ՍՈՒՐԻՈՅ ՀԱԿԱՄԱՐՏՈՒԹԵԱՆ ՔԱՂԱՔԱԿԱՆ ԼՈՒԾՈՒՄԸ ԳԵՏԻՆ ԿԸ ՇԱՀԻ

0
177

Սուրիոյ  հակամարտութիւնը  քաղաքական միջոցներով լուծելու Մոսկուայի   ընտրանքը սկսած է  տեղ շահիլ:   Ուաշինկթնի մէջ,  պետական քարտուղարութեան խօսնակ Վիքթորիա  Նուլանտ նոյնպէս  շեշտեց  քաղաքական  լուծում գտնելու անհրաժեշտութիւնը:  Իսկ  Բրիտանիոյ արտաքին գործոց նախարար Ուիլիըմ Հէյկ յայտնեց, որ Սուրիա ներկայիս «Ճիհատականներու ուղեւորութեան վայրի վերածուած է»` զգուշացնելով, որ այդ երկրին տագնապը որքան երկարի, այդքան Արեւմուտքին համար «անոնց վտանգը» կը մեծնայ:

Հէյկ Լոնտոնի մէջ «Արտասահմանի մէջ ահաբեկչութեան դէմ պայքար»-ին շուրջ իր արտասանած խօսքին մէջ ըսաւ, որ «Սուրիա այսօր ամբողջ աշխարհի ճիհատականներուն համար ուղեւորութեան առաջին վայրին վերածուած է: Անոնց շարքին են Բրիտանիոյ եւ եւրոպական այլ երկիրներու առնչուած անհատներ»:

Ան աւելցուց, որ այդ «ճիհատականները կրնան մեզի որեւէ վտանգ չներկայացնել, երբ Սուրիա կ՛երթան, սակայն եթէ ողջ մնան, կրնան աւելի կարծր գաղափարախօսութեամբ եւ զէնքերու ու պայթուցիկներու փորձառութեամբ օժտուած վերադառնալ»:

Եւրոպական Միութեան ահաբեկչութեան դէմ պայքարի հարցով յանձնակատար Ճիլ Քիրքով յայտնեց, որ «հետզհետէ իսլամութեան հետեւորդ յաւելեալ եւրոպացի երիտասարդներ Սուրիա կ՛ուղղուին` կռուելու համար շարք մը ընդդիմադիր խմբաւորումներու կողքին, մասնաւորաբար Ժապհաթ Նուսրայի»` աւելցնելով, որ շարք մը եւրոպական պետութիւններ եւրոպացի իսլամ երիտասարդներուն մօտ այդպիսի ձգտումի աճ նկատած են:

Ռուսիոյ արտաքին գործոց փոխնախարար Միխայիլ Պոկտանով յայտնեց, որ իր երկիրը կը զօրակցի Սուրիոյ շուրջ «աշխատանքային խմբակ»ը ընդլայնելու գաղափարին՝ Եգիպտոսի, Սէուտական Արաբիոյ եւ Իրանի կողքին անոր միացնելով կարգ մը այլ երկիրներ, ինչպէս՝ Լիբանանն ու Յորդանանը. ան շեշտեց, թէ խմբակը կարելի եղածին չափ շուտ պէտք է ժողով գումարէ, որովհետեւ ներկայ կացութիւնը կրնայ Սուրիոյ քայքայման առաջնորդել:
Պոկտանով նաեւ նշեց, որ իր երկիրը սկիզբէն ի վեր աշխատանքային խմբակի անդամներու յաւելման կողմնակից եղած է, սակայն «առաջին հանգրուանին՝ անհրաժեշտ էր միջազգային լայն համախոհութեան հասնիլը, ապա՝ կառավարութեան եւ ընդդիմութեան ներկայացուցիչները մեր աշխատանքին մասնակից դարձնելը»: Ռուսիոյ արտաքին գործոց նախարարութեան բանբեր Ալեքսանտր Լուքաշեւիչ իր կարգին յայտնեց, թէ Մոսկուա «աշխուժօրէն կ՛աջակցի բոլոր անոնց, որոնք Սուրիոյ մէջ քաղաքական լուծում գտնելու կը ջանան»:
«Դժբախտաբար, Սուրիոյ մէջ կացութիւնը կը վատթարանայ, ներքին բախումներուն կշռոյթը չի դանդաղիր եւ ծայրայեղականներուն միջեւ իսկ բախումներ կ՛արձանագրուին», ըսաւ ան՝ աւելցնելով, որ անհրաժեշտ է արիւնահեղումը դադրեցնել եւ երկխօսութեան սկսելու համար միջոցառում մը որդեգրել: Ան ըսաւ, որ Սուրիոյ տագնապի լուծման ճամբան կ՛անցնի «սուրիական ներքին լայն երկխօսութեան ուղիէն»:
Լուքաշեւիչ յայտնեց, որ Ռուսիա պիտի շարունակէ տագնապի բոլոր կողմերուն եւ արտաքին դերակատարներուն հետ ջանք թափել՝ աջակցելու համար անոնց, «որոնք Սուրիոյ տագնապի քաղաքական լուծման կը ձգտին»: Ան շեշտեց, որ Սուրիոյ հարցով ՄԱԿ-ի եւ Արաբական լիկայի յատուկ պատուիրակ Լախտար Իպրահիմի տակաւին կը խաղայ կարեւոր դերակատարութիւն մը, որուն Ռուսիան կը շարունակէ զօրակցիլ:
Մինչ այդ, Արաբական լիկայի ընդհանուր քարտուղար Նեպիլ Արապի յայտնեց, որ լիկան «ժամանակին հետ մրցումի մէջ է եւ կ՛օգտագործէ կարելի բոլոր միջոցները՝ դադրեցնելու համար սուրիական վէրքին արիւնահոսութիւնը» եւ կառավարութիւնն ու ընդդիմութիւնը մղելու համար տագնապին խաղաղ ճամբով ելք մը գտնելու, ինչպէս նաեւ կը շարունակէ վարչակարգին կոչ ուղղել՝ ընդառաջելու սուրիացի ժողովուրդի պահանջներուն:
Մինչ այդ, Եգիպտոսի մէջ Իսլամ եղբայրներու քաղաքական թեւին՝ Ազատութիւն եւ արդարութիւն կուսակցութեան փոխնախագահ Իսամ Արիան յայտնեց, որ Եգիպտոսի մէջ Իսլամ եղբայրներու անդամներէն Մուհամմատ Մահրազ, Սուրիոյ մէջ Սուրիական ազատ բանակի շարքերէն կռուելու ընթացքին սպաննուած է:

 

LEAVE A REPLY

Please enter your comment!
Please enter your name here