ԹՈՒՐՔ ԼՐԱԳՐՈՂ ՄԸ ԴԱՏԱՐԱՆԻՆ ՄԷՋ ԿԸ ԿՐԿՆԷ ՀԱՅՈՑ ՑԵՂԱՍՊԱՆՈՒԹԵԱՆ ԵՒ ՀՐԱՆԴ ՏԻՆՔԻ ՍՊԱՆՈՒԹԵԱՆ ՄԱՍԻՆ ԻՐ ՊՆԴՈՒՄՆԵՐԸ

0
126

Թուրք լրագրող մը՝ Թեմել Տեմիրել, որ Պոլսոյ «Ակօս» թերթի հայազգի խմբագրապետ Հրանդ Տինքի սպանութեան յաջորդ օրն իսկ յայտարարած էր, թէ «Հրանդ Տինք սպաննուած է հայ ըլլալուն եւ Հայկական Ցեղասպանութեան իրողութեան մասին խօսելուն համար», Չորեքշաբթի, Փետրուար 20ին, դատարանին մէջ կրկնած է նոյն խօսքերը:
«Հիմա ալ նոյն «յանցագործութիւն»ը կը գործեմ՝ Տինքի մարդասպանը պետութիւնն է: Թող կրկին դէմս հայց ներկայացնեն: Այսօր բոլորն ալ գիտեն Հայկական Ցեղասպանութեան իրողութեան մասին», ըսած է ան:
Ըստ թրքական «Պիանեթ» կայքին՝ Տեմիրել Թուրքիոյ մէջ կը մեղադրուի քրէական օրէնսգիրքի «թրքականութիւնը վիրաւորելու» տխրահռչակ 301րդ յօդուածով:
Անգարայի քրէական գործերու դատարաններէն մէկուն մէջ, ուր տեղի ունեցած է լրագրողին դէմ բացուած դատին հերթական նիստը, անոր փաստաբան Լեւենթ Քանաթ պահանջած է դատարանէն արդարացման վճիռ արձակել լրագրողին նկատմամբ՝ պնդելով, թէ Տեմիրելի յայտարարութիւնները խօսքի ազատութեան սահմաններուն մէջ կ՛իյնան:
Դատարանը որոշած է յետաձգել լրագրողին նկատմամբ հետաքննութիւնը եւ դատական գործընթացը:

 

LEAVE A REPLY

Please enter your comment!
Please enter your name here