ՍԸԼԷՅՄԱՆ՝ ԱՐՍԷԼԻ ՀԱՐՑԸ ԿԸ ՓԱԿՈՒԻ ՅԱՆՑԱԳՈՐԾՆԵՐՈՒՆ ՅԱՆՁՆՈՒՄՈՎ

0
121

Լիբանանեան կառավարութիւնը  այսօր առաւօտեան Պաապտայի պալատին մէջ  հանրապետութեան նախագահ Միշէլ Սըլէյմանի գլխաւորութեամբ, վարչապետ Նեժիպ Միքաթիի  եւ նախարարներու ներկայութեամբ գումարեց  նիստ մը: Նախքան նիստը,     հանրապետութեան նախագահը եւ վարչապետը ունեցան կարճ խորհրդակցութիւն մը:  Կառավարութիւնը քննարկեց 66 կէտերէ բաղկացած օրակարգ մը:

 Նիստի սկիզբը,  նախագահ  Միշէլ Սըլէյման դատապարտեց արաբական  բռնագրաւեալ  հողերու վրայ  բնակութեան նոր   միաւորներ կառուցելու իսրայէլեան կառավարութեան  քայլերը:  Ապա ան  անդրադարձաւ Արսէլի դէպքին, շեշտելով, որ յանցագործները ուշ կամ կանուխ  պիտի յանձնուին արդարադատութեան: Նախագահը ըսաւ, թէ Արսէլի հարցը կրնայ   փակուիլ  յանցագործներուն անձնատուութեամբ:  Սըլէյման  նաեւ  քննադատեց առեւանգումներու երեւոյթը:

Նիստի աւարտին կառավարութիւնը որոշեց նախարար  Շեքիպ Ղըրթպաուիի գլխաւորութեամբ  յանձնախումբ մը կազմել՝ յառաջիկայ  վաթսուն օրերու ընթացքին  սերտելու  ընտրութիւններու վերահսկողութեան  հարցը:

Կառավարութիւնը նաեւ որոշեց յառաջիկայ Երեքշաբթի առաւօտեան արտակարգ նիստ մը գումարել, քննարկելու աշխատավարձերու յաւելման  օրակարգը:

 Ելեւմտական հարցերու նախարար  Մուհամմէտ Սաֆատի լրագրողներուն հետ ունեցած կարճ զրոյցի մը ընթացքին յայտնեց, թէ  2013-ի պիւտճէին նախագիծը պատրաստ պիտի  ըլլայ  յառաջիկայ տասը օրերուն  եւ անիկա պիտի  չընդգրկէ յաւելեալ տուրքեր:

Դարձեալ  այսօր առաւօտեան,  խորհրդարանի յառաջիկայ ընտրութիւնները  ընտրական  նոր  օրինագիծով կայացնելու  լիազօրուած խորհրդարանական  ենթայանձնախումբը գումարեց նիստ   մը: Նիստի աւարտին ենթայանձնախումբի նախագահ  Ռոպէր Ղանէմ   մաղթեց, որ  կողմերը  համաձայնութիւն կը գոյացնեն   ընտրական  նոր  օրինագիծի մը շուրջ:

LEAVE A REPLY

Please enter your comment!
Please enter your name here