ԱՄԲՈՂՋԱԿԱՆ ՅԱՂԹԱՆԱԿԻ ԳՐԱՒԱԿԱՆԸ

0
199

 Հայ  ժողովուրդը այս օրերուն  տարբեր  տարողութեամբ տօնախմբութիւններով կը  վերարժեւորէ   քառորդ դարեայ  ճամբայ հատած Արցախեան  Շարժումը: Ոգեշունչ  խօսքեր,  փառաբանութիւններ, այս բոլորը  հասկնալի են ու արդար: Դարերով ընկճուած  եւ ազատագրական պայքարի  դառն  փորձառութիւն ապրած  մեր ժողովուրդը  Արցախեան   Շարժման  շնորհիւ  վերահաստատեց իր  իրաւունքներուն տէր կենալու  յանձնառութիւնը, վերականգնեց իր ոտնահարուած արժանապատուութիւնը  եւ վերատիրացաւ  իր պատմական հայրենիքի մէկ  հատուածին: Արցախեան  Շարժումը  հայ  ժողովուրդի նորօրեայ  վերածնունդն էր  բռնատիրութեան դէմ: Ազատ ապրելու անոր դարաւոր  պոռթկումը:

Արցախեան  Շարժումը  անկիւնադարձային  նշանակութիւն ունեցաւ հայ ժողովուրդին ճակատագրին վրայ:  Ան միաժամանակ   դարձաւ Հայաստանի մէջ  անարիւն իշխանափոխութեան  մղիչ ուժը, նոր պետականութեան ողնասիւնը:  

Մեր ազգային ու հայրենական իրականութեան մէջ  վերջին տասնօրեակը  յատկանշուեցաւ     երեք կարեւոր եղելութիւններով: Հայաստանի  նախագահական ընտրութիւնները, Մայրենիի  Օրը եւ  Արցախեան  Շարժման  տարեդարձը: Երեւութապէս  իրարմէ  անջատ, բայց խորքով  իրարու հետ  շաղախուած  վերոյիշեալ իրադարձութիւններուն հիմքը հայոց պետականութիւնը վերականգնելու  գաղափարն է:  Այն գաղափարախօսութիւնը, որմէ  ծնունդ առաւ Արցախեան  Շարժումը: Խումբ մը նուիրեալներու քառորդ  դար առաջ  գնահատելի   փորձը,  այսօր առաւել  հրամայական  կը դառնայ   մեր ժողովուրդին համար:  Ահաւասիկ Արցախեան  Շարժումի գաղափարախօսութիւնը:

 Քսան եւ հինգ տարուան աւանդէն ետք,  արձանագրուած նոուաճումներուն զուգահեռ  պիտի  ընդունինք, թէ համընդհանուր ցաւ մը կը տիրէ  բոլորիս մօտ:  Հատուածական  շահեր եւ  մենաշնորհեալներու  իրողութիւնը   կը քայքայեն ժողովրդավար  պետականութիւն կառուցելու  գործընթացը:  Քաղաքացին կ’ապրի  յուսախաբութիւն եւ կը   բռնէ օտար    հորիզոններու տակ  իր կեցութիւնը  ապահովելու  ճամբան:  Միւս կողմէ,  Մայրենին  կը նահանջէ  Սփիւռքի եւ  հայրենիքի մէջ: Լեռնային  Ղարաբաղի հրադադարը կը պահպանուի  մտահոգիչ խախտումներով:  Խախտա՞ծ է  արդեօ՞ք  Արցախեան  Շարժումի  ոգին:  Այսօր նոյնպէս   մեզի անհրաժեշտ են ուղղորդուած   նուիրեալներ, որուն համար մենք՝ Արցախեան Շարժումի  ժամանակակիցներս, պարտաւոր ենք յաւուր պատշաճի  արժեւորելու շարժման դերակատարութիւնը, որպէսզի  ձեւաւորենք  հայրենասէր  սերունդ: Իրաւունք չունինք ընկրկելու յորձանուտներու առջեւ, ընդհակառակը՝ մեր ամբողջ ուժականութիւնը պիտի  դնենք ի խնդիր համազգային արժէքներու պահպանութեան,Արցախի  հանրապետութեան միջազգային   ճանաչման եւ պահանջատիրական պայքարին յաղթանակին:

Վերոյիշեալ մարտահրաւէրներուն դէմ մեր ուղեցոյցը անկասկած պիտի ըլլայ  Արցախեան Շարժումի ոգին,  հրաշագործ այն ոգին, որուն   շնորհիւ  քառորդ դար  առաջ ազգովին  լծուեցանք  կառուցելու հզօր, ժողովրդավար եւ ընկերային  արդարութեան  վրայ յենած պետականութիւն:  Դարերով  ազատազրկուած մեր   ժողովուրդը   չի կրնար ետդարձ կատարել  իր ընտրանքէն:

Ինչ խօսք, որ մերօրեայ տօնախմբութիւններուն մեծագոյն բացակաները պատերազմի ճակատներուն  վրայ ինկած  մեր  նահատակներն են: Անոնք ինկան որպէսզի իրականանայ մեր համաժողովրդային երազը: Անոնք  ճակատներու վրայ  մնացին, որպէսզի  իրենց աւիւնով եւ  կորովով վերածնի մեր  հայրենիքը: Անոնք  նուիրաբերեցին ամենաթանկագինը,  որպէսզի  մեր  ժողովուրդը ազատ եւ  ինքնուրոյն  տնօրինէ իր   ճակատագիրը:

Ֆիզիքապէս  ներկայ  չեն անոնք, բայց   հոգեպէս իւրաքանչիւրիս հետ  շաղախուած պիտի  մնան  հերոսապատումի այդ լուռ  վկաները:  Արցախեան  Շարժումի  տօնական  այս   օրերուն,  իւրաքանչիւր  հայորդի  պարտի  հաշուետուութիւն տալ  ինք՝ իր խղճին առջեւ. Որքան՞ով  յանձնառու  կը մնանք մենք, նահատակներուն  երազին, որպէսզի անոնց մայրերը շարունակեն   հպարտութեամբ  խօսիլ իրենց  զոհուած զաւակներուն մասին,  Արցախեան  ոգիին  մասին:

Համաժողովրդական  պայքարը  միայն  ոգեւորութիւն չէ   այլեւ՝ զոհողութեան  յանձնառութիւն:  Մենք պատրա՞ստ ենք շարունակելու Արցախեան  Շարժումին պատգամները:  Կոչերն ու խօսքերը  շատ համեստ են իբրեւ  հաւատարմութիւն  անոնց ուխտին: Համընդհանուր  զօրաշարժի մը  հրամայականը խիստ անհրաժեշտ դարձած է  Սփիւռքի եւ  հայրենիքի համար: Արցախեան  Շարժումի տարեդարձը  զգաստութեան եւ հաւաքական պատասխանատուութեան  հրաւէր  է  բոլորիս՝ անխտիր: Ամէն բանէ առաջ պիտի ունենանք ազգային   յստակ  հայեցակարգ եւ  կերտենք  մեր  հայրենիքի սահմանագիծերը անառիկ պահող հզօր բանակ: Պայքարով նուաճուած անկախութիւնը  անխախտ եւ ամուր պահելու համար անհրաժեշտ է  Սփիւռք – Հայրենիք –Արցախ՝  միաբեւեռ եւ  ամբողջական  միասնականութեան վրայ  յենած   համագործակցութիւն:

Քառորդ դար առաջ  ծնած Արցախեան  Շարժումը  իր  բիւրաւոր նահատակներով  լուսաւոր  նոր էջ  բացաւ մեր ժողովուրդի պատմութեան մէջ:  Պատրաստ են՞ք  դառնալու անոնց արժանաւոր  շարասիւնը …:     

ԱՀԱՐՈՆ  ՇԽՐՏԸՄԵԱՆ

LEAVE A REPLY

Please enter your comment!
Please enter your name here