ԸՆՏՐՈՒԹԻՒՆՆԵՐՈՒՆ ՄԱՍՆԱԿՑՈՒԹԻՒՆԸ ՄԻՆՉԵՒ ԺԱՄԸ 11՝ 10.92 ԱՌ ՀԱՐԻՒՐ

0
115

Հայաստանի   նախագահի ընտրութիւններուն մասնակցութիւնը առաւօտեան  ժամը 11-ի դրութեամբ  կազմած է  10. 92 առ  հարիւր:  Քուէարկութեան մասնակցած է  275986  ընտրող:  Երեւանի մէջ   մասնակցութիւնը կազմած է 10.5  առ  հարիւր:

 Հայաստանի նախագահ Սերժ Սարգսեան իր տիկնոջ ընկերակցութեամբ   քուէարկեց Երեւանի  Սպանդարեանի  անուան  24  միջնակարգ  դպրոցին մէջ:  Քուէարկութենէն ետք,  Սերժ Սարգսեան  կարճ  զրոյց մը ունեցաւ  լրագրողներուն հետ , անոնց յայտնելով թէ քուէարկած էր  Հայաստանի ապագայի, ապահով Հայաստանի,  քաղաքացիներու եւ ընտանիքներու ապահովութեան:

 Հայաստանի  Սահմանադրական  դատարանի  նախագահ  Գագիկ Յարութիւնեան քուէարկելէ ետք, յայտարարեց, թէ    ընտրութիւններուն մասնակցութիւնը իւրաքանչիւր   քաղաքացիի պարտականութիւնն է .« Քուէարկութիւնը ոչ միայն  իրաւունք է, այլեւ՝  պատասխանատուութիւն  ապագայ սերունդներու առջեւ»  շեշտեց ան:

 Նախկին նախագահ  Լեւոն Տէր   Պետրոսեան  յայտարարեց, թէ    օրէնքը արտօնելու  պարագային պիտի  քուէարկէր  բոլոր  թեկնածուներուն:    Տէր Պետրոսեան   ըսաւ, թէ քուէարկած է  գործող նախագահ Սերժ Սարգսեանին:  Ան աւելցուց, թէ քուէարկած էր յանուն Հայաստանի Հանրապետութեան:

Նախագահի  թեկնածու «Ժառանգութիւն» Կուսակցութեան  ղեկավար  Ռաֆֆի Յովհաննէսեան   իր բնակարանէն  քալելով հասաւ  Նորքի մէջ գտնուող այն  ընտրատեղամասը, ուր պիտի   կատարէր քաղաքացիական իր պարտքը: Յովհաննէսեան    քուէարկելէ ետք յայտարարեց, թէ  քուէարկած էր յանուն   հայրենիքին:

Հայաստանի մօտ  Միացեալ Նահանգներու դեսպան   Ճոն Հեֆըրն  հայ   քուէարկողներուն մաղթեց  անվտանգ եւ արդիւնաւէտ  ընտրութիւններ:  Դեսպանին  հրապարակած  հաղորդագրութեան մէջ  գրուած է.« Ըրէք այնպէս, որ Ձեր  ձայնը լսելի դառնայ, քուէարկեցէք»:

 

LEAVE A REPLY

Please enter your comment!
Please enter your name here