ԲԱՐԲԱՐՈՍՆԵՐԸ ԿԸ ՔԱՆԴԵՆ ԱՊՈՒ ԱԼԱ ՄԱԱՐԻԻ ԱՐՁԱՆԸ

0
136

Սուրիոյ  արմատականները   քայլ մը եւս  առին երկրին մէջ  ժողովրդավարութիւն հաստատելու ուղղութեամբ, երբ  պղծեցին  միջնադարեան արաբ   յայտնի բանաստեղծ Ապու Ալա Մաարիի արձանը: Ապպասեան  ժամանակաշրջանի   ծանօթ  գրականագէտ եւ փիլիսոփայ  Ապու Ալա Մաարիի արձանը  տեղակայուած էր անոր  ծննդավայրին Մաարաթ Ալ  Նումանի մէջ՝  Դամասկոսէն  210  քիլոմեթր հեռաւորութեան վրայ:  Ընդդիմադիրները  քանդեցին արձանին գլուխը, իսկ քանդակի մնացեալ մասը վնասեցին փամփուշտներով:

Մարդկային Իրաւանց   հարցերով  ՄԱԿ-ի գլխաւոր յանձնակատար   Նավի Փիլայ, Պի.Պի.Սի-ին  յայտնած է, թէ  Սուրիոյ  հակամարտութեան ընթացքին  զոհերուն թիւը  հասած է  եօթանասուն հազարի:  Փիլայի կարծիքով, միայն  փոխհամաձայնութեամբ կարելի պիտի  ըլլայ լուծել հակամարտութիւնը:

Սուրիոյ վարչապետ Ուաէլ  Նատէր  Հալքի  հաստատեց  ընդդիմութեան հետ բանակցութիւններու սկսելու մասին տեղեկութիւնները:  Նշենք, թէ ՄԱԿ-ի ընդհանոր  քարտուղար Պան Քի Մուն  ողջունեց  իշխանութեան հետ  երկխօսութեան սկսելու  ընդդիմութեան  ղեկավար Մոազ Խաթիպի նախաձեռնութիւնը: Միւս կողմէ, Սուրիոյ մօտ Իրանի դեսպան Մուհամմէտ  Ռիզա Շէյպանի  յայտարարեց, թէ Թեհրան պատրաստ  է  հիւրընկալելու Սուրիոյ կառավարութեան եւ  ընդդիմութեան ներկայացուցիչները՝ եթէ կողմերը համաձայնին երկխօսութեան:

  Այլ գետնի վրայ, «Ռոսօպորոնեքսփորթ»   ընկերութեան գլխաւոր տնօրէն  Անաթոլի Իսաքին յայտարարեց, թէ  Ռուսիա  հակաօդային  պաշտպանութեան  համակարգեր  եւ տարբեր տեսակի  զինուած ուժերու համար, վերանորոգման  արհեստագիտութիւն  կը տրամադրէ Սուրիոյ:

LEAVE A REPLY

Please enter your comment!
Please enter your name here