ՀԱՅԱՍՏԱՆԻ ՆԱԽԱԳԱՀԱԿԱՆ ԸՆՏՐՈՒԹԻՒՆՆԵՐՈՒ ԱՌԱՋԻՆ ԺԱՄԵՐԸ

0
137

Այսօր առաւօտեան  ժամը  ութին բացուեցան Հայաստանի նախագահական   ընտրութիւններու քուէատուփերը:  Շուրջ   երկու միլիոն  505 հազար 980  քաղաքացիներ պիտի    ընտրեն  երկրի նոր  նախագահը: Ընտրութեան առաջին  ժամերուն արձանագրուեցաւ, որ  կարգ մը  թեկնածուներու ներկայացուցիչներ չեն ներկայացած   իրենց համար նշուած ընտրատեղամասերը:   Լրատուական աղբիւրներ նաեւ  հաղորդեցին, թէ նախկին նախագահ  Ռոպերթ Քոչարեան երկրէն բացակայ ըլլալու պատճառով,  պիտի   չմասնակցի ընտրութիւններուն:  

  Հայաստանի  գլխաւոր դատախազութիւնը յայտարարեց, թէ  մինչեւ  17 Փետրուար  2013-ի դրութեամբ,  ստացած է  նախագահի ընտրութիւններուն հետ առնչուող   ընտրական իրաւունքի խախտման   88  բողոք:  Այս առիթով տեղի ունեցած են ստուգումներ:  Չորս խախտումներու շուրջ տրուած է   պարզապանում:  Մէկ   բողոքի  կապակցութեամբ յարուցուած է քրէական  գործ:  Քսան  բողոք մերժուած է, իսկ մնացեալ  61   բողոքներու ուղղութեամբ կը շարունակուի հետաքննութիւն:

  Նախագահութեան  թեկնածու   Ռաֆֆի Յովհաննէսեանի   ներկայացուցիներ Լոռիի մարզի   Տաշիր քաղաքին մէջ նկատած են «լցոնման» դէպքեր:   Հայաստանի ոստիկանութիւնը     հերքեց  տարբեր   ընտրական  շրջաններէ  ընտրողներ,  Երեւան քաղաքի  մէջ վերստին քուէարկութեան  մասնակցելու մասին  Յովհաննէսեանի   բողոքը, զայն  նկատելով յերիւրանք:

Կեդրոնական  ընտրական Յանձնաժողովի նախագահ Տիգրան Մուկուչեան հաւաստեց, թէ  լուրջ ընտրախախտումներ չեն արձանագրուած  ընտրութեան առաջին  ժամերուն:

LEAVE A REPLY

Please enter your comment!
Please enter your name here