ՀԷՅԿԸԼ.« ՈՒԱՇԻՆԿԹԸՆ ԿԸ ՓԱՓԱՔԻ ԽՈՐԱՑՆԵԼ ՀԱՅԱՍՏԱՆԻ ՀԵՏ ՌԱԶՄԱԿԱՆ ԳՈՐԾԱԿՑՈՒԹԻՒՆԸ»

0
135

«Միացեալ Նահանգներ կը փափաքի խորացնել ռազմական եւ քաղաքական համագործակցութիւնը Հայաստանի հետ», յայտարարեց նախագահ Պարաք Օպամայի կողմէ պաշտպանութեան նախարարի պաշտօնին առաջադրուած Չաք Հէյկըլ:
Պատասխանելով Ծերակոյտի Զինուած ուժերու յանձնաժողովի նախագահ Քարլ Լեւինի հարցումին, թէ ինք ի՞նչ ընելու կը պատրաստուի՝ խորացնելու համար Ուաշինկթընի եւ Երեւանի ռազմական կապերը՝ Հէյկըլ նշեց. «Պաշտպանական ոլորտին մէջ Հայաստանի եւ Միացեալ Նահանգներու յարաբերութիւնները ամուր են: Նշեմ, սակայն, որ նոյնիսկ առկայ յարաբերութիւններուն մակարդակը հաշուի առնելով՝ երկկողմանի կապերու եւ գործընկերութեան ամրապնդման համար հեռանկարներ եւս առկայ են»:
«Եթէ իմ թեկնածութիւնը հաստատուի, ես կը շարունակեմ քաջալերել Հայաստանի ղեկավարութիւնը, որպէսզի ամրապնդուի առկայ համագործակցութիւնը: Մենք նաեւ կրնանք համագործակցութեան նոր ոլորտներ ի յայտ բերել», նշեց Հէյկըլ:
Փենթակոնի ղեկավարի պաշտօնին համար առաջադրուած Հէյկըլ նաեւ ըսաւ. «Մենք պիտի շարունակենք աջակցիլ Հայաստանի մէջ ընթացող պաշտպանական ոլորտի բարեփոխումներուն, մասնաւորաբար՝ հայկական խաղաղապահ ջոկատներու գործունէութեան, որպէսզի Հայաստան կարենայ շարունակել իր մասնակցութիւնը շարք մը խաղաղապահ գործողութիւններու»:
Հէյկըլի համաձայն՝ Ուաշինկթըն նաեւ յոյս ունի, որ Հայաստանի ռազմական ղեկավարութիւնը յետագային եւս կը նպաստէ տարածաշրջանի ապահովութեան եւ կայունութեան ամրապնդման ուղղուած ջանքերուն:
Ամերիկահայ կազմակերպութիւնները ընդհանուր առմամբ դրական կերպով կը գնահատեն Հէյկըլի այս յայտարարութիւնները: Ամերիկայի Հայ Դատի յանձնախումբի գործադիր վարիչ Արամ Համբարեան ըսած է. «Մենք շնորհակալ ենք Ծերակոյտի Զինուած ուժերու յանձնաժողովի նախագահ Լեւինին, այս հարցը բարձրացնելուն եւ պաշտպանութեան նախարարի հաստատման գործընթացի շրջանակներուն մէջ հայ-ամերիկեան ռազմական համագործակցութեան զարգացման անհրաժեշտութեան վրայ լրջօրէն կեդրոնանալուն համար: Մենք համամիտ ենք նաեւ Հէյկըլի այն մօտեցումին, թէ երկկողմանի ռազմական կապերու զարգացման աւելի մեծ հեռանկարներ կան», նշեց Համբարեան:

 

LEAVE A REPLY

Please enter your comment!
Please enter your name here