«ԿԻԼԻԿԵԱՆ» ԴՊՐՈՑԻ ԱՇԱԿԵՐՏՆԵՐԸ ԿԸ ՍԻՐԵՆ ՀԱՅՐԵՆԻ ՄԻՋԱՎԱՅՐԸ, ԲԱՅՑ Կ’ԵՐԱԶԵՆ ՎԵՐԱԴԱՌՆԱԼ ԻՐԵՆՑ ԾՆՆԴԱՎԱՅՐԸ

0
111

 Սուրիահայ ծնողները յուզող խնդիրներէն  մէկը իրենց երեխաներուն ուսումն է, որ կիսատ  մնացած էր Հայաստան տեղափոխուելու պատճառով: Ներկայիս այս խնդիրը կարելի է լուծուած համարել, քանի որ արդէն մօտ վեց ամիս է Հայաստանի մէջ բացուած է «Կիլիկեան» դպրոցը, ուր  դասընթացքներու կը հետեւին անոնք: Ներկայիս  դպրոցը ունի 1-9-րդ դասարաններուն  մէջ  սորվող  մօտ 300 աշակերտ: Ուսումը  այստեղ կը դասաւանդուի  սուրիական ծրագիրով:

Բացի հայերէնէն, երեխաները կը  սորվին  եւս երեք լեզու` արաբերէն, ֆրանսերէն եւ անգլերէն: Ռուսերէնի հարցը կը մնայ քննարկութեան տակ, քանի որ ան չի մտներ Սուրիոյ դպրոցական ծրագիրին  մէջ, բայց  կը  նախատեսուի  ռուսերէնը ներառել աւագ դպրոցի աշակերտներու ուսումնական ծրագիրին մէջ:

Դպրոցի կարեւոր առաքելութիւններէն է երեխաներու  ծանօթացումը եւ  մերձեցումը հայրենի  հասարակութեան հետ, քանի որ երեխաները իրենց մտածելակերպով ու կենցաղով  կը տարբերին իրենց  հասակակիցիներէն: «Կիլիկեան» դպրոցի աշակերտները արդէն հասցուցած  են լաւ յարաբերութիւններ հաստատել Նար-Դոսի անուան դպրոցի աշակերտներուն հետ: «Միասին  կը կազմակերպենք միջոցառումներ: Փետրուարի 19-ին գիրք նուիրելու օրուան կապակցութեամբ Նար-Դոսի անուան դպրոցին մէջ  կազմակերպուած միջոցառման ժամանակ աշակերտները մեր երեխաներուն գիրք նուիրեցին: Մեր երեխաները նաեւ մասնակցեցան Օշականի մէջ Մայրենիի օրուան առթիւ կազմակերպուած միջոցառումներուն»,-նշեց   դպրոցի տնօրէն Նորա Փլիպոսեանը:

Երեխաներուն  համար նոր միջավայրին  հետ  համակերպիլը  աւելի հեշտ է, յատկապէս եթէ առկայ  է հասակակիցներու հետ շփումը: «Առաջին անգամ, որ դպրոց եկայ ամենաշատը կ’ուզէի բոլորին հետ ընկերանալ: Ինծի համար  այստեղ շատ  հաճելի էր, երեխաներն ալ  շատ  կը հաւնին: Այստեղ արդէն շատ ընկերներ ունիմ»,-ըսաւ ութամեայ  Դանիէլան, որ  Հայաստան կ’ապրի  ծնողներուն  եւ փոքր եղբօր հետ: Թէեւ հայաստանեան միջավայրն ու ընկերները Դանիէլային հաճելի կը  թուին, ան յոյս ունի, որ Սուրիոյ իրավիճակը կը բարելաւուի ու իրենք ընտանիքով կը վերադառնան իրենց տունը:

Դպրոցին մէջ  ընկերական լայն շրջանակ ստեղծած է նաեւ տասը տարեկան Ռոզալիան: Ան  կ’երազէ է բժշկուհի դառնալ: «Առաջին օրը երբ դպրոց եկայ, ամենատպաւորիչ պահը դպրոցի բացման միջոցառումն էր: Ընկերներս լաւ են, դասերը կը սիրեմ, յատկապէս հայերէնը, կրօնը եւ թուաբանութիւնը: Եթէ ծնողներս աշխատանք գտնեն, մենք Հայաստան կը մնանք: Ես կ’ուզէի այստեղ ապրիլ, բայց մեր տունը կարօտցած եմ»,- նշեց Ռոզալիան:

Վարդուհի Ստեփանեան

LEAVE A REPLY

Please enter your comment!
Please enter your name here