ՎԱԼԵՐԻ ՊՈՒԱՅԷ ԹՐՔԱԿԱՆ ՍՊԱՌՆԱԼԻՔՆԵՐ ԿԸ ՍՏԱՆԱՅ

0
172

Ֆրանսայի մէջ Հայկական Ցեղասպանութեան ուրացումը քրէականացնող նոր օրինագիծ մը ներկայացուցած պատգամաւոր Վալերի Պուայէ յայտարարած է, որ իր կեանքին սպառնացող վտանգին պատճառով երբե՛ք պիտի չայցելէ Թուրքիա. այս մասին կը տեղեկացնէ թրքական «Միլլիյէթ» թերթը:
Անցեալ տարի, Ֆրանսայի խորհրդարանին օրինագիծ ներկայացուցած պատգամաւորը այս տարի երկու օրինագիծ ներկայացուցած է: Առաջինը կ՛առնչուի Ցեղասպանութեան ուրացման քրէականացման, իսկ երկրորդով կ՛առաջարկուի ստեղծել յանձնաժողով մը՝ անցեալ տարի վաւերացուած նման օրինագիծ մը Սահմանադրական խորհուրդին կողմէ հակասահմանադրական նկատուելու որոշումը հետաքննելու համար:
Ան կը պնդէ, թէ թրքական կառավարութեան կողմէ անարգուած է եւ սպառնալիքներու ենթարկուած: Պուայէ յայտարարած է նաեւ, որ «YouTube» կայքին վրայ իր հասցէին հայհոյանք եւ անարգանք պարունակող հարիւրաւոր նիւթեր կան:
«Լաւ որ թրքերէն չեմ հասկնար: Սակայն իմ եւ ընտանիքիս դէմ ֆրանսերէնով ալ սպառնալիքներ ստացած եմ: Ստիպուած եղայ շրջան մը ոստիկաններու պաշտպանութեան տակ ապրելու: Ես հայ-ֆրանսական բարեկամութեան խմբակի փոխնախագահն եմ: Հայկական Ցեղասպանութեան ուրացման պատժելիութեան համար պայքարս պիտի շարունակեմ», ըսած է ան:
Պատգամաւորը նշած է, որ նախապէս այցելած է Թուրքիա, սակայն հիմա, նոյնիսկ եթէ կառավարութիւնը խոստանայ երաշխաւորել իր ապահովութիւնը, ինք նման վտանգաւոր քայլի պիտի չդիմէ:
«Կառավարութիւնը չսպաննեց Հրանդ Տինքը, սակայն յայտնի չէ, թէ ո՛վ սպաննեց զայն», աւելցուցած է Պուայէ, նշելով, որ ինք Թուրքիայէն նաեւ զօրակցական նամակներ կը ստանայ: «Թուրքիոյ մէջ տակաւին մարդկային իրաւունքներու հաւատացող մարդիկ կան», եզրակացուցած է ան:

LEAVE A REPLY

Please enter your comment!
Please enter your name here