ՔՐՏԱԿԱՆ ՏԱԳՆԱՊԻ ԼՈՒԾՄԱՆ ՊԱՅՄԱՆՆԵՐԸ՝ ԻՆՔՆԱՎԱՐՈՒԹԻՒՆ ԵՒ ՕՃԱԼԱՆԻ ԱԶԱՏ ԱՐՁԱԿՈՒՄ

0
131

Քրտամէտ Խաղաղութիւն եւ Ժողովրդավարութիւն կուսակցութեան համանախագահ Կիւլթան Քըշանաք Անթալիոյ մէջ յայտարարեց, թէ քրտական տագնապը պիտի լուծուի, երբ հաստատուի «ժողովրդավար հանրապետութիւն եւ ինքնավար Քիւրտիստան»: Քըշանաք անդրադարձաւ նոր սահմանադրութեան հարցին՝ ըսելով, թէ կուսակցութիւնը կը ջանայ պատրաստել իսկապէ՛ս «նոր կամ հաշտութեան սահմանադրութիւն» կոչուելու արժանի սահմանադրութիւն մը:
Միւս կողմէ, նոյն կուսակցութեան երեսփոխանական խմբակի ղեկավներէն Փերվին Պուլտան յայտարարեց, որ «հաշտութիւնը պիտի իրականանայ, եթէ ցմահ բանտարկութեան դատապարտուած քիւրտ ղեկավար Ապտուլլա Օճալան ազատ արձակուի։ Ան եւս անդրադարձաւ նոր սահմանադրութեան եւ ըսաւ, որ անիկա «անխարդախ հաւասարութիւն» պէտք է բերէ երկրի բոլոր բնակիչներուն։
Մինչ այդ, օրերէ ի վեր Թուրքիոյ ներքին քաղաքականութեան բոլոր մակարդակներուն վրայ կը խօսուի Իմրալըի մօտալուտ երկրորդ այցելութեան մասին, որպէսզի մօտաւորապէս ամիս մը առաջ Օճալանի հետ սկսած երկխօսութիւնը շարունակուի: Այցելութեան ձգձգման պատճառը կը նկատուէին պատուիրակութեան անդամներուն շուրջ տարակարծութիւնները: Այս պայմաններուն մէջ արդարադատութեան նախարար Սատուլլահ Էրկին յայտարարեց, որ այս շաբաթ նոր զարգացում մը տեղի պիտի ունենայ այդ գծով, սակայն՝ առանց մանրամասնելու: «Պէտք չէ կառչինք փոքրիկ արգելքներու, հոգեբանական խոչընդոտներու։ Այն վայրկեանին, երբ պիտի յաղթահարենք այդ հոգեբանական խոչընդոտները, այլեւս արգելք չի մնար հարցին լուծման համար», ըսաւ Էրկին՝ յուսալով, որ գործընթացը աւելիով չի ձգձգուիր:

 

LEAVE A REPLY

Please enter your comment!
Please enter your name here