ՊԱՐՉԵԼՈՆԱ, ԵՈՒՎԵՆԹՈՒՍ ԵՒ ՄԱՆՉԵՍԹԸՐ ԵՈՒՆԱՅԹԸՏ ԿԸ ՍՈՒՐԱՆ – ՄԵՍԻԻ ՆՈՐ ՄՐՑԱՆԻՇԸ

0
157

Գաթալոնական Պարչելոնա խումբի արժանթինցի յարձակող   Լիոնէլ  Մեսի հերթական  նոր մրցանիշը հաստատեց Սպանիոյ ֆութպոլի ախոյեանութեան մրցումներուն:   Արդարեւ, Սեւիլիայի դէմ  իր կազմին արձանագրած   2-1 յաղթանակին ընթացքին,  Մեսի նշանակեց մրցումին երկրորդ եւ   յաջորդական իր   15-րդ կոլը:  Տաւիտ Վիլա նշանակեց   Պարչելոնայի  առաջին կոլը:  Պարչելոնա ներկայիս  68 կէտով  կը գլխաւորէ ախոյեանութեան ընդհանուր դասաւորումը: Իր ֆութպոլային  ասպարէզի կատարած 444  մրցումներուն ընթացքին, Լիոնէլ Մեսի  նշանակած է 333 կոլ:

Սպանիոյ Ֆութպոլի ախոյեանութեան  25-րդ հանգրուանի մրցումներուն գծով,   Վալենսիա՝ 2-2 արդիւնքով հաւասարութիւն մը ձեռք բերաւ  Սարակոզայի դէմ, այս  վերջնոյն դաշտին մէջ:  Պրազիլիացի Ժոնաս նշանակեց Վալենսիայի  կոլերը:  Ներկայիս, Վալենսիա 41 կէտով կը գրաւէ ընդհանուր դասաւորման 5-րդ   դիրքը:  Մայորքա,  սեփական դաշտին մէջ  3-1արդիւնքով պարտուեցաւ  Կեթաֆէյէն:  Մայորքա  ներկայիս կը գրաւէ ընդհանուր դասաւորման նախավերջին դիրքը:  Ռէալ Մատրիտ  2-1 արդիւնքով   պարտութեան մատնեց  աղիւսակը եզրափակող Տեփորթիվօ Լա Գորունայի դէմ:  ՔաՔա  եւ  Իկուային   նշանակեցին մայրաքաղաքի կազմին կոլերը:

Իտալիոյ ֆութպոլի ախոյեանութեան  26-րդ հանգրուանի մրցումներուն գծով՝ Եուվենթուս  3-0 արդիւնքով պարտութեան մատնեց   Սիէնան:  Շթեֆան  Լիխշթայնըր, Սեպասթիան    Ճովինկօ եւ   Փօլ Պոկպա  նշանակեցին  «Ծեր Պառաւ»ին կոլերը:  Եուվէ՝  58 կէտով կը գլխաւորէ ախոյեանութեան  ընդհանուր դասաւորումը:   Պոլոնիա-Ֆիորենթինա հանդիպումը յետաձգուեցաւ  անբարենպաստ եղանակի պատճառով:

Անգլիոյ  Ֆութպոլի ախոյեանութեան  27-րդ  հանգրուանի մրցումներուն, Մանչեսթըր Եունայթըտի կազմը  Լոնտոնի մէջ 2-0 արդիւնքով պարտութեան մատնեց Քուինզ Փարք Ռէյնճըրզը: Ռաֆայէլ եւ Ռայըն Կիկզ նշանակեցին «Կարմիր Սատանաներ»ուն  կոլերը: Ի դէպ  Կիկզ,   իր  999-րդ մրցումը կատարեց  Եունայթըտի  շապիկով: Մրցումի Ա. Կիսախաղին, Ռոպին Վան Փըսրի վնասուածքի հետեւանքով    հեռացաւ դաշտէն:  Հոլանտացի  ֆութպոլիստը 19 կոլով կը գլխաւորէ Փրըմիյէրշիփի գլխաւոր  ռմբարկուներու աղիւսակը՝ մէկ կոլով գերազանցելով  Լուիս Սուարէզը  ( Լիվըրփուլ): Սըր Ալեքս Ֆերկըսընի կազմը ներկայիս  68 կէտով կը գլխաւորէ ընդհանուր աղիւսակը:  Մանչեսթըր Սիթի  ունի 53 կէտ,Արսենալ՝ 47,  իսկ վերջին դիրքը գրաւող Քուինզ Փարք Ռէյնճըրզ՝ 17 :

Լոնտոնի մէջ, Արսենալ  2-1 արդիւնքով պարտութեան  մատնեց Ասթոն Վիլան:  Սանթի  Կազրոլլա նշանակեց  «Կանըրզ» ներուն  կոլերը:  Դարձեալ  Լոնտոնի մէջ ,  Ֆուլամ  1-0 արդիւնքով պարտութեան մատնեց Սթոք Սիթին:  Տիմիթար Պերպաթով նշանակեց   Ֆուլամի  եւ մրցումին յաղթանակի  կոլը:

  27-րդ հանգրուանի ամենասպասուած  հանդիպումը տեղի ունեցաւ  ՄԱնչեսթըրի մէջ, ուր  շնորհիւ Եայիա  Թուրէի եւ Գարլոս Թեւէզի կոլերուն, Մանչեսթըր Սիթի 2-0 արդիւնքով պարտութեան մատնեց Չելսին:  Մարզիչ Ռոպերթօ Մանչինիին խումբը ներկյիս  հաւաքած է 56 կէտ: Ան 12 կէտով կը զիջի առաջին դիրքի վրայ  գտնուող  Մանչեսթըր Եունայթըտին:

 Սուանսի Սիթի  շահեցաւ  Անգլիոյ   «Լիկ Գափ»ը:  Ուեմպլիի մէջ կայացող  աւարտականի մրցումին, Սուանսի՝ 5-0 արդիւնքով պարտութեան մատնեց  Պրետֆորտ Սիթին:

Գերմանիոյ Ֆութպոլի ախոյեանութեան  23-րդ հանգրուանի մրցումներուն,   Պայերն Միւնիխ  6-1 արդիւնքով   ջախջախեց   Վերտէր Պրեմէնը:  Մարիօ Կոմէզ (2), Արիան Ռոպէն, Զաւի  Մարթինեզ եւ Ֆրանք Ռիպերի նշանակեցին   պաւարիական կազմին կոլերը: Պրեմէնի  չեխ պաշտպան Սելասի  սեփական բերդէն ներս նշանակեց կոլ մը, ամբողփացնելով իր խումբին  ողբերգութիւնը:  Պայերն ներկայիս  ունի  60 կէտ եւ  18 կէտով  կը գերազանցէ   երկրորդ դիրքը գրաւող  Պորուսիա Տորթմունտը:  Վերտէրը  28 կէտով կը գտնուի  11-րդ դիրքի վրայ: Միւս կողմէ, Հանովըր 96՝  5-1 արդիւնքով ծանր պարտութեան մատնեց   Համպուրկը:  Շալքէ 04՝  2-1 արդիւնքով  պարտութեան մատնեց    Այնթրախթ Ֆրանքֆորթը:  Գամերունցի  Ժոյէլ  Մատիպի նշանակեց  Շալքէի  զոյգ կոլերը:  Վերջինս  ներկայիս 33 կէտով կը գրաւէ ընդհանուր դասաւորման 9-րդ դիրքը:   

Մէօնշենկլատպախի եւ Տորթմունտի Պորուսիաներուն  միջեւ ճակատումը վերջ գտաւ  1-1 հաւասարութեամբ:  Մարիօ Կէոցէ   նշանակեց մրցումին եւ  Մէօնշենկլատպախի   առաջին կոլը:  Ամին Եունէս ՝ Տորթմունտի:  Պորուսիա Տորթմունտ  43 կէտով կը  գրաւէ ընդհանուր դասաւորման  երկրորդ դիրքը:

 Ֆրանսայի ախոյեանութեան  26-րդ հանգրուանի մրցումներուն գծով,  Լիոն 3-1 արդիւնքով պարտութեան մտնեց  Լորիանը:  Լիոն ներկայիս  հաւաքած է  51  կէտ:

 

ՄԱՐԶԱԿԱՆ ԿԱՐՃ ԼՈՒՐԵՐ

–          Ռոպին Վան  Փըրսի պիտի   բացակայի  իր կազմին   Ռէալ  Մատրիտի դէմ կատարելիք «Չեմփիընզ Լիկ»ի դարձի մրցումէն:  Բժիշկները  առնուազն տասը օր  հանգիստ  թելադրած են  29-ամեայ  հոլանտացիին:

–         Բրիտանական  թերթերուն համաձայն,  Մանչեսթըր Սիթի կը փափաքի ձեռք բերել  Սեւիլիայի եւ Սպանիոյ ազգային խումբի  կիսապաշտպան   Խեսուս Նաւասը:  27-ամեայ  Խեսուսի  փոխանցումը պիտի արժէ 20 միլիոն  եուրօ:

–         Աթլեթիքօ Մատրիտը կրնայ գնել  Զենիթի  փորթուգալացի  պաշտպան   Պրունօ Ալվեսը: 31-ամեայ մարզիկին  փոխանցման սակին շուրջ ներկայիս  չկան  մանրամասնութիւններ:

–         Սուանսի Սիթիի սպանացի  մարզիկ  Անխէլ  Ռանխել յայտարարեց, թէ  Մայքըլ Լաուտրուփ  կրնայ մարզել Ռէալ Մատրիտը:  Վերջերս  յաճախ կը նշուի, թէ  Ժոզէ Մորինիօն   հեռանալու պարագային,  Սուանսիի գլխաւոր մարզիչ  Մայքըլ Լաուտրուփ  կրնայ   դիւրաւ ստանձնել այդ պաշտօնը:

–         Արսենալի  գլխաւոր մարզիչ  Արսէն  Ուենկէր որոշած է փոփոխութեան ենթարկել փոխանցումներու քաղաքականութիւնը : Ակումբին տնօրէնութիւնը  որոշած է  բաւական կոկիկ  գումար մը  յատկացնել Ուենկէրին՝  կազմը  համալրելու նպատակով:  Ուենկէրի առաջին քայլը պիտի  ըլլայ  Աթլեթիքօ Մատրիտի  յարձակող  Ռատամէլ  Ֆալքաօն, որուն համար պատրաստ պիտի ըլլայ վճարելու 60  միլիոն սթերլին գումար մը:

–         Ուէյն Ռունիի կարծիքով,   Լիոնէլ Մեսի եւ Քրիսթիանօ Ռոնալտօ ֆութպոլի պատմութեան  լաւագոյն   խաղացողներն են:

–          Պարչելոնա  կը փափաքի երկարաձգել  31-ամեայ յարձակող Տաւիտ Վիլայի պայմանագրութիւնը: Վիլայի պայմանագրութեան  ժամկէտը կ’աւարտի 2014-ին:

–         Չելսի կը փափաքի իր կազմին մէջ ունենալ  Էվըրթընի մարզիկներէն՝ Լէյթըն Պէյնզը եւ Մարուան Ֆէլայնին:

–          Ռէալ Մատրիտ  մօտէն  կը հետեւի Մանչեսթըր Եունայթըտի  24- ամեայ յարձակող  Խաւիէ Ֆեռնանտէզի քայլերուն:  Վերջինս, այս տարեշրջանին կատարած 26 մրցումներու ընթացքին նշանակած է   15 կոլ:

–          

 

 

LEAVE A REPLY

Please enter your comment!
Please enter your name here