ՀՐԱՆԴ ՏԻՆՔԻ ՈՃԻՐԻՆ ՎԿԱՆ ՄՏԱՀՈԳ Է ԻՐ ԱՊԱՀՈՎՈՒԹԵԱՆ

0
183

Հրանդ Տինքի սպանութեան դատավարութեան մէջ նոր զարգացում մը  արձանագրուեցաւ  թրքական  մամուլի էջերուն մէջ։ Թոքաթ քաղաքի բանտէն գաղտնի վկայ մը դատարան նամակ մը ուղարկելով՝ պնդած է, թէ ոճիրի մանրամասնութիւններուն ու պատասխանատուներուն մասին կարեւոր գիտելիքներ ու փաստաթուղթեր ունի եւ պատրաստ է այդ գիտելիքները դատախազին յանձնելու, եթէ իր ու իր ընտանիքին ապահովութիւնը երաշխաւորուի իշխանութեանց կողմէ:
Նամակէն յայտնի կը դառնայ, որ այդ գաղտնի վկան եւս մաս կազմած է ոճիրը ծրագրողներու ցանցին, բայց, ըստ անոր՝ ոճիրը գործուած է առանց իր տեղեկութեան:
Յիշեալ անձը իր նամակին մէջ կը պատմէ, որ ոճիրէն առաջ եւ ետք, հեռաձայնով բազմաթիւ խորհրդակցութիւններ ունեցած է զանազան զինուորականներու հետ։ Ան ընդունած է այն իրողութիւնը, թէ ինք եւս մաս կը կազմէր Տինքը սպաննած յանցագործ կազմակերպութեան եւ այդ նոյն կազմակերպութեան հրահանգով այլ յանցագործութիւն մը գործած էր ու ապա մարդ սպաննելու ամբաստանութեամբ բանտարկուած էր։ Իրեն խոստացած էին քանի մը տարուան ընթացքին զինք բանտէն դուրս բերել ու արտասահման ղրկել, բայց այդ խոստումները չեն յարգուած։ Վկան կը պնդէ, թէ լաւ կը ճանչնար ամբաստանեալներէն Էրհան Թունճելը, որուն հետ տեսնուած էր Տրապիզոն, իսկ նախքան ոճիրը՝ անոնք «Ակօս» թերթի խմբագրատան առջեւ ուսումնասիրութիւններ ըրած էին միասնաբար։
Տինքը սպաննելու ծրագիրը մշակուած էր Թունճելին հետ. Թունճելն ալ այդ մասին տեղեկութիւններ տուած էր թէ՛ ապահովութեան տնօրէնութեան, թէ՛ ոստիկանութեան։ «Ոճիրը ծրագրեցինք Թունճելին հետ միասին, բայց ոճիրը գործուեցաւ առանց իմ գիտակցութեան», ըսած է գաղտնի վկան իր նամակին մէջ։ Յիշենք, թէ Թունճել ազատ արձակուած էր Տինքի սպանութեան դատավարութենէն ետք:
Ըստ թրքական «Ճիհան» լրատու գործակալութեան՝ Տինքի սպանութեան հետաքննութեամբ զբաղող դատախազ Մուամար Աքաշի յանձնարարութեամբ, ոստիկանութիւնը արդէն իսկ յատուկ քայլերու դիմած է՝ վկային ապահովութիւնը երաշխաւորելու համար, ու պատրաստութիւններ կը կատարուին յառաջիկայ օրերերուն հարցաքննելու համար զայն:
Տինք սպաննուեցաւ 19 Յունուար  2007-ին «Ակօս» թերթի խմբագրատան առջեւ: Յանցագործ Օկիւն Սամասթը, ոճիրին ընթացքին անչափահաս ըլլալուն պատճառով, դատապարտուեցաւ 22.5 տարուան բանտարկութեան: 17 Յունուար  2012-ին, Պոլսոյ ծանր յանցագործութիւններու 14-րդ դատարանը նշեց, թէ ոճիրը կազմակերպուած խումբի մը կողմէ չէր իրագործուած:

 

LEAVE A REPLY

Please enter your comment!
Please enter your name here