ՀԱՅՈՑ ԴԷՄ ԳՈՐԾՈՒԱԾ ՑԵՂԱՍՊԱՆՈՒԹԻՒՆԸ ՔՐԷԱԿԱՆԱՑՆՈՂ ՆՈՐ ՕՐԻՆԱԳԻԾ ՖՐԱՆՍԱՅԻ ԽՈՐՀՐԴԱՐԱՆԻՆ ՄԷՋ

0
154

 Ֆրանսայի խորհրդարանին ներկայացուեցաւ  Հայոց դէմ գործուած Ցեղասպանութեան ուրացումը քրէականացնող նոր օրէնքի մը նախագիծը, որուն հեղինակը դարձեալ երեսփոխան Վալերի Պուայէն է:
Ըստ «Նուվել տ՛Արմէնի»ին՝ հայազգի փաստաբան Ֆիլիփ Գրիգորեանի կողմէ հաղորդուած տեղեկութեան համաձայն, նախագիծը հիմնուած է Եւրոպայի խորհրդարանին կողմէ վաւերացուած «Ցեղասպանութեան եւ պատերազմական յանցագործութիւններու ուրացման քրէականացում» յօդուածին վրայ: Նոր նախագիծով՝ Հայկական Ցեղասպանութիւնը ուրացողը երկու տարուան բանտարկութեան կամ 45,000 եուրօ տուգանքի պիտի դատապարտուի:
Պուայէի եւ Գրիգորեանի համատեղ հեղինակած Ցեղասպանութեան ուրացման քրէականացման մասին նախորդ օրինագիծը վաւերացուած էր Ֆրանսայի խորհրդարանին եւ Ծերակոյտին կողմէ, սակայն հանրապետութեան նախագահին կողմէ ստորագրուելէ առաջ՝ հակասահմանադրական նկատուած էր երկրի Սահմանադրական խորհուրդին կողմէ: Նախորդ օրինագիծով սահմանուած պատիժը մէկ տարուան բանտարկութիւն կամ 40,000 եուրօ տուգանք էր:
Ֆրանսայի նախագահ Ֆրանսուա Հոլանտ քանի մը առիթներով խոստացած է Հայկական Ցեղասպանութեան ուրացումը քրէականացնող նոր օրէնքը ստորագրել:
Նախագիծին մասին «Report.am»ը հարց տուած է ՀՅԴ Հայ Դատի եւ քաղաքական հարցերով գրասենեակի պատասխանատու Կիրօ Մանոյեանին՝ ըսելով. «Նոյն անձի կողմից ներկայացուած օրինագիծը արդեօ՞ք իր նախորդի ճակատագրին չի արժանանայ՝ չնայած Ֆրանսայի նախագահ Հոլանդը, ինչպէս եւ իր նախորդը, այդ օրինագիծը հաստատելու պատրաստակամութիւն են յայտնել»:
Մանոյեան պատասխանած է. «Ասեմ, որ Ֆրանսայի հայ համայնքի կազմակերպութիւնների համակարգող խորհուրդը, որի կազմում են նաեւ Հայ Դատի Ֆրանսիայի յանձնախումբը եւ հայ համայնքի կազմակերպութիւնների համակարգող խորհուրդը, յստակ ասել է՝ ցանկալի չէ, որ այսօր այդ օրինագիծը ներկայացուի ընդդիմադիր պատգամաւորի կողմից, որպէսզի հարցը չքաղաքականացուի: Նաեւ տեղեկացրել են, որ իրենք արդէն աշխատում են մի նախագծի վրայ, որը կ՛անդրադառնայ այն հարցերին, որոնք Սահմանադրական խորհուրդը գտել էր խոցելի: Համակարգող խորհուրդը ճիշդ է համարել աշխատելը Ելիսէյեան պալատի (Ֆրանսայի նախագահական պալատ) աշխատակազմի հետ, որպէսզի Ֆրանսիայի նախագահը խոստումը կատարի, այլ ոչ թէ անտեսի»:

 

LEAVE A REPLY

Please enter your comment!
Please enter your name here