ԴԻՒԱՆԱԳԻՏԱԿԱՆ ԼՈՒԾՈՒՄԻ ԿԱՐԵԼԻՈՒԹԻՒՆՆԵՐԸ ԳԵՏԻՆ ԿԸ ՇԱՀԻՆ ՍՈՒՐԻՈՅ ՄԷՋ

0
152

   Թուրքիոյ արտաքին գործոց նախարար Ահմէտ Տաւուսօղլու, անդրադառնալով Սուրիոյ հարցով ՄԱԿ-ի եւ Արաբական Լիկայի յատուկ պատուիրակ Լախտար Իպրահիմիի այն առաջարկին, թէ Սուրիոյ կառավարութեան եւ ընդդիմութեան միջեւ հանդիպումը կարելի է իրականացնել ՄԱԿ-ի կեդրոնատեղիին մէջ՝ յայտնեց, որ Թուրքիա միշտ աջակցած է Իպրահիմիի ջանքերուն: Ան շեշտեց, որ Թուրքիա միշտ «առանց զէնքերու լուծումի մը կողմ եղած է»՝ աւելցնելով, որ «ներկայիս այդպիսի լուծումի մը մօտ ենք»:
Իպրահիմի յայտնած էր նախապէս, թէ տեղեակ չէ սուրիական ընդդիմադիր Ազգային համաձայնական մարմինի նախագահին ներկայացուցած ծրագիրէն՝ վստահեցնելով, որ Սուրիոյ տագնապին շուրջ իր առաջադրած նախաձեռնութիւնը տակաւին սեղանի վրայ է եւ աւելցնելով, որ «Դամասկոս սուրիական տագնապի խաղաղ լուծում մը գտնելու փափաք եւ երկխօսութիւն կատարելու պատրաստակամութիւն յայտնած է»:
Մինչ այդ, ՄԱԿ-ի մարդկային իրաւանց բռնաբարումներու հետաքննութեան յանձնախումբի զեկուցումը նշեց. «Սուրիոյ դրացի երկիրները կը շարունակեն աշխուժօրէն զինել սուրիական ընդդիմութիւնը, ինչ որ աւելի ազդու կը դարձնէ զայն սուրիական ուժերուն դէմ պատերազմին մէջ»: Յանձնախումբը առաջարկեց «Սուրիոյ մէջ զէնքերու տարածումն ու ներածումը կրճատել եւ այս հարցը լուծել այդ զէնքերը արտածող աղբիւրներուն հետ»՝ աւելցնելով, որ օտարներու աջակցութիւնը ոչ միայն սալաֆական խմբաւորումներու ամրապնդման կ՛առաջնորդէ, այլ նաեւ պատճառ կը դառնայ, որ այլ խմբաւորումներ անոնց միանան:
Սուրիոյ խորհրդարանի նախագահ Մոհամմէտ Ժիհատ Լահհամ շեշտեց, որ ազգային երկխօսութիւնը Սուրիոյ տագնապի լուծման համար քաղաքական ծրագիրին հիմքն է: Ան աւելցուց, որ Սուրիոյ բոլոր զաւակները հրաւիրուած են ահաբեկչութեան դէմ կանգնելու:
Մինչ այդ, ամերիկեան բանակի սպայակոյտի պետ զօր. Ռէյմընտ Օտիրնօ յայտնեց, որ  Միացեալ Նահանգներու նախագահ Պարաք Օպամա սուրիական տագնապին համար դիւանագիտական լուծում մը կ՛ուզէ:
ՄԱԿ-ի գաղթականներու բարձրագոյն խորհուրդը յայտնեց, որ Լիբանանի մէջ արձանագրուած սուրիացի գաղթականներուն թիւը բարձրանալով՝ հասած է 283,000-ի:

«Ինթէրֆաքս» լրատու գործակալութիւնը  հաղորդեց, որ Սուրիոյ նախագահ Պաշշար Ասատ լիբանանցի քաղաքական գործիչներու հետ հանդիպումի մը ընթացքին ըսած է. «Վստահ ենք, որ պիտի յաղթենք. այդ ուղղութեամբ մեզ կը համոզէ երկրի քաղաքական եւ զինուորական իրավիճակի զարգացումը»:
Սակայն, «ատիկա չի նշանակեր, որ ամէն ինչ որոշուած է: Մենք տակաւին շատ ընելիք ունինք թէ՛ քաղաքական առումով, թէ՛ ծայրայեղական խմբաւորումներու դէմ պատերազմի դաշտին վրայ», աւելցուցած է Ասատ:
Ըստ Ասատի՝ անոնք, որոնք հաւատարիմ են ներկայ իշխանութիւններուն, «կը կազմեն սուրիացիներու բացարձակ մեծամասնութիւնը»: «Հակառակ պարագային, ինչպէ՞ս պիտի բացատրէիք այն, թէ սուրիական դիւանագիտական կազմի ներկայացուցիչները ամբողջ աշխարհին մէջ հաւատարիմ մնացած են, հակառակ անոր, որ մեր դեսպաններուն, հիւպատոսներուն միլիոնաւոր տոլարներ առաջարկուած են: Ատիկա կ՛ապացուցէ, թէ որքա՛ն ուժեղ է սուրիական հայրենասիրութիւնը», ընդգծած է Ասատ:
Իր կարգին, սուրիական ընդդիմադիր Ազգային համաձայնական մարմինի նախագահ Ահմէտ Մոազ Խաթիպ «Անատոլու» լրատու գործակալութեան հետ զրոյցի մը ընթացքին յայտարարեց, որ եթէ Ասատ իշխանութենէն հեռանայ եւ «երկրի վերակազմաւորման համար բոլոր լիազօրութիւնները տայ ներկայ կառավարութեան, կրնայ երկիրի հարցերուն մեծ մասը լուծել»: Ան հերքեց, թէ կառավարական որեւէ կողմի հետ ուղղակի կամ անուղղակի կապեր հաստատուած են: Խաթիպ նշեց նաեւ, թէ պահանջուածը Ասատի հեռացումն է, սակայն հեռացման ձեւը կարգաւորման կարիք ունի:

 

LEAVE A REPLY

Please enter your comment!
Please enter your name here