ՄՈՍԿՈՒԱ ՊԻՏԻ ԸՆԴՈՒՆԻ ՍՈՒՐԻՈՅ ԸՆԴԴԻՄՈՒԹԵԱՆ ՆԵՐԿԱՅԱՑՈՒՑԻՉՆԵՐ

0
156

 Ռուսիոյ փոխարտաքին գործոց նախարար Միխայիլ Պոկտանով յայտարարեց, որ Մոսկուա 25 Փետրուարին պիտի հիւրընկալէ Սուրիոյ արտաքին գործոց նախարար Ուալիտ Մոալլեմը, իսկ սուրիական ընդդիմադիր Ազգային համաձայնական խորհուրդը պիտի հիւրընկալէ 5 Մարտէն ետք, հաւանաբար 6 Մարտին, ինչ որ կը նշանակէ, թէ անոնք ուղղակի հանդիպում ունենալու առիթ պիտի չունենան, իսկ Մանաֆ Թլասը` 1 Մարտին: Պոկտանով նաեւ նշեց, որ Ուաշինկթըն դադրած է Մոսկուայէն պահանջել Ասատի վրայ ճնշում բանեցնել, որպէսզի վերջինս հեռանայ իշխանութենէն:

Նշենք, որ Պոկտանով «Մայատին» արբանեակային պատկերասփիւռի կայանին յայտնած է, որ սուրիացի ընդդիմադիր գործիչ Հասան Մաննահ 11 Մարտին Մոսկուա պիտի այցելէ:

«Շարք Աուսաթ» օրաթերթին հետ հարցազրոյցի մը ընթացքին պատասխանելով Սուրիոյ հարցով ՄԱԿ-ի եւ Արաբական Լիկայի յատուկ պատուիրակ Լախտար Իպրահիմիի սուրիական կառավարութեան եւ ընդդիմութեան միջեւ երկխօսութիւնը Նիւ Եորքի մէջ ՄԱԿ-ի հովանիին տակ կատարելու առաջարկին Պոկտանով ըսաւ, որ «Մոսկուա կ՛առաջարկէ այստեղ` Ռուսիոյ մայրաքաղաքին մէջ երկխօսութիւնը հիւրընկալել, սակայն եթէ երկու կողմերը ընդունեցին հանդիպում ունենալ ՄԱԿ-ի Ժընեւի կեդրոնատեղիին մէջ, զոր աշխարհագրականօրէն մօտ ըլլալուն պատճառով Նիւ Եորքէն աւելի լաւ կը նկատենք, ապա ոչ ոք պիտի առարկէ»: «Կարեւորը երկխօսութեան մասնակիցներուն անունները ճշդելու, օրինակի համար, թէ Ալի Հայտարը անընդունելի է եւ նախընտրելի է Ֆարուք Շարեհը ըլլայ, վիճելի հարցերէն հեռու մնալն է», ըսաւ ան:

Խօսելով ռուս-ամերիկեան հաղորդակցութեանց եւ Միացեալ Նահանգներու արտաքին գործոց նոր նախարար Ճոն Քերրիի ճկունութեան մասին` Պոկտանով ըսաւ, որ «Ճոն Քերրի շինիչ ուղիով կ՛ընթանայ, եւ այն, ինչ որ Լաւրովի հետ հեռաձայնային զրոյցներու ընթացքին տեղի ունեցաւ, անոնք երկու անգամ զրուցեցին եւ համաձայնեցան կարելի եղածին չափ մօտիկ ժամանակին հանդիպիլ, կը հաստատէ, որ արդարացի է յուսալ, որ ամերիկացիներու հետ աշխատանքը արդիւնաւէտ պիտի ըլլայ, մանաւանդ որ երկու կողմերը համաձայն են գլխաւոր սկզբունքներուն շուրջ, որոնք են` սուրիական հողերու միութեան, Սուրիոյ գերիշխանութեան պահպանումը, ինչպէս նաեւ տագնապին քաղաքական լուծումը, եւ մենք յոյս կը յայտնենք, որ մեր ամերիկացի բարեկամները սուրիական ընդդիմութեան մօտ անհրաժեշտ ջանքը թափեն, որպէսզի անոնք երկխօսութեան նկատմամբ ճկունութիւն ցուցաբերեն, ինչ որ առիթ կ՛ընծայէ առնչակից կողմերուն նստելով երկխօսութիւն կատարելու»:

Մէկ  օր առաջ Միացեալ Նահանգներ ՄԱԿ-ի Ապահովութեան Խորհուրդին մէջ արգելակած է Ռուսիոյ առաջարկած նախագիծը` Դամասկոսի մէջ տեղի ունեցած ահաբեկչութիւնը դատապարտելու եւ զոհերու հարազատներուն ցաւակցութիւն յայտնելու մասին:

«Դժբախտաբար, Միացեալ Նահանգներու պատուիրակութիւնը արդէն քանիերորդ անգամ ըլլալով կ՛արգելակէ Ապահովութեան Խորհուրդին կողմէ ահաբեկչական գործողութեան անհրաժեշտ պատասխանը` ատիկա պատճառաբանելով այլ հարցերով: Ակնյայտ է, որ Միացեալ Նահանգները այդ ձեւով զանոնք կը խրախուսէ», նշուած էր ՄԱԿ-ի մէջ Ռուսիոյ ներկայացուցչութեան մամլոյ հաղորդագրութեան մէջ:

Միացեալ Նահանգներու պետական քարտուղարութեան բանբեր Վիքթորիա Նուլանտ յայտարարած է, որ Միացեալ Նահանգներ կը դատապարտէ Դամասկոսի մէջ տեղի ունեցած ահաբեկչական արարքը եւ մտադիր են զայն քննարկել սուրիական ընդդիմութեան հետ:

ՄԱԿ-ի ընդհանուր քարտուղար Պան Քի Մուն դատապարտեց Դամասկոսի մէջ տեղի ունեցած ականահարումներու շարքը եւ դարձեալ կոչ ուղղեց` բռնարարքները դադրեցնելու եւ Սուրիոյ մէջ տագնապի քաղաքական լուծումի մը հասնելու ուղղութեամբ ջանք թափելու` նշելով, որ «քաղաքական լուծումը (Սուրիոյ տագնապի լուծման) միակ ուղին է»:

 

LEAVE A REPLY

Please enter your comment!
Please enter your name here