ՌԱՖՖԻ ՅՈՎՀԱՆՆԷՍԵԱՆ ԱՅՍՕՐ ՊԻՏԻ ԱՅՑԵԼԷ ՇՐՋԱՆՆԵՐ

0
109

 Ժառանգութիւն կուսակցութեան ղեկավար Ռաֆֆի Յովհաննէսեան  Երկուշաբթի օր  տուաւ մամլոյ ասուլիս մը, որուն ընթացքին անդրադարձաւ 18 Փետրուարին կայացած նախագահական ընտրութիւններու արդիւնքներուն, համաժողովրդային շարժման, անոր՝ ժողովուրդին մասնակցութեան կարեւորութեան, ինչպէս նաեւ իրենց առնելիք կարգ մը քայլերուն։
Յովհաննէսեան ըսաւ, որ երկու ամիս առաջ հաւատաց Հայաստանի ժողովուրդին, իսկ ժողովուրդը հաւատաց իրեն, ուստի մղուեցաւ համապետական պայքար:
«Մեր ժողովուրդն ապացուցեց, որ կամազուրկ չէ, ինչպէս իրեն կարծում են իշխանութիւնները: Ժողովուրդը Փետրուարի 18-ին յայտարարեց, որ Հայաստանն իր պետութիւնն է, եւ ինքը լիիրաւ տէրն է երկրի», յայտնեց ան:
«Ժառանգութեան» ղեկավարը հաստատեց, որ հայ ժողովուրդը 18 Փետրուարին իր ձեռքին ունեցաւ իշխանութիւնը եւ անհրաժեշտութեան պարագային պէտք է պատրաստ ըլլայ մնայուն ստեղծագործ պայքարի. «Ժողովուրդը չպէտք է յոգնի այդ պայքարում, քանի որ ես միայնակ չեմ կարող վարել այդ պայքարը: Ուստի ես յայտարարում եմ, որ պէտք է միասին պայքար մղենք: Այդ պայքարը չի սահմանափակուելու Ազատութեան հրապարակում հանրահաւաքներով, մենք պայքարելու ենք այնքան ժամանակ, քանի դեռ Բաղրամեան 26-ում չգիտակցեն, որ ժողովուրդն արդէն կողմնորոշուել եւ արել է իր ընտրութիւնը»:
Ան դիտել տուաւ, որ այս քաղաքական պայքարին ընթացքին ոչ մէկ բան հինգ տարի առաջ տեղի ունեցածին նման է եւ այս անգամ «ուղղահայեաց մօտեցում չկայ»: «Ես ասել եմ, որ իմ կեանքի գնով թոյլ չեմ տալու, որ մի կաթիլ արիւն թափուի», շեշտեց ան՝ աւելցնելով, որ ինք ունի քաղաքացիական եւ անհատական պատասխանատուութիւն:
Յովհաննէսեան հաստատեց, որ ինք՝ իբրեւ համազգային եւ համաժողովրդական այս շարժման մէկ մասնիկը, ամէն ինչ պիտի ընէ, որպէսզի ժողովուրդը յուսախաբ չըլլայ: «Մենք գործելու ենք խաղաղ, հետեւողական քայլերով, եւ թող ոչ ոք մեզ չխանգարի»։
«Զադնի չտանք, իրաւունքով, խաղաղ ճանապարհով, թող ոչ ոք չխոչընդոտի մեր ուսանողներին, զինուորին, ես իրենց կողքին եմ լինելու», նշեց  ան:
Այս առիթով ան շնորհակալութիւն յայտնեց  ընտրական գործընթացին իրեն օժանդակած կամաւորներուն, «Ժառանգութեան», այլ կուսակցութիւններու ներկայացուցիչներուն, անկուսակցականներուն, վստահուած անձերուն: «Սա Րաֆֆիի եւ Սերժի պայքար չէ, ոչ էլ՝ «Ժառանգութեան» եւ Հայաստանի Հանրապետական կուսակցութեան» մենամարտ, այլ՝ ժողովրդի պայքար»։
Պատասխանելով լրագրողներուն հարցումին՝ Յովհաննէսեան յայտնեց, որ կը բացառէ արտակարգ խորհրդարանական ընտրութիւններու հարցը: «Բացառւում է, ես տարբեր առաջարկներ եմ արել Սերժ Սարգսեանին, նա մերժել է, օրակարգում հիմա ոչ մի բան չկայ։ Ես փորձեցի ոչ թէ քաղաքական նոր մթնոլորտ ստեղծել, այլ կանխել այս համազգային ճգնաժամը»:
Անոր համաձայն, ազգային համաձայնութեան կարելիութիւն կրնայ ըլլալ միայն տէ ժիւրէ սահմանադրական ընտրութիւններու պարագային: «Նուազագոյնը մենք պէտք է ունենանք բոլոր հարցերի սահմանադրական լուծում, պէտք է նախագահական նոր ընտրութիւն լինի, եւ թէ՛ Սերժը, թէ՛ Ռաֆֆին պէտք է յետ կանգնեն իրենց հռետորութիւններից», յայտնեցէ ան՝ նշելով, որ ունի իր անձնական պատասխանատուութիւնը՝ սահմանադրական բոլոր չափանիշներով:
Խօսելով ընտրութիւններուն արդիւնքին մասին՝ Ռաֆֆի Յովհաննէսեան ըսաւ, որ ԿԸՅ-ն եւ իր անդամները պէտք է ենթարկուին խստագոյն պատասխանատուութեան՝ իրենց ակնյայտ հակաօրինական կեցուածքին համար: «Իրենք տիրապետելով ողջ տեղեկատուութեանը, բռնութիւնների, խախտումների, լցոնումների մասին, չկարողացան, պէտք է պատասխանատուութիւն կրեն դրա համար»։
Յիշեցնենք, որ 25 Փետրուարին ԿԸՅ-ն արտակարգ նիստով ամփոփեց նախագահական ընտրութիւններուն վերջնական արդիւնքները եւ պաշտօնապէս հաստատեց, որ Հայաստանի նախագահ ընտրուած է Սերժ Սարգսեանը: Ռաֆֆի Յովհաննէսեանի համաձայն, իրենք հինգ օր ունին Սահմանադրական Դատարանին մէջ բողոքարկելու համար, իր խօսքերով, հակահայկական ընտրութիւններուն արդիւնքները:
«Սահմանադրական Դատարան դիմելու հարցը քննարկուելու է յառաջիկայ օրերին, թէեւ շատերը, այդ թւում մեր երիտասարդ բարեկամ Նիկոլը, կարծում են չարժի: Հայ ժողովուրդը եւ դուք հաւատացիք, որոշուեց փոխել գործադիր իշխանութիւնը եւ նախագահութիւնը, մենք կարող ենք փոխել նաեւ մեր դատական համակարգը», ըսաւ Րաֆֆի Յովհաննէսեան: «Մենք կը քննարկենք այդ հարցը եւ որոշում կը կայացնենք: Սրանք կեղծուած ընտրութիւններ են, եւ բոլոր կեղծարարները պէտք է պատժուեն: Բացառւում է, որ ես ընդունեմ կեղծուած ընտրութիւնների արդիւնքները»։
Ան ըսաւ, թէ չի բացառուիր, որ թոյլ տան Սահմանադրական դատարանի ներկայացուցիչներուն վերջին անգամ ըլլալով սահմանադրական իրաւունքը գործածելու եւ վերջին անգամ ըլլալով Հայաստանի ժողովուրդին օգտին որոշում կայացնելու:
«Եթէ դիմենք Սահմանադրական Դատարան, դա կը լինի սահմանադրական դատարանի ճշմարտութեան պահը», յայտնեց ան:

Յովհաննիսեան նաեւ նկատել տուաւ, թէ 26 Փետրուարէն սկսեալ իր խումբի անդամները պիտի մեկնին մարզեր, ուր երախտագիտութիւն պիտի յայտնեն քաղաքացիներուն՝ իրենց աջակցութեան համար։ Սակայն ան պիտի  շարունակէ իր հանրահաւաքները: Այսօր՝  Երեքշաբթի,  Ռաֆֆի Յովհաննէսեան պիտի այցելէ Արմաւիր, Մեծամօր, Էջմիածին, Մասիս, Արտաշատ, Արարատ, Սուրէնաւան, Արենի, Եղէգնաձոր եւ Վայք: Իսկ շաբաթը պիտի ամփոփուի 2 Մարտին, Ազատութեան  Հարապարակի  վրայ  կայանալիք հանրահաւաքով։
Յովհաննիսեան ընդգծեց, որ Սերժ Սարգսեանին հետ շատ սիրալիր հանդիպում ունեցած է, եւ ինք նշած է, որ Սերժ Սարգսեան մեծ աւանդ ունի Արցախեան ազատամարտին մէջ: «Ես նշեցի, որ նա շահեկանօրէն տարբերւում է այլ քաղաքական գործիչներից: Նրա օրօք մամուլն աւելի բաց է դարձել», ըսաւ Ռաֆֆի Յովհաննէսեան՝ աւելցնելով, որ 2018-ինախագահական ընտրութիւններուն  չի փափաքիր  առաջադրել իր  թեկնածութիւնը։

 

LEAVE A REPLY

Please enter your comment!
Please enter your name here