ԼԱՒՐՈՎ՝ ԾԱՅՐԱՅԵՂԱԿԱՆՆԵՐԸ ԿԸ ԽՈՉԸՆԴՈՏԵՆ ԵՐԿԽՕՍՈՒԹԵԱՆ ՃԻԳԵՐԸ

0
161

Ռուսիոյ արտաքին գործոց նախարար Սերկէյ Լաւրով Գերմանիոյ մէջ հանդիպում մը ունեցաւ Միացեալ Նահանգներու իր պաշտօնակից Ճոն Քերիի հետ, քննելու համար Սուրիոյ տագնապին խաղաղ լուծում մը գտնելու կարելիութիւնները, շատ հաւանաբար՝ ժամանակաւոր կառավարութեան մը կազմութեան միջոցաւ:
Լաւրով յայտարարեց, թէ մօտաւորապէս երկու ժամ տեւած հանդիպումը «շինիչ» էր:
Հանդիպումէն անմիջապէս առաջ, Լաւրով ցաւ յայտնած էր, որ ծայրայեղականները գերազանցող ուժ մը դարձած են սուրիական ընդդիմութեան շարքերուն մէջ եւ անոնք կը խոչընդոտեն երկխօսութեան ջանքերը:
Մէկ օր առաջ, Լաւրով Մոսկուայի մէջ ունեցած էր Սուրիոյ արտաքին գործոց նախարար Ուալիտ Մուալլէմի հետ հանդիպում մը, որմէ ետք Մուալլէմ յայտարարած էր, թէ Դամասկոս պատրաստ է ընդդիմութեան, ներառեալ՝ զինեալ խմբաւորումներու հետ երկխօսութեան, յիշեցնելով, որ Սուրիոյ մէջ տեղի ունեցածը «ահաբեկչութեան դէմ պատերազմ» է:
Մինչ այդ, սուրիական ընդդիմադիր Ազգային համաձայնական մարմինի նախագահ Ահմէտ Մոազ Խաթիպ յայտարարեց, թէ Միացեալ Նահանգներ եւ Ռուսիա իր այցելութիւնները յետաձգուած են՝ «մինչեւ որ տեսնենք, թէ հարցերը ինչպէ՛ս պիտի զարգանան»:
«Մենք վարչակարգին հետ երկխօսութեան պայման նշեցինք արգելափակեալներու ազատ արձակումը, սակայն վարչակարգը մերժեց», ըսաւ ան, սակայն աւելցուց, որ կառավարութեան հետ երկխօսութեան նախաձեռնութիւնը ձախողած պէտք չէ համարել տակաւին:
Թրքական լրատուամիջոցներ հաղորդեցին, որ Թուրքիոյ վարչապետ Ռեճէպ  Թայիփ Էրտողան յայտնած է, որ «սուրիական հողերուն միութիւնը Թուրքիոյ համար շատ կարեւոր հարց է»՝ նշելով, որ Անգարա պիտի չարտօնէ «Իրաքի օրինակին կրկնութիւնը Սուրիոյ մէջ»:

LEAVE A REPLY

Please enter your comment!
Please enter your name here