ՀԱՅԱՍՏԱՆ ԿԸ ՊԱՀԱՆՋԷ ՊԱՏԺԵԼ ԽՈՋԱԼՈՒԻ ԵՒ ՍՈՒՄԿԱՅԻԹԻ ՅԱՆՑԱԳՈՐԾՆԵՐԸ

0
148

ՄԱԿ-ի Ապահովութեան խորհուրդին մօտ տեղի ունեցած է «Զինեալ հակամարտութիւններու ընթացքին քաղաքացիական բնակչութեան պաշտպանութիւնը» խորագիրով բաց քննարկում մը: Մօտ 12 ժամ տեւած հանդիպումին մասնակցած եւ ելոյթներով հանդէս եկած են ՄԱԿ-ի ընդհանուր քարտուղարը, Մարդկային իրաւունքներու գերագոյն յանձնակատարը, Միջազգային Կարմիր Խաչի իրաւունքի եւ համագործակցութեան հարցերով տնօրէնը, բազմաթիւ անդամ պետութիւններու ներկայացուցիչներ՝ ներառեալ ՄԱԿ-ի մօտ Հայաստանի մշտական ներկայացուցիչը: Ելոյթ ունեցողները խստօրէն դատապարտած են աշխարհի որեւէ շրջանի մէջ անհամաչափ ուժի կիրառման միջոցով քաղաքացիական բնակչութեան դէմ յարձակումները:
Հայաստանի արտաքին գործոց նախարարութեան մամուլի, տեղեկատուութեան եւ հասարակայնութեան հետ կապերու վարչութեան համաձայն՝ ՄԱԿ-ի մօտ դեսպան Կարէն Նազարեանը իր մտահոգութիւնը յայտնած է Սուրիոյ մէջ վատթարացող իրավիճակին կապակցութեամբ ու դատապարտած է բոլոր տեսակի ոտնձգութիւններն ու ահաբեկչական գործողութիւնները՝ Սուրիոյ խաղաղ բնակչութեան դէմ, միաժամանակ խոր մտահոգութիւն յայտնելով սուրիահայ համայնքի վիճակին կապակցութեամբ՝ նշելով, որ Հայաստան կը շարունակէ ընդունիլ Սուրիայէն փախստականներ, որոնք խորապէս անհանգստացած են իրենց երկիրին մէջ ահագնացող բռնութիւններով:
Անդրադառնալով Ատրպէյճանի արտաքին գործոց նախարարին կողմէ նախապէս կատարուած անպատասխանատու յայտարարութիւններուն՝ դեսպան Նազարեան յայտնած է, որ իրեն համար անակնկալ չէր երկար տարիներէ ի վեր Պաքուի կողմէ կիրառուող փաստերը աղաւաղելու նախարարին կեցուածքը: Ան աւելցուցած է, թէ ժամանակը եկած է, որ այդ անփոփոխ հռետորաբանութիւնն ու սին մեղադրանքները փոխարինուին կառուցողական քայլերով, որոնք նպաստաւոր միջավայր պիտի ստեղծեն հարցի խաղաղ կարգաւորման համար: Կարէն Նազարեան յիշեցուցած է Խոջալու բնակավայրին մէջ տեղի ունեցած դէպքերուն մասին այդ ժամանակաշրջանի Ատրպէյճանի նախագահ Այազ Մութալիպովի յայտնի հարցազրոյցը, ուր վերջինս ատրպէյճանական ընդդիմութիւնը կը մեղադրէր սեփական ժողովուրդին նկատմամբ սպանդ իրականացնելու յանցանքով՝ պարզապէս, որպէսզի իշխանութեան հասնի:
Դեսպանը ըսած է, թէ Ատրպէյճան պէտք է պատասխանատուութեան ենթարկէ այն անձերը, որոնք իրականացուցած են Խոջալուի սպանդը, ինչպէս նաեւ՝ 80ականներ վերջերուն ու 90ականներու սկզիբը Ատրպէյճանի տարբեր քաղաքներու մէջ հայերու դէմ վայրագութիւնները:
Հայաստանի ներկայացուցիչը մասնաւորապէս նշած է. «Ուղիղ 25 տարի առաջ, ի պատասխան Արցախի ժողովրդի խաղաղ ու ինքնորոշման իրաւունքի սահմանադրական պահանջին՝ ադրբեջանական իշխանութիւնները ջարդեր իրականացրին Ատրպէյճանի Սումկայիթ քաղաքում բնակուող անպաշտպան հայերի դէմ: Վայրագութիւններն իրականացուեցին հայ փոքրամասնութեան նկատմամբ, ովքեր խաղաղ ապրում էին իրենց տանը եւ ովքեր յարձակման ենթարկուեցին միմիայն իրենց էթնիկ պատկանելութեան համար: Այնուհետեւ Պաքւում, Կիրովապատում եւ ատրպէյճանական այլ քաղաքներում իրականացուեցին առաւել վայրագ ու զանգուածային կոտորածներ՝ յանգեցնելով շուրջ կէս միլիոն հայերի էթնիկական զտումների եւ տեղահանութեան»:
Կարէն Նազարեանն այնուհետեւ յիշեցուցած է, որ այդ վայրագութիւններէն ետք, Ատրպէյճան փորձած է ռազմական գործողութիւններով լուծում մը գտնել Արցախի հարցին:
Հայաստանի դեսպանը կոչ ըրած է ՄԱԿի Ապահովութեան խորհուրդին, որ աւելի աշխոյժ մօտեցում որդեգրէ՝ կանխելու համար քաղաքացիներու վրայ յարձակումները, եւ շեշտած է, թէ Ատրպէյճան պէտք է անյապաղ դադրեցնէ առողջապահական հաստատութիւններու, քաղաքացիական թիրախներու եւ փոխադրամիջոցներու վրայ յարձակումները ու քաղաքացիական օդանաւերու ուղղուած սպառնալիքները:
Կարէն Նազարեան իր խօսքը աւարտած է՝ հաստատելով Հայաստանի յանձնառութիւնը խաղաղարար գործընթացին գծով եւ նշելով, որ հիմնահարցերը պէտք է կարգաւորուին միայն խաղաղ ճանապարհով ու միջազգային իրաւունքի սկզբունքի հիման վրայ:

 

LEAVE A REPLY

Please enter your comment!
Please enter your name here