ՈՒԱՇԻՆԿԹԸՆ ԵՒՍ ԿԸ ԶԳՈՒՇԱՑՆԷ ՊԱՔՈՒՆ՝ ԱՅԼԻՍԼԻԻ ԱՊԱՀՈՎՈՒԹԵԱՆ

0
158

Միացեալ Նահանգներու պետական քարտուղարութիւնը կոչ ըրած է Ատրպէյճանի իշխանութիւններուն՝ միջոցառումներու ձեռնարկելու, որպէսզի երաշխաւորուի սպառնալիքներու ենթարկուող այլախոհ գրող Աքրամ Այլիսլիի եւ այլ քաղաքացիներու ապահովութիւնը:
Պետական քարտուղարութեան  խօսնակ Վիքթորիա Նուլանտ այս մասին հարցումի մը պատասխանելով՝ ըսած է, թէ նախարարութիւնը մօտէն կը հետեւի այս իրադարձութիւններուն, եւ վստահեցուցած է, թէ Ուաշինկթըն «բարձրագոյն մակարդակով կ՛աջակցի եւ կը հաւատայ արտայայտուելու ազատութեան»:
«Կոչ կ՛ընենք Ատրպէյճանի կառավարութեան, որ յստակ միջոցներու դիմէ, պաշտպանելու համար պարոն Այլիսլիի եւ միւս քաղաքացիներու ապահովութիւնը», ըսած է Նուլանտ:
Աքրամ Այլիսլի կը հալածուի իր «Քարէ Երազներ» վէպին պատճառով: Վէպը հայերու դէմ ատրպէյճանական իշխանութեանց բռնարարքներու օրերուն՝ ատրպէյճանցի որոշ քաղաքացիներու կողմէ հայերու ցուցաբերուած բարեկամական վերաբերմունքին մասին է: Միաժամանակ կը պատմուի ատրպէյճանցիներու ձեռամբ կատարուած հայերու ջարդերը:
Իբրեւ հետեւնաք, Ատրպէյճանի նախագահը Այլիսլին զրկած է իր «Ատրպէյճանի ժողովրդական գրող» կոչումէն, պետական կենսաթոշակէն ու այլ պարգեւներէ, իսկ կուսակցապետ մը մօտաւորապէս 13,000 տոլար խոստացած էր անոր, որ կը կտրէ այս գրողին ականջը:

 

LEAVE A REPLY

Please enter your comment!
Please enter your name here