ԱՅՍՕՐ ՀՌՈՄԻ ՄԷՋ ՍՈՒՐԻՈՅ ԲԱՐԵԿԱՄՆԵՐՈՒ ԽՈՐՀՐԴԱԺՈՂՈՎ

0
347

 

Հռոմի մէջ այսօր՝  Հինգշաբթի  կայանալիք մօտաւորապէս 60 երկիրներու եւ Սուրիոյ կառավարութեան ընդդիմութեան ներկայացուցիչներու միջեւ հանդիպման նախօրեակին, Միացեալ Նահանգէներու արտաքին գործոց նախարար Ճոն Քերրի յայտարարեց, թէ Սուրիոյ նախագահ Պաշշար Ասատի հեռացումը ապահովելու համար՝ «կը կարծեմ, որ ընդդիմութեան յաւելեալ օժանդակութեանց կարիքը ունինք»:
Ֆրանսայի իր պաշտօնակից Լորան Ֆապիւսի հետ հանդիպումէն ետք կատարուած այս յայտարարութեան աւարտին, Քերրի մերժեց պարզաբանել, թէ ի՛նչ ձեւի օժանդակութեան մասին է խօսքը, սակայն «Ուաշինկթըն Փոսթ» թերթը կը գրէ, թէ Ուաշինկթըն այս հանգրուանին, հաւանաբար, սկսի զրահապատ փոխադրակառքեր, փամփշտարգելներ ու նոյնիսկ ընդդիմադիր զինեալներու մարզում տրամադրել:
Քերրի մէկ օր առաջ Պերլինի մէջ հանդիպում մը ունեցած էր Ռուսիոյ իր պաշտօնակից Սերկէյ Լաւրովի հետ՝ շեշտը դնելով Սուրիոյ իշխանութեանց եւ ընդդիմութեան միջեւ երկխօսութեան վրայ: Հանդիպումէն ետք կողմերը դրական նկատեցին զայն, սակայն ռուս քաղաքական մեկնաբաններ կը յայտնեն, թէ երկխօսութեան հարցը նեղ կացութեան կրնայ մատնել Ուաշինկթընը, որովհետեւ ընդդիմութիւնը միացեալ ճակատ մը չի ներկայացներ: Անոնք կը շեշտեն, թէ Մոսկուա տագնապին առաջին օրէն շեշտը դրած էր երկխօսութեան վրայ ու հաստատ կը մնայ այդ կեցուածքին, մինչ շաբաթասկիզբը Մոսկուա այցելած Սուրիոյ արտաքին գործոց նախարար Ուալիտ Մուալլէմ կրկնած էր, թէ Դամասկոս պատրաստ է բանակցելու ընդդիմութեան  հետ:
Ամերիկեան «Նիւ Եորք Թայմզ» թերթը ամերիկացի եւ արեւմուտքէն պաշտօնատարներէ քաղելով իր տեղեկութիւնները՝ կը հաղորդէ, թէ Սէուտական Արաբիա գումարներ տրամադրած է՝ խրուաթեան արտադրութեամբ զէնքեր հասցնելու համար Սուրիոյ ընդդիմադիրներուն: Զէնքերը, Յորդանանի ճամբով, Դեկտեմբերին հասած են սուրիացի ընդդիմադիրներուն ձեռքը եւ դրական ազդեցութիւն ունեցած են անոնց յառաջընթացին մէջ:

LEAVE A REPLY

Please enter your comment!
Please enter your name here