  Սուրիոյ իրավիճակը: Կողմերը  ողջունեցին  առանց նախապայմաններու երկխօսութիւն վարելու  սուրիական իշխանութիւններու առաջարկը:   Երկու նախարարները  միաժամանակ  իրենց  զօրակցութիւնը յայտնեցին  հակամարտութիւնը  երկխօսութեան  ճամբով լուծելու Ժընեւի խորհրդաժողովէն բխած որոշումներուն:

Փարիզի մէջ,   Ֆրանսայի արտաքին գործոց նախարար Լորան Ֆապիւս դիտել տուաւ, որ   Ռուսիոյ եւ Սուրիոյ ընդդիմութեան միջեւ  բանակցութիւնները արժանի են  յաւելեալ զօրակցութեան:« Սա այն ուղին է, որուն անհրաժեշտ է զօրակցիլ, այլապէս  կրնայ պառակտիլ Սուրիան եւ ծանր հետեւանքներ ունենալ  Յորդանանի, Իրաքի, Թուրքիոյ եւ Իսրայէլի վրայ».զգուշացուց Ֆապիւս:

  Սուրիոյ  ընդդիմութեան  ղեկավար Մոազ Խաթիպ, Գահիրէի մէջ հանդիպում մը ունեցաւ Սուրիոյ հարցով ՄԱԿ-ի եւ Արաբական  Լիկայի յատուկ  յանձնակատար  Լախտար Իպրահիմիի հետ:  Յիշեցնենք, որ  Յունուարի վերջաւորութեան,  Միւնիխի մէջ  Իրանի արտաքին  գործոց նախարար Ալի Աքպար Սալեհիի  հետ  հանդիպման  ընթացքին Խաթիպ՝ Գահիրէի,  Թունուզի  եւ Իսթանպուլի մէջ  Սուրիոյ  կառավարութեան անդամներուն հետ  բանակցութիւններ սկսելու ցանկութիւն յայտնեց:  Իպրահիմի սոյն   նախաձեռնութիւնը  գնահատեց «դրական»:  Սակայն քանի մը օր ետք,   ընդդիմութիւնը յայտարարեց, թէ  անհնար է բանակցութիւն վարել նախագահ Պաշար Ասատի վարչակարգին հետ:  Այս  մագլցումին լոյսին տակ, Սուրիոյ  փոխարտաքին գործոց նախարար Ֆէյսալ  Միքտատ, իր  կարգին, յայտարարեց, թէ   Դամասկոս կը մերժէ բանակցութիւնները սկսելու համար  ընդդիմութեան պայմանները:

Բրիտանական  մամուլին համաձայն, քուլիսներու ետին  կը մշակուի  երկխօսութեան նոր  նախաձեռնութիւն մը, ըստ որուն  յառաջիկայ  օրերուն ընթացքին պիտի կազմուի  Սուրիոյ մէջ  խորհրդարանական եւ նախագահական  ընտրութիւնները  կազմակերպելու   լիազօրուած ընդդիմութիւնը եւ իշխանութիւնը ներկայացնող կառավարութիւն մը:

«Ուաշինկթըն Փոսթ» օրաթերթին տուած հարցազրոյցին մէջ,  Իսրայէլի ռազմական  հետախուզութեան  ղեկավար  Ամոս  Եատլին յայտարարեց, թէ  Իսրայէլ պիտի շարունակէ հարուածել Սուրիան:

Ռազմական գետնի   վրայ, իշխանութեա ն  եւ ընդդիմութեան  ուժերու միջեւ թէժ  բախումներ տեղի կ’ունենան Դամասկոսի  մօտակայքը գտնուող  շրջաններու մէջ:

LEAVE A REPLY

Please enter your comment!
Please enter your name here