ԱՔՐԱՄ ԱՅԼԻՍԼԻԻ ԱԿԱՆՋԸ ԿՏՐՈՂԻՆ ՄԵԾ ՊԱՐԳԵՒ

0
150

 Ատրպէյճանի «Ժամանակակից Մուսաւաթ» կուսակցութեան առաջնորդ Հաֆիզ Հաճիեւ յայտարարած է, որ իր ղեկավարած կուսակցութիւնը որոշած է հայկական ջարդերու մասին «Քարէ Երազներ» հատորի հեղինակ Աքրամ Այլիսլիի ականջը կտրողը պարգեւատրել 10 հազար մանաթով. այս մասին կը գրէ «Թուրան»ը:
«Այդ վէպով, ան վիրաւորած է ատրպէյճանցիները՝ զանոնք ներկայացնելով իբրեւ վայրենիներ: Այդ պատճառով, որոշեցինք, թէ Այլիսլիի նկատմամբ ընդունուած միւս բոլոր պատիժները բաւարար չեն, եւ անհրաժեշտ է կտրել անոր ականջը: Այդ որոշման իրագործումը յանձնարարուած է կուսակցութեան երիտասարդական թեւի անդամներուն: Որոշումը բեկանման ենթակայ չէ, եւ պէտք է իրագործուի», յայտարարած է «քաղաքակիրթ» ղեկավարը:
Կարգ մը իրաւաբաններու գնահատականով, նման կոչի մը համար Հաֆիզ Հաճիեւ պէտք է  բանտարկութեան դատապարտուի, ըստ Ատրպէյճանի սահմանադրութեան, սակայն ցարդ անոր դէմ իրաւապահ մարմինները ոչ մէկ քայլ որդեգրած են:
«Անոնք, որոնք ազատութիւն կու տան Հաֆիզ Հաճիեւի նմաններուն, կը խորտակեն ատրպէյճանցիներու բարոյականութիւնը», «Թուրան»ի հետ զրոյցի մը ընթացքին ըսած է Աքրամ Այլիսլի՝ աւելցնելով. «Սովորական երկիրներու մէջ իրաւապահ մարմինները պատասխանատուութեան պիտի ենթարկէին նման յայտարարութեամբ հանդէս եկողները: Եթէ իրաւապահ մարմինները գործնական քայլերու չդիմեն, ապա ես ստիպուած պիտի ըլլամ ընտանիքով հեռանալու երկիրէն»:

Ատրպէյճանի երկրորդ քաղաքին՝ Կենճայի (Գանձակ) կեդրոնական հրապարակին վրայ, քաղաքի «մտաւորականութիւնը» այրած է Ատրպէյճանի մէջ հայկական ջարդերու մասին պատմող «Քարէ Երազներ» վէպի հեղինակ Աքրամ Այլիսլիի գիրքերէն օրինակներ: Քաղաքի պետական համալսարանի դասախօսներէն Հասանպալա Սալիմով յայտարարած է, թէ գրողը «վիրաւորած է ատրպէյճանցիները, եւ հայերը ներկայացուցած է իբրեւ աշխարհի ամենալաւ ժողովուրդը»:

LEAVE A REPLY

Please enter your comment!
Please enter your name here