«ՉԵՄՓԻԸՆԶ ԼԻԿ» – ՄԻԼԱՆ ՑՆՑԵՑ ՊԱՐՉԵԼՈՆԱՆ

0
146

Եւրոպայի ախոյեան ակումբներու «Չեմփիընզ Լիկ» բաժակի  նոք-աութ   հանգրուանի երթի մրցումներուն գծով,  Իտալիոյ Սան Սիրօ  (Կիւսեփէ Մէազա) մարզադաշտին մէջ, 75 հազար  մարզասէրներու ներկայութեան, տեղւոյն  Ա.Սէ. Միլանը ընդունեց  Պարչելոնան եւ  երկու անպատասխան գնդակ  զետեղեց անոր  բերդին մէջ:

  Հանդիպման առաջին կիսախաղը 0-0 հաւասարութեամբ աւարտելէ ետք, Բ. Կիսախաղի  12-րդ վայրկեանին  Քեւին  Փրինս Պոթենկ  յառաջ մղեց իտալական խումբը:  Մրցումի 81-րդ  վայրկեանին, Սուլէյ Մոնթարիի  գեղեցիկ կոլը կրկնապատկեց   հաշիւը:  Ճակատումը վերջ գտաւ՝ 2-0  Միլանի յաղթանակով:  Սոյն  յաղթանակը  բաւական  մեծ  յոյսեր  պիտի  ներշնչէ մարզիչ Մասիմիլիանօ Ալեկրիի կազմին: Դարձի  մրցումը  տեղի պիտի ունենայ  12 Մարտին, Պարչելոնայի մէջ: Մրցումին  աւարտէն ետք, Միլանի մարզիչը ցաւ յայտնեց, որ իր կազմը չէր նշանակած երրորդ կոլ մը:

Օրուան երկրորդ հանդիպումին,  Կալաթասարայ՝ 1-1 արդիւնքով հաւասարութիւն մը արձանագրեց Շալքէ 04-ի դէմ: Պուրաք Եըլմազ, 12-րդ վայրկեանին   նշանակեց թրքական  խումբին կոլը: Ա. Կիսախաղի  45-րդ վայրկեանին,  Ճերմէյն Ճոնզ  հաւասարեցուց հաշիւը:

ՏԷՅՒԻՏ  ՃԻԼ ՊԻՏԻ  ՀՐԱԺԱՐԻ

 

Տէյվիտ Ճիլ յայտարարեց, թէ  30 Յունիսին պաշտօնապէս պիտի հրաժարի  Մանչեսթըր Եունայթըտ ակումբի վարիչ  տնօրէնի պարտականութենէն: 55-ամեայ  Ճիլ յայտնեց, թէ իր մեկնումը պիտի նպաստէ  թարմ ուժերու մուտքին.«Որոնք անպատճառ  իրենց  նոր գաղափարներով պիտի բարելաւեն ակումբին պայմանները».ըսաւ ան:

Ճիլ, 1997-ին միացած էր Մանչեսթըր Եունայթըտ ակումբին, իբրեւ  ելեւմտական հարցերու տնօրէն: 2003-ին նշանակուեցաւ վարիչ տնօրէն: Ան   շնորհակալութիւն  յայնտեց բոլոր այն անձնաւորութիւններուն  որոնց հետ  գործակցած էր իր կեցութեան 16 տարիներուն ընթացքին:  Քուլիսներու ետին, կ’ըսուի, թէ  Մանչեսթըր Եունայթըտի մարզիչ Սըր Ալեքս Ֆերկիսըն  փորձած է  համոզել Ճիլը, որպէսզի վերանայի իր որոշումին,  վերջինս  մնացած է անդրդուելի:

LEAVE A REPLY

Please enter your comment!
Please enter your name here