ՄԻՔԱԹԻ ԿԸ ԲԱՑԱՌԷ ԳՈՐԾԱԴՈՒԼԻ ԿԱՐԵԼԻՈՒԹԻՒՆԸ

0
141

Վարչապետ Նեժիպ Միքաթի վարչապետարանի լրագրողներուն հետ իր ունեցած զրոյցին ընթացքին յայտնեց, որ վաղը՝ երկուշաբթի օր Պաապտայի մէջ գումարելիք իր նիստին ընթացքին կառավարութիւնը պետական պաշտօնեաներուն եւ ուսուցիչներուն աշխատավարձի յաւելումները պիտի փոխանցէ խորհրդարան, «հետեւաբար` երեքշաբթի օր Սենտիքայական համակարգումի խորհուրդի գործադուլ պիտի չըլլայ», ըսաւ վարչապետ Միքաթի:

Անդրադառնալով երեսփոխանական ընտրութիւններուն` վարչապետ Միքաթի յայտնեց, որ կառավարութիւնը յանձնառու է իր ներկայացուցած ընտրական օրինագիծին` աւելցնելով, որ ներկայիս առկայ օրէնքը 1960-ի ընտրական օրէնքն է եւ այդ պատճառով ալ այդ օրէնքին հիման վրայ է, որ ընտրութիւնները պիտի կազմակերպուին:

Միքաթի զարմանք յայտնեց մազութի սիթեռներուն դէպի Սուրիա ուղղուելուն կառավարութիւնը պատասխանատու նկատելու առնչութեամբ` աւելցնելով, որ Լիբանանի մէջ կան անձնական ընկերութիւններ, որոնք կը գործեն ազատ վարչակարգի մէջ, եւ կարելի չէ արգիլել անոնց աշխատանքը:

Արսալի մէջ բանակին դէմ գործուած ոճիրին առնչութեամբ, վարչապետ Միքաթի հաստատեց, որ ինք պիտի չընդունի որեւէ սակարկութիւն, եւ բոլոր յանցագործները պիտի հետապնդուին, ձերբակալուին եւ յանձնուին դատական իշխանութիւններուն:

LEAVE A REPLY

Please enter your comment!
Please enter your name here