ՌԱՖԻՔ ՀԱՐԻՐԻԻ ՍՊԱՆՈՒԹԵԱՆ 8-ՐԴ ՏԱՐԵԼԻՑԻՆ ԱՌԻԹՈՎ՝ « ՄՈՒՍԹԱՔՊԱԼ ՉԱՓԱՒՈՐԱԿԱՆ ՀՈՍԱՆՔ Է»

0
132

Մուսթաքպալ հոսանքին կազմակերպութեամբ, երէկ երեկոյեան ժամը 5:30-ին «Պիել»-ի մէջ նշուեցաւ նախկին վարչապետ Ռաֆիք Հարիրիի սպանութեան Ը. տարելիցը, որուն ներկայ գտնուեցաւ նախկին վարչապետ Ֆուատ Սինիորա, Մարտ 14-ի քաղաքական ուժերու մեծ թիւով երեսփոխաններ, ինչպէս նաեւ Մուսթաքպալ հոսանքի համակիրներ:

Նախկին վարչապետ Ռաֆիք Հարիրիի յիշատակին տեղի ունեցած ձեռնարկին հիմնական բացականերն էին Փաղանգաւոր կուսակցութեան ղեկավար Ամին Ժեմայէլ եւ Լիբանանեան ուժեր կուսակցութեան ղեկավար Սամիր Ժաաժա:

Նախկին վարչապետ Սաատ Հարիրի իր հօր սպանութեան յիշատակին առիթով արտասանեց պատկերասփռուած ճառ մը, որուն մէջ շեշտեց, որ Ռաֆիք Հարիրիի եւ Մարտ 14-ի քաղաքական ուժերու նահատակներուն թափած արիւնը աւելի զօրաւոր է, քան` զէնքի կուսակցութիւնները եւ Ասատի ու Մեմլուքի դաւադրութիւնները, որոնք կը միտին քանդել Լիբանանի ապահովական կայունութիւնը:

«Հըզպալլա իր մօտ ունի հրթիռային համակարգ մը եւ զինուած է արդիական կերպով, ունենալով զէնքեր` աւելի քան բանակը: Այս իրականութիւնն է ամէնէն վտանգաւորը, որ լիբանանցիներուն միջեւ լարուածութիւն կը ստեղծէ, իսկ Հըզպալլա խիստ կերպով կը մերժէ ընդունիլ այս իրականութիւնը եւ կը շարունակէ կառչած մնալ այն տարազին, որ բոլոր քաղաքականութիւնները պէտք է ըլլան Հըզպալլայի զէնքին ետին», ըսաւ Հարիրի:

Ան աւելցուց, որ Հըզպալլա պատրաստ է իր բոլոր նախարարներուն բաժինը կառավարութեան նուիրելու, պայմանաւ որ չկազմուի կառավարութիւն մը, որ կ՛անդրադառնայ իր զէնքին:

Սաատ Հարիրի նշեց նաեւ, որ Հըզպալլա պատրաստակամութիւն յայտնած է համաձայնութիւն յայտնելու իր դաշնակիցին` զօր. Միշել Աունի, որ կը զօրակցի Ուղղափառ հանդիպումին մշակած ընտրական օրէնքին, որպէսզի Լիբանանի խորհրդարանը պահէ իր զէնքին հովանիին տակ:

Հարիրի ընդգծեց նաեւ, որ Հըզպալլա պատրաստ է նաեւ արտօնելու Ռաֆիք Հարիրիի սպանութեան դրդապատճառներու բացայայտման նպատակով կազմուած Լիբանանի յատուկ միջազգային դատական ատեանի ֆինանսաւորումը եւ պատրաստ է Դիմադրութեան ու Սուրիոյ դէմ երեսփոխան Ուալիտ Ժոմպլաթի քննադատութիւններուն խուլ ականջ դարձնելու, պայմանաւ որ իր ապազինման թղթածրարը քննարկումէ հեռու մնայ:

Անդրադառնալով երեսփոխանական ընտրութիւններուն` Սաատ Հարիրի շեշտեց, որ ինք պիտի ըլլայ իր համակիրներուն կողքին, ի՛նչ ալ ըլլայ ընտրական օրէնքը եւ ի՛նչ ալ ըլլան մարտահրաւէրները կամ վտանգները:

Հարիրի ընդգծեց նաեւ, որ նախագահ Պաշշար Ասատի վարչակարգը անպայման պիտի տապալի` աւելցնելով, որ Մուսթաքպալ հոսանքը քաղաքական եւ քաղաքացիական հոսանք է, որ կը յատկանշուի իր չափաւորականութեամբ ու ժողովրդավարութեամբ եւ երբեք դէպի ծայրայեղութիւն պիտի չուղղուի:

Իր կարգին, Մարտ 14-ի քաղաքական ուժերուն ընդհանուր քարտուղարութեան անունով խօսք մը արտասանեց ընդհանուր քարտուղարութեան գործավար, նախկին երեսփոխան Ֆարես Սուէյտ, որ յայտնեց, թէ Լիբանան վտանգի դիմաց կը գտնուի եւ թէ զայն կարելի չէ փրկել` առանց վերադառնալու Մայրիներու յեղափոխութեան խորհուրդին:

LEAVE A REPLY

Please enter your comment!
Please enter your name here