ՄԱՏՐԻՏԻ ՀՍԿԱՆԵՐԸ ՀԱՍԱՆ ՍՊԱՆԻՈՅ ԲԱԺԱԿԻ ԱՒԱՐՏԱԿԱՆԻՆ

0
134

Սպանիոյ  ֆութպոլի բաժակի  աւարտական մրցումին, Ռէալ Մատրիտի  մրցակիցը պիտի ըլլայ   Աթլեթիքօ Մատրիտը:  Վերջինս,  կիսաեզրափակիչ հանգրուանի դարձի մրցումին  2-2 արդիւնքով հաւասարութիւն մը արձանագրեց  Սեւիլիայի  դէմ:  Երթի մրցումը աւարտած էր Աթլեթիքոյի յաղթանակով՝ 2-1:  Աթլեթիքոյի  մարզիչ Տիէկօ Սիմոնէ յայտարարեց, թէ  տակաւին կանուխ է խօսիլ  Ռէալի դէմ   աւարտական   մրցումին  մասին: Ան  թելադրեց կեդրոնանալ ախոյեանութեան մրցումներուն վրայ:  Նշենք, թէ Աթլեթիքօ Մատրիտ ախոյեանութեան  ընդհանուր դասաւորման  մէջ կը գրաւէ երկրորդ դիրքը:  Ռէալ՝ երրորդ:

 Ֆրանսայի մէջ, Փարի Սէն Ժերմէն հասաւ գաւաթի մրցաշարքի  քառորդ աւարտական հանգրուանին: Մայրաքաղաքի կազմը  2-0 արդիւնքով պարտութեան  մատնեց Մարսէյը:  Մրցումին զոյգ կոլերը  նշանակեց  Զլաթան  Իպրահիմովիչ:   Նշենք, թէ  Սէն Ժերմէնի առաջին տասնմէկին մաս կը կազմէր Տէյվիտ Պեքհամը:

 Գերմանիոյ բաժակի քառորդ աւարտականի հանդիպումներուն, Պայերն Միւնիխ  1-0 արդիւնքով պարտութեան մատնեց Պորուսիա Տորթմունտը: Արիան Ռոպէն նշանակեց   պաւարիական կազմին կոլը:   Շթութկարթ,  Վոլֆսպուրկ եւ  Ֆրայպուրկ ամբողջացուցին  կիսաւարտական հանգրուան հասնող խումբերուն քառեակը:  Կիսաեզրափակիչի  հանդիպումները տեղի պիտի ունենան  16 եւ 17  Ապրիլին:

ՄԱՐԶԱԿԱՆ ԿԱՐՃ ԼՈՒՐԵՐ

–          Պարչելոնա մտադրած է գնելու Ռոմայի 18-ամեայ պրազիլիացի պաշտպան  Մարքինիոսը:  Գաթալոնական ակումբը պատրաստ է  25 միլիոն եուրօ  վճարելու  երիտասարդ պաշտպանին փոխանցումին համար:

–           Փարի Սէն Ժերմէնի   շուետացի յարձակող Զլաթան Իպրահիմովիչ  պիտի բացակայի Վալենսիայի դէմ «Չեմփիընզ Լիկ» բաժակի  գծով, իր  կազմին ունենալիք  դարձի մրցումէն:  Իպրահիմովիչ երրթի մրցումին  դաշտէն հեռացուած էր կոշտ խաղարկութիւն  ցուցաբերելու պատճառով  :

–          ՈՒԵՖԱ    վաթսուն հազար եուրօ տուգանք  եւ մէկ մրցում  փակ  դաշտի վրայ կատարելու  պատիժ մը սահմանաեց  Ֆեներպահչէի դէմ՝ պելառուսական  ՊԱԹԷ  խումբին դէմ անոր համակիրներուն ոչ մարզավայել ընթացքին համար:

–          Չելսի խումբին  մարզիչ Ռաֆայէլ Պենիթէզի հաշուած  օրեր կը պահեն  լոնտոնեան ակումբին հետ: Արդարեւ  Միլզպորոյի դէմ իր կազմին արձանագրած 2-0 յաղթանակէն ետք, Պենիթէզ խիստ  քննադատութեան  ենթարկեց ակումբին սեփականատէր  Ռոման Ապրամովիչը եւ   համակիրները:

–          Պրազիլիական Սանթոս  ակումբը  համաձայնագիրը երկարաձգելու բանակցութիւններ կը վարէ  Նէյմարի հետ:  Մէկէ աւելի եւրոպական ակումբներ կը հետապնդեն  21-ամեայ պրազիլիացիին ստորագրութիւնը:

–          Մանչեսթըր Եունայթըտ ակումբի  տնօրէնութիւնը կ’ուսումնասիրէ   Քրիսթիանօ Ռոնալտօն  Ռէալ Մատրիտէն  գնելու կարելիութիւնները: 

–          Պորուսիա  Տորթմունտի լեհ յարձակող  Ռոպերթ Լեվանտովսքի  յայտարարեց, թէ  յառաջիկայ տարեշրջանին պիտի կրէ  Պայերն Միւնիխի շապիկը:

–          Ռէալ Մատրիտ   բանակցութիւններ սկսած են վարել Նափոլիի յարձակող    Էտիսըն  Գավանիի    փաստաբաններուն հետ: Փոխանցման սակը կը մնայ անորոշ:

–           Վաղը՝ Ուրբաթ,  Իտալիոյ ֆութպոլի ախոյեանութեան մրցումներուն գծով,  Նափոլի պիտի  ընդունի  Եուվենթուսը:  Մրցումը պիտի սկսի Պէյրութի ժամով՝  21.45-ին:

LEAVE A REPLY

Please enter your comment!
Please enter your name here